 Əliyevlərin biznes fəaliyyətinə dair daha bir jurnalist araşdırması
Azərbaycan hakimiyyətinin son dövrlərdə yüksək həvəslə təbliğ etdiyi və özündə 17 müxtəlif zavodu birləşdirən Sumqayıt Texnologiyalar Parkı 6 aprel 2012-ci ildə Vergilər Nazirliyində "Sumqayıt Texnologiyalar Parkı” MMC kimi qeydiyyatdan keçib. Bu haqda nazirliyin rəsmi saytında məlumat yerləşdirilib. Indiyəcən sual altında olan bir məsələ də elə buradan aydınlaşıb. Çox böyük investisiya qoyulmuş meqamüəssisənin sahibi bəlli olub.
Hakimiyyət nümayəndələri indiyəcən bəyan edib ki, Sumqayıt Texnologiyalar Parkı (STP) MDB məkanında əvəzi və bənzəri olmayan bir sənaye şəhərciyidir. Rəsmilərin və müəssisə təmsilçilərinin mətbuatda getmiş məlumatlarında bildirilir ki, STP-də kabel zavodu, plastik boru zavodu, yüksəkgərginlikli avadanlıqlar, Günəş kollektorları, maşınqayırma zavodu, qaynar sinkləmə zavodu, ventilyasiya boruları istehsalı zavodu, dəqiq mexanika zavodu, texniki qaz istehsal edən zavod, dartıcı-yedəkçilərin yığımı zavodu, transformator zavodu, sendviç-panel istehsal edən zavod, energetika sektoru üçün hidroturbinlər, böyük buxar turbinləri məhsullarının buraxılacağı tökmə zavodu, həmçinin digər zavodlar fəaliyyət göstərir və yaxud işə başlamaq üzrədir. Hakimiyyət təmsilçiləri bu sənaye şəhərciyini qeyri-neft sektorunda ölkənin ən böyük investisiya layihəsi sayırlar.
Çox bahalı investisiya layihəsi
Bu layihəyə nə qədər investisiya qoyulduğu açıqlanmır, lakin bunun 100 milyonlarla ola biləcəyi güman edilir. Axırıncı dəfə ötən ay - aprelin 24-də STP-də olan prezident Ilham Əliyev burada bir neçə zavodun açılışında iştirak edib, işlərin gedişi ilə tanış olub və göstərişlər verib. Prezidentin rəsmi saytında indi burada 17 zavodun olduğu qeyd edilir. Müəssisənin 40 hektardan çox nəhəng ərazisində prezident xüsusi avtobusla gəzməli olub.
Zavodlarda ən müasir, ən son və təbii ki, ən bahalı avadanlıq və texnologiyalardan istifadə edilir. Sumqayıt Texnologiyalar Parkı Idarə heyətinin üzvü "Azərbaycan Respublikası regionlarının 2009-2013-cü illərdə sosial-iqtisadi inkişafı Dövlət Proqramı”nın icrasının ikinci ilinin yekunlarına həsr olunmuş konfransda prezidentə etdiyi məruzədə demişdi: "Sumqayıt Texnologiyalar Parkında ”Liebherr", "Komatsu”, "Hitachi”, "Bomag”, "Borg”, "Mercedes” və s. kimi dünyanın qabaqcıl texnikasından, maşın və mexanizmlərindən istifadə edilir".
