Ramiz Mehdiyev 300 kiloqramlıq qızıl atı kimə hədiyyə edib?
Rayonda tapılan qiymətli xəzinənin yüksək vəzifəlilər arasında bölüşdürüldüyü ehtimal edilir
Bir müddət əvvəl Qəbələ rayonu ərazisində tapılan xəzinə barədə "Azadıq”a ilginc məlumatlar daxil olub. Redaksiyamıza məlumat verən mənbə inşa edilməkdə olan Qəbələ hava limanı yaxınlığında olan kurqanın sökülməsi zamanı ağlasığmaz dərəcədə zəngin xəzinənin tapıldığını bildirib.
Mənbənin bildirdiyinə görə, ərazidə kurqanın olması barədə əhalinin sovet dövründə belə, məlumatı olub. Sovet hakimiyyəti kurqanın dağıdılmasına və ərazidə əkin işlərinin görülməsinə qadağa qoyub. Hava limanı inşası zamanı kurqanın dağıdılmasına yerli əhali etiraz edib. Lakin Çingiz adlı iş icraçısı layihəyə əsasən kurqanın sökülməsinin vacib olduğunu bildirib. Bundan sonra kurqan sökülüb. Mənbənin bildirdiyinə görə, kurqanın üstünü əslən Zaqatala rayonundan olan ekskavatorçu açıb. Kurqandan çəkisi 300 kiloqram olan qızıl at heykəli, çoxsaylı qızıl əşyalar və hansısa hökmdarın cənazəsi çıxarılıb. Traktorçu dərhal tapıntı barədə tikintinin rəhbərliyinə məlumat verib. Az sonra kurqanın mühafizəsi üçün Bakıdan xüsusi dəstə gətirilib. Daha sonra tapılan xəzinə Bakıya aparılıb. Xəzinəni tapan traktorçunu isə özlərini Milli Təhlükəsizlik Nazirliyinin əməkdaşları kimi təqdim edən şəxslər dindirib. Dindirilmə bir neçə gün çəkib. Sonra traktorçuya 10 min manat məbləğində "şirinlik” verilib.
Xəzinə tapıldıqdan sonra Qəbələyə Prezident Administrasiyasının rəhbəri Ramiz Mehdiyev, daxili işlər naziri Ramil Usubov və fövqəladə hallar naziri Kamaləddin Heydərov birgə səfər edib. Xatırladaq ki, səfər bu il oktyabrın 17-də gerçəkləşib. Yayılan məlumatlarda rəsmi şəxslərin antik dövrə aid yeni tapılan yaşayış yerinə baş çəkdikləri bildirilirdi. Qəbələ arxeoloji ekspedisiyasının rəhbəri Qəhrəman Ağayev rəsmilərin tapıntılarla tanış olduqlarını, abidənin yaşı və arxeoloji əhəmiyyəti barədə məlumat aldıqlarını demişdi.
Bir-birinə düşmən olan üçlüyün Qəbələyə birgə səfərindən sonra xəzinə tapılması barədə rəsmi açıqlama yayılıb. Hakimiyyət mətbuatı xəzinə tapıldıqdan sonra Qəbələdə Hun imperatoru Atillanın qəbrinin aşkarlandığını bildirdi. Lakin həmin xəbər qısa müddət ərzində yığışdırıldı. Diqqət çəkən məqamlardan biri isə xəzinə barədə Elmlər Akademiyasının Tarix Institutunun və Arxeologiya Institutunun hər hansı açıqlama verməməsidir. Ölkənin istənilən bölgəsində saxsı qablar belə, tapılarkən telekanallarda bu barədə silsilə verilişlər verildiyi halda, Qəbələ xəzinəsi barədə susqunluq nümayiş etdirildi.
Ehtimal edilir ki, cəkisi 300 kiloqram olan qızıl at heykəlini bu 3 məmur mənimsəyib. Ən məntiqi ehtimal isə budur ki, at Ilham Əliyevə hədiyyə edilib. Digər qiymətli əşyaları isə bu üç məmur bölüşdürüb.
300 kiloqram çəkisi olan qızıl heykəl yalnız böyük imperiyalarda hazırlana bilərdi. Eyni zamanda heykəlin kurqandan tapılması onu deməyə əsas verir ki, kurqan böyük hökmdarlardan birinə məxsusdur. At qədim türklər və hunlar üçün müqəddəs sayıldığından, söyləmək olar ki, kurqan həqiqətən də Hun xaqanlarından birinə aiddir. Ola bilər ki, hətta Atillanın özünə.
Qeyd edək ki, Qəbələ-Oğuz bölgəsində çoxsaylı kurqanlar var. Oğuz rayonu Kərimbəyli kəndi ərazisində olan kurqanlardan biri açılıb. Orada arxeoloji işlər görülür.
Sonda onu qeyd edək ki, Azərbaycan hakimiyyəti yalnız qızıl atı, xəzinədə tapılan qiymətli əşyaları oğurlamayıb. Eyni zamanda Azərbaycan və Qafqaz tarixinin böyük bir hissəsini oğurlamış olub.
Dəhşətli cinayət hadisəsi barədə araşdırmamızı davam etdirəcəyik.
Əfqan Muxtarlı,
Azadlıq Qəzeti
