 İran İslam Respublikasının ali dini rəhbəri Ayətullah Xameneinin Ərdəbil vilayətindəki nümayəndəsi, imam-cümə Ayətullah Seyyid Həsən Amili İran-Azərbaycan həmçinin İsrailin Azərbaycana olan xəyanətlərindən danışıb.
İslam-Azeri.az İnternet qəzetinin Arannyus-a istinadən verdiyi xəbərə görə, Seyyid Həsən Amuli Azərbaycan İslam Partiyasının keçmiş sədri, mərhum Əlikram Əliyevin vəfatı ilə bağlı bəyanatında iki ölkənin münasibətlərinə geniş yer ayırıb.
Ayətullah Amili bildirib ki, İran-Azərbaycan münasibətlərinin tarixi və dini köklərinin möhkəm olmasına baxmayaraq, Qərb bu münasibətlərin pisləşməsi üçün geniş proqramla iş görüb. Bəyanatda Qərbin Qarabağ probemindən sui-istifadə etdiyi və bu vasitə ilə iki qardaş xalq arasında nifaq yaratmaq niyyəti güddüyü bildirilib. İmam-cümə Qarabağ müharibəsi başlayan zaman İranın iki yol ayrıcında qaldığını deyir: "Ya erməni təcavüzünə qarşı hərbi müdaxilə etməliydi - bu, İran üçün ikinci bir cəbhənin açılması və Rusiya ilə müharibə ilə nəticələnərdi - ya da öz müsəlman qardaşlarının erməni cəlladları tərəfindən qırılmasına göz yumaraq islami heysiyyətini itirməliydi. İran üçüncü yolu seçməyə məcbur qaldı: nə aşkar şəkildə hərbi müdaxilə, nə də tamaşaçı olmaq. İran siyasətçiləri bəzi əməkdaşlıqları bu günə qədər dilə gətirməyiblər və ola bilər ki, diplomatik mülahizələrə görə, bu məsələlər heç zaman işıqlandırılmasın. Amma mən deməliyəm. Mən imam-cüməyəm. Xitabət kürsüsündə əyləşib müsəlman qardaşlarımın şübhə və suallarına aydınlıq gətirməliyəm. Şuşanı qorumaq üçün bir-iki silah tapa bilməyən mübariz insanlara maşınlarla silah verilib. O zamankı hökumətin razılığı, Rəhim Qazıyevin, Rövşən Cavadovun xahişi ilə müdafiə sistemi qurmaq üçün müştərək qərargah yaradılıb. Bu qərargahda Təbriz və Ərdəbil generalları əyləşib öz azərbaycanlı qardaşlarına yardım göstərib, gecə-gündüz əllərindən gələni edib, təcavüzün qarşısını almağa çalışıblar. Hətta canlı qüvvəyə ehtiyac olanda İranın yardım və təşkilatçılığı ilə Əfqanıstandan minlərlə döyüşçü gətirilərək cəbhə xəttinə yerləşdirilib. Biz ermənilərə yox, azərbaycanlı qardaşlarımıza silah-sürsat verirdik. Bizim Ermənistanda yox, Azərbaycanda hərbi təlim mərkəzlərimiz olub. Qeyd etdiyim məsələlərin Azərbaycanda minlərlə canlı şahidi var. Onlar hələ dünyalarını dəyişməyiblər. Zərrə qədər insafları olsa, mənim dediklərimi təsdiq edərlər. Bəs nəticə nə oldu? Bu qədər zəhmət və təlaşların sonu nə ilə qurtardı? Azərbaycan cəbhələrində İranın məxfi iştirakını görən qərb ölkələri öz planlarının iflasa uğrayacağını başa düşdülər. Təcili tədbirlər görüldü; regionda İslam İnqilabı dalğasına qarşı yaranmış Ergenekona gizli tapşırıqlar göndərildi. Bəli, qardaş Türkiyədə, hərbçilər arasında mossadın son dərəcə ustalıqla yaratdığı Ergenekon təşkilatı Azərbaycan cəbhələrində İranın fəaliyyətlərinə xitam vermək üçün xüsusi tapşırıq aldı. Tapşırıqda da qeyd olunurdu ki, guya İran Qarabağa yardım adı ilə Azərbaycanda Hizbullah təşkilatı yaradır. İranın bu hərəkəti Livanda Hizbullah təşkilatının yaradılması ilə müqayisə olunur, bu iş durdurulmazsa, az bir zamanda onun da qarşısıalınmaz bir prosesə çevrilməsi vurğulanırdı".