Şirkətin saytında (www.stp.az) hələlik yalnız bəzi zavodların adı var:
* Kabel zavodu
* Plastik boru zavodu
* Qaynar sinkləmə zavodu
* Dəqiq emal mərkəzləri zavodu
* Ağır maşınqayırma zavodu
* Elektron cihazları zavodu
* Yüksək gərginlikli elektrik avadanlıqlarının istehsalı zavodu
* Günəş kollektorları və qazanların istehsalı sexi
* Mis və alüminium elektrotexniki çubuqların istehsalı sexi
* Texniki qazlar istehsalı zavodu
"Sumqayıt Texnologiyalar Parkı”nın sahibi kimdir"
Vergilər Nazirliyinin 6 aprel 2012-ci il qeydiyyat məlumatında "Sumqayıt Texnologiyalar Parkı”nın sahibinin adı da göstərilib: "AZENCO GROUP” Məhdud Məsuliyyətli Cəmiyyəti. Sual oluna bilər ki, bəs adı son illərdə bizə tez-tez rast gələn, ən məşhur dövlət sifarişlərini həyata keçirən, həmçinin Xədicə Ismayılovanın araşdırması ilə "Baku Crystal hall”un və Dövlət Bayraq Meydanının tikintisində subpodratrçı olması aydınlaşan "AZENCO GROUP” MMC-in sahibi kimdir?
Bundan əvvəlki jurnalist araşdırmalarında artıq bu suala da cavab tapılıb. AZENCO-nun rəsmi məlumatlarında göstərilir ki, onun payının 97,5 faizinin sahibi "Interenerji” şirkətidir.ÿ"Interenerji"nin əsas - 70 faizlik payının sahibi isə "Ador” MMC-dir.
"Ador” MMC Bakıda Səməd Vurğun küçəsi 7 ünvanında qeydiyyatdan keçib. Contact.az saytının və "Turan” agentliyinin əməkdaşı iki il öncə həmin ünvanda bir neçə bankın qeydiyyatının izinə düşmüş və müəyyən etmişdi ki, bu ünvanda 3 seçici qeydə alınıb - Mehriban Arif qızı Əliyeva, Leyla Ilham qızı Əliyeva, Arzu Ilham qızı Əliyeva.
Araşdırmaçı jurnalist Xədicə Ismayılova "BAKU CRYSTAL HALLun sirləri” adlı son araşdırmasında (http://www.azadliqradiosu.az/content/article/24575613.html) "Interenerji” şirkətinin və onun sahibi "ADOR” MMC-nin izini də həmin ünvanda tapır və qeyd edir ki, "Azadlıq” radiosunun 2010-cu ildə apardığı araşdırma zamanı Azərbaycan prezidentinin sözçüsü Azər Qasımov Silkwaybank-ın səhmlərinin sahibiÿ (http://www.azadliq.org/content/article/2123076.html) və S.Vurğun küçəsi 7 ünvanın sakinlərindən birinin - Arzu Əliyevanın Azərbaycan prezidenti Ilham Əliyevin övladı olduğunu təsdiqləmişdi.
"ADOR” MMC həm də "Express” bankın təsisçisidir. Bankın illik hesabatlarında da bu şirkətin ünvanı Səməd Vurğun küçəsi 7 olaraq göstərilir.
Bütün bunlardan bəlli olur ki, prezident ailəsinin qeydiyyatda olduğu S.Vurğun küçəsi 7 ünvanında hüquqi qeydiyyatdan keçmiş "ADOR” MMC şirkəti "Interenerji”nin sahibi olduğu üçün, o həm də "Interenerji”nin 70 faiz paya sahib olduğu "AZENCO GROUP” MMC-nin əsas sahibidir.
"AZENCO GROUP” MMC isə, Vergilər Nazirliyinin 6 aprel 2012-ci il məlumatına görə, 17 zavodu birləşdirən "Sumqayıt Texnologiyalar Parkı” MMC-nin sahibidir. Deməli, prezident ailəsinin qeydiyyatda olduğu S.Vurğun küçəsi 7 ünvanında qeydiyyatdan keçmiş "ADOR” MMC "Sumqayıt Texnologiyalar Parkı” MMC-nin əsas sahibidir.
Onu da qeyd edək ki, "Sumqayıt Texnologiyalar Parkı”nın istehsal etdiyi məhsulların əsas alıcısı Azərbaycan dövlətinin qurumlarıdır.
Şahvələd Çobanoğlu,
Azadlıq Qəzeti
|
