Həxbəhə zılmi zəmonəy, həx hıste divonıj ni,
Pəxrə dil şeytoni kəy, dinıj ni, imonıj ni
Allahverdi BAYRAMI (İVIJƏLİ)
IN ZƏMONƏ HƏXBƏHƏY...
In zəmonə həxbəhəy, həx heste, divonış ni.
Pəxrə dıl, şəytoni kəy, diniş ni, imonış ni.
Navnə əsri "Sivı haft” bərpo bə; xəşəti ni:
Bo milləti bədəti bıpi vey, xoşəti ni;
Hiç kəs hiçki məsdəni: sipriş, siprişəti ni,
Lap yəndı qujdi bahan, çoke ki, vəşyəti ni,
Həmmə qıno dılədən, sıvıkiş ni, qoniş ni;
In zəmonə həxbəhəy, həx heste, divonış ni.
Pəxrə dıl, şəytoni kəy, diniş ni, imonış ni.
Vində çəşon qətedən: bekardedən konədə,
Həx bıvoti zıvoni bırnedən çı bınədə.
Bə həxə ro şə nınqon pıxnedən zindonədə.
Məmləkəto ləjəne kuon, şılon çanədə!
Harçi ərbobi dasdəy, kosibi məydonış ni;
In zəmonə həxbəhəy, həx heste, divonış ni.
Pəxrə dıl, şəytoni kəy, diniş ni, imonış ni.
Aslanov Həzi iqləy, bənom "bexunon” həzoy,
Novruzəli Məmmədov iqləy, xayinon həzoy,
İbrahimi Mıbariz iqləy, tarsvonon həzoy,
Rafiq Əliyev iqləy, "alim” nodonon həzoy;
Çı hıtə xəlği jıqo mərdə kamə zoonış ni!
In zəmonə həxbəhəy, həx heste, divonış ni.
Pəxrə dıl, şəytoni kəy, diniş ni, imonış ni.
Rışvə bənə sıbıji eğətəşe məmləkət,
Jiyo, peyo, har tono: məmuron xəlği, əlbət:
Etırnedən, dırnedən; xun ru kardedə millət.
Hınə heste sə bekə, bı lıxmədə con oğət;
Boştə dardi dəvoyo noxəşi dəmoniş ni;
In zəmonə həxbəhəy, həx heste, divonış ni.
Pəxrə dıl, şəytoni kəy, diniş ni, imonış ni.
In devron jıqo bışo, həni xəlğ dasto bəşe:
Çe ruşnə, ovi, ğazi dardi çanə bəkəşe?!
Səbrış peş bedə həni, xilosbıkə bə çəşe;
Ənə be ki, i kərə bə lıvış-lıvış dəşe!
Bəvindeş ki, rəhbəron- vey kəsi i tonış ni!
In zəmonə həxbəhəy, həx heste, divonış ni.
Pəxrə dıl, şəytoni kəy, diniş ni, imonış ni.
Hıryedə- həvatedə millət yəndı har tono:
Vağzalono, kuçono, vıjorono, dukono...
Vəşyi- təşi hıtedə həşi jiyo – bitono;
Pıxnedə ın bəbolon polisi pojə tono;
Əğıl bıbu, yol bıbu, qıləy xəşə conış ni;
In zəmonə həxbəhəy, həx heste, divonış ni.
Pəxrə dıl, şəytoni kəy, diniş ni, imonış ni.
25.11.11
Camal LƏLƏZOƏ
DİNIŞ Nİ, İMONIŞ Nİ
Eqınyəmon bə qıləy qir, nə dinış ni, imonış ni.
Cəllod dastdə təvə sı bıə, nə həyoş ni, imonış ni.
Beçiz, bezu mandə millət ləğə jiyo, ah-nolədəy,
Purə dıle, təylə daste, nə oxış ni, kəmonış ni.
Anə şat bıə fəğıri peşt, vindedəni i qəm navi,
Sovı nuni, sovı ovi nə orzuş ni, peymonış ni.
Kə nıqıno çe kosibi, harco bəyo cəhəndıme,
Çe ağliku bı dınyoədə nə ruşnəş ni, məkonış ni.
Ki dastış noə bəsə dasti, xəyış vində, ki noəşnıbu
Ğıyomətdən çə odəmi fırsətış ni, imkonış ni.
Beşt bəsə po, ha qıybəkul, sə rost bıkə, con peroxon,
Ğıryon, bıryon bıə odəmon morxotış ni, divonış ni.
Bo divin bıə hıkımdoron, Cəmol, çıl sor səbır bəbe?
Xıdo bəsə ağli yolə nemətış ni, ehsonış ni...
26.11.11
Tofiq Nicot
Həxbəhə, zılmi zəmonəy, həx heste divonış ni,
Pəxrə dıl şeytoni kəy, dinış ni, imonış ni.
De tamə züy vırtı-vıloy, çı kali dindoron imon,
Zıvonədə xıdo nido, dıli obod, səhmonış ni.
Şəyton ki, ımon bıpəlo, pəle-pəle şər bıkaşto,
De ərşədə-əflokədə, çə xonəxo damonış ni.
Həromə tikə çı şine, bənə nəqqə ebardedən,
Həlol ruzi çaştəkəsi, səfolıto jımonış ni.
Im çı dınyoy, be həx-hisob, tonış təye, tonış pure,
Be nisbətə bı dıynoədə, be kosibon tımonış ni.
I poə bastə peşt bə puli, jıqo zınedən Xızırin,
I poə ğərəz dast çığıli, bə hiç məto gümonış ni.
Çənnə düzi bıvotomən, bo dindoron kofirim az,
Oşko, xəlvət, ve kəs votdə -çı Nicoti imonış ni.
İlyasi Habil
Həxbəhə, zılmi zəmonəy, həx heste divonış ni,
Pəxrə dıl şeytoni kəy, dinış ni, imonış ni.
Həni quzoron quzəke, qəncinon qıyeqət,
Eqnə həx dasto bə po, nohəxi somonış ni.
Iblisi haməvujəy, şəytoni ovujnedə,
Ozo bol, bizojən ve nə oşko, nə niyoniş ni.
Ələvuz, əməlbozan ğoymin, gevcəğ dıyədı,
Əzozilon riyə xırc, pınd qıləbəmiyonış ni.
Sormo bebəxt çanq-poçəye bo bərşidə bero,
Quşbəvanqe, bəşərotıj bastəy ovandmonış ni.
Kavion, zodəqon, hestibəyon ovdonədən,
Ləvsəy, lıskəyro kosib, nəvedə jimonış ni.
Bıpıyoje ozodı, nibəbe bayro perəxmon,
Bəşe, əlbəsat, quri-qımbəz bırimonış ni.
Nokom, ənəşın məbi, exroc məqət milləti ənə,
Məvot ki, gıryətmand, yurdəpi ğəhrəmonış ni.
1-quzək-xarab
2-qəncin-imkanlı, zəngin
3-somon-sərhəd
4-ələvuz-küyçü
5-qıləbəmiyon-seyrəklik
6-bərşidə-dirçəliş
7-bəşərot-xoşxəbər, yaxşılıq
8-kavi-kübar, varlı
9-bırimon-qətiyyət, nüfuz
10-ənəşın-düşüncəsiz
Tolışon Sədo, №08, 02.12.2011
