 RATİ-nin səhnəyə çıxması Azərbaycanda siyasi dəyişikliklərin olacağı barədə proqnozları doğruldur
Nüfuzlu Azərbaycan biznesmenləri və ictimai xadimlərinin daxil olduğu Rusiya Azərbaycan Təşkilatları İttifaqının (RATİ) yaradılması Azərbaycanı 1993-cü ildən idarə edən hakimiyyətin rəxnəyə düşən təməlinə yeni bir zərbə oldu.
RATİ təsisçiləri Azərbaycan baş nazirinin keçmiş 1-ci müavini Abbas Abbasov, Azərbaycanlıların Milli-Mədəni Muxtariyyatının ("Azerros”) prezidenti Söyün Sadıxov, Rusiya Notarial Kontorlar Gildiyasının prezidenti Natiq Agamirov, kinodramaturq və kinorejissor Rüstəm İbrahimbəyov, biznesmen İsgəndər Xəlilov Vahid Ələkbərov (Lukoyl prezidenti), Araz Ağalarov ("Krokus” holdinqinin rəhbəri), Telman İsmayılov (AST holdinqi), Dövlət Dumasının deputatı, dağıstanlı Ramazan Abdulatipov bildiriblər ki, məqsədləri diaspor işinin səmərəsinin artırılmasıdır.
Azərbaycan Respublikası Diasporla İş üzrə Dövlət Komitəsi yeni diaspor təşkilatı əleyhinə əsəbi bəyanat verib, bunu ”RF-də yaşayan soydaşlarımızın birlik və həmrəyliyinə xidmət etməyən addım” adlandırıb.
Hər iki addım - həm RATİ-nin yaradılması, həm də Diasporla İş üzrə Dövlət Komitəsinin bəyanatı açıq münaqişə yaranana kimi razılığa gələ bilməyən qruplar arasında fikir ayrılığından xəbər verir.
Bütün son hadisələri, minimum bu ilin olayları (ali hakimiyyətin korrupsiyada ifşa edilməsi, "Gülərgeyt", Qərbin sərt tənqidləri və Rusiya ilə soyuqluq) Azərbaycan üçün gələcək prezidentlik, dövlət maşınında islahat, cəmiyyətdə münasibətlər sisteminin yenidən qurulması, inhisarçı hakimiyyətin sökülməsi kimi məsələləri həll edəcək 2013-cü illə bağlıdır.
RATİ-nin tərkibi göstərir ki, bu təşkilat gerçəkdən müəyyən qədər Kremlin siyasi iradəsini əks etdirəcək – bunu ekspertlər artıq sezib. Amma bu iradə ABŞ-ın orta perspektivli strategiyası ilə müşayiət ediləcək. 10 il əvvəl hər iki dövlət birlikdə "varis” kod əməliyyatı keçirərək İlham Əliyevi hakimiyyətə gətirdilər.
Bu planın daxili dayağı kimi o vaxt Naxçıvan qrupu çıxış edirdi. Heydər Əliyevin vaxtında o, dövlət sistemində domionant idi və onun oğluna qayaların arasından keçərək prezident kürsüsünü təmin etdi. Sirr deyil ki, Diasporla İş üzrə Dövlət Komitəsində və dünyadakı diasporda Naxçıvan sprutu dominantlıq edir. O bütün əlaqələri öz biznes və siyasi maraqlarına tabe edib.
Maraqlıdır ki, RATİ Ayaz Mütəllibov bəraət alıb 20 illik sürgündən sonra rəsmi eks-prezident kimi Azərbaycana qayıdandan sonra doğuldu. Tərəfdarları az olsa da, onu Azərbaycanın gələcək yenidənqurmasında nüfuzlu fiqur saymaq olar.
Növbəti addım kimi RATİ-nin Azərbaycanın daxili siyasi vəziyyətinə təsirini gözləmək olar. Onun vacib xadimlərindən olan "Oskar”lı dramaturq Rüstəm İbrahimbəyov artıq özünü Ziyalılar İttifaqının sədri olaraq aktiv mübariz kimi biruzə verib. Artıq o, xoşagəlməz Naxçıvan klanının bir hissəsi və Prezident Administarsiyasının rəhbərinə qarşı «Rədd olsun Ramiz Mehdiyev!» şüarını səsləndirib.
RATİ-də İlham Əliyevin yaxın qohumu Ağalarovun və ruhu, baxışları və mədəniyyəti ilə ona yaxın olan adamların iştirakı da göstərir ki, prezident "2013” adlı pyesin proloq və epiloqu ilə tanışdır.
Əliyevin üçüncü dəfə seçkilərə gedəcəyi az ehtimal olunur. O, Qərbin şəxsləndirilmiş siyasi əbədiyyəti yaxşı qəbul etmədiyini dərk edir. Amma təbii ki, o, hakimiyyətin ona yaxın olan şəxsə verilməsində çox maraqlıdır. Bu, onun həyat yoldaşı, Əliyevlər və Paşayevlər ailələrinin ittifaqını təcəssüm etdirən Mehriban Əliyeva ola bilər. Bu, RATİ-yə yaxın olan başqa bir şəxs də ola bilər.
RATİ-nin səhnəyə çıxması Azərbaycanda siyasi dəyişikliklərin olacağı barədə proqnozları doğruldur. Ölkədəki böyük güclərin bütün sonrakı hərəkətləri sistemin sabit və qansız şəkildə yenidən qurulması istiqamətində gedəcək və klassik müxalifətlə yanaşı, Azərbaycanın ictimai-siyasi palitrasını formalaşdıran müxtəlif qrupların prosesə cəlb edilməsi ilə inkişaf edəcək.
Turan Analitik Xidməti |