Seyyid Amili Xocalı soyqırımın həqiqətlərinin gələcəkdə açılacağını da önə çəkərək deyib: "Xocalı faciəsinin ildönümü ilə bağlı cümə xütbələrində bu barədə danışmışam. Bu münasitbətimə görə ittiham edilmişəm ki, guya Azərbaycan xalqını müqəssir sayıram. İnsafınız olsun, xain siyasətçilərin cinayətini xalqın ayağına yazmayın və mən xalqı yox, məlum qüvvələri nəzərdə tutmuşam. Ürəyimizi qana döndərən bu qırğını, biz azərilərə namus ləkəsi gətirən bir müsibəti ermənilər törətdi və buna heç bir şübhə yoxdur. Amma kimin himayəsi və hiyləsi ilə?! Ruslarınmı? Məlum məsələdir ki, Xocalı qırğınından bir neçə gün sonra Ayaz Mütəllibov devrildi. Mütəllibov rusların himayəsində deyildimi, onlar öz adamlarını devirib qərbpərəst Elçibəyimi gətirmək istəyirdilər?! Gün kimi aydındır ki, belə deyil. Çevriliş rusların himayə etdiyi hakimiyyətə qarşı idi. Amma onların təbirincə Qarabağ cəbhəsindən İranın əlini kəsmək üçün hazırlanmış, günahsız insanların qanı üzərində qurulmuş bir məkrli plan idi. Onun arxasında Ergenekon, əslində Mossad dayanırdı.
Şükürlər olsun ki, əlləri minlərlə müsəlman qanına bulaşmış Ergenokon generalları Ərdoğanın qüdrətli qolları arasında can verir. Minlərlə səhifədən ibarət Ergenekon cinayət qovluğu bu gün vərəq-vərəq oxunur, xəyanətlər ifşa olunur. Amma onun Azərbaycana aid hissələri həmişəlik qapadıldı".
Seyyid Amili mərhum Rövşən Cavadov haqqında da açıqlamalar verib. O bu haqda deyib: "Mərhum Rövşən Cavadov ona yardım edən təbrizli generalla söhbətində çox maraqlı bir nüansı xatırlamışdı. O demişdi ki, çevrilişdən və prezident and içdikdən sonra ilk rəsmi görüşə məni çağırmışdı. Fikirləşirdim ki, məndən Qarabağın azadlığı haqda planımızın nədən ibarət olduğu soruşulacaq. Odur ki, döyüş və əməliyyat planını qovluğa qoyub bəylə görüşə getdim. Amma söhbət əsnasında çaşıb qaldım. Prezident stolunun üstündə bir qovluğa işarə edib dedi: "Sizin İranla bu günə qədər olan həmkarlığınızdan xəbərim var. (Həmin qovluq İsraildən Türkiyəyə, oradan da Azərbaycana göndərilmişdi) Artıq bu gündən bütün əlaqələri dayandırmalısınız. Bizə İranın köməyi lazım deyil. Mən bilsəm ki, Qarabağı İranın köməyi ilə geri alacağıq, o torpaqları ermənilərə bağışlayaram. Qarabağ ciddi bir problem deyil, az bir zamanda öz həllini tapacaq. Bizim müharibəmiz İranladır, özümüzü İranla müharibəyə hazırlamalıyıq. Bizim həqiqi düşmənimiz ermənilər deyil, farslardır”.
İsrailin Azərbaycana silah satışının da əslində bir səhv addım adlandıran Ərdəbilin İmam Cüməsi deyib: "Görəsən Azərbaycan hökuməti qanımıza susamış İsraillə həmkarlığa arxalanıb Qarabağı azad etmək istəyir?! Guya İsrail heç bir dövlətin bizə satmadığı silahları satır? Nə qədər gülüncdür?! Onların Azərbaycana satdığı silahlar öz ölkələrində istifadədən çıxarılan silahlardır. Onlar bir zaman Türkiyəyə pilotsuz təyyarələr satdılar. Sonradan məlum oldu ki, pilotsuzlar iki idarə sistemi ilə istehsal edilib. Əsil idarəetmə sitemlərini Tel-Əviv özündə saxlayır. Yəni münasibət pozulsa, pilotsuzlar Tel-Əvivdəki daha üstün sistemlərlə özümüzə qarşı yönəldilə bilər. Bir neçə il bundan qabaq Türkiyədə qəzaya uğramış qırıcı təyyarənin qara qutusunu və qalıqlarını tapmaq üçün İsraildən kömək aldılar. Çünki onların mərkəzi idarəetmə sistemi onların əlindədir".
Ayətullah Amili General Rail Rzayevin öldürülməsi haqqında da şok açıqlamalar verib. O bu haqda deyib: "Azərbaycanlı general, qara pulların silinməsində ən gəlirli sahə olan hava qüvvələri komandanı Rail Rzayevi kim öldürdü? Nə üçün öldürdü? Heç vaxt açılmayacaq bu qətlin üstü. Aldadılaraq bu oyuna girən general milyardlara imza atmış, sonda ona çox cüzi pay düşdüyünə sadəcə etiraz etmişdi. Bəli, bu oyundan çıxan olmur, ölən olur.
Onlar hələlik İsraili Azərbaycan xalqına dost kimi sırıyaraq, yuxuda yəhudi banklarındakı milyardları görürlər. Bir gün Məhəmmədrza Pəhləvi, Ben Əli, Hüsnü Mübarək, Qəzzafi və digər diktatorlar kimi həmin pulların xalq qarşısında hesabatını verməli olacaqlar".
TALISH.ORG
|
