 "Talışlar indinin özünə kimi ulu öndər Heydər Əliyevə minnətdardırlar"
"Indinin özündə də vaxtilə Əlikram Hümbətova qoşulan insanlar utandıqlarından insanların arasına çıxa bilmirlər”
"Son günlər Azərbaycan mətbuatında talış birliklərinin yardılması ilə bağlı müxtəlif məlumatlar dərc olunur. Mən bu informasiyaları oxuyarkən onların hansı məqsədlərlə dövriyyəyə buraxıldığını anlaya bilmirəm. Bilmirəm niyə görə belə xəbərləri yazanlar mütəxəssis olmadan, regionu tanımadan, talışların hansı düşüncədə, mövqedə olduğunu bilmədən fikir yaya bilirlər. Axı mən Azərbaycanın cənub bölgəsində doğulub, orada böyüyüb boya-başa çatan və uzun müddət həmin bölgədə rəhbər vəzifələrdə işləyən bir insan kimi bu cür informasiyaları oxuyanda təəccüblənirəm. Talış xalqını Azərbaycandan ayırmaq olmaz. Talışlar indinin özünə kimi ulu öndər Heydər Əliyevə minnətdardırlar ki, onları etnik münaqişənin əlindən qurtarıb. Talışlar parçalanma nə deməkdir çox yaxşı bilirlər. Onlar heç bir zaman ikinci dəfə belə bir provakasiyaya getməzlər” .
Bu fikirləri "Qafqazinfo”ya müsahibəsində Milli Məclisin deputatı Cavanşir Paşazadə deyib. Onun sözlərinə görə, Ermənistanda da talışlar haqında kitab buraxılıb və məqsəd Azərbaycanda etnik münaqişə yaratmaqla insanları bir-birinə qarşı qoymaqdır. Deputat deyib ki, Azərbaycan tarixinin yaxın keçmişində belə cəhdlər olub və talışlar da bu cür cəhdlər zamanı gördüklərini görüblər.
Onun sözlərinə görə, hətta indinin özündə də vaxtilə Əlikram Hümbətova qoşulan insanlar utandıqlarından insanların arasına çıxa bilmirlər. C. Paşazadə hesab edir ki, belə bir situasiyada kimlərinsə talış birlikləri və hansısa məqsədlərlə qurumların yaradılması və talış xalqının guya onlara dəstək verməsi haqqında xəbərlər yayması cəfəngiyyatdır.
Deputat həmçinin, son vaxtlar Rusiyada yaradılan Ümumrusiya Azərbaycanlıları İttifatı Təşkilatına münasibət bildirib. Millət vəkili qeyd edib ki, bu məsələnin də qabardılması və böyüdülməsi mətbuatın xidməti nəticəsində baş verib: "Düşnürəm ki, bu olmayan şeyi yazmaqla böyütməkdir. İnsanın pulu da ola bilər, lakin bu o anlama gəlməməlidir ki, pulu olan hər kəs prezident olmaq istəyəcək. Hər kəs bilir ki, Əbülfəz Elçibəyin dövründə Azərbaycanda nə qədər prezident olmaq istəyən vardı. Lakin bu gün, məsələ o şəkildə deyil. Düşünmürəm ki, kimsə özündə belə bir güc tapıb iddiasını ortaya qoya bilər. Hər halda prezident olmaq istəyən adam özünü İlham Əliyevlə müqayisə etməlidir və əminəm ki, belə bir müqayisəni aparmaq istəyən istənilən şəxs öz fikrindən daşınar. Məhz buna görə də, mətbuat kimlərdənsə lider düzəldib həmin adamları xalqla qarşı-qarşıya qoymamalıdır”.
Deputat bildirib ki, Gürcüstanda baş verən hakimiyyət dəyişikliyinin Azərbaycanda da ola biləcəyini fikirləşmək absurddur: "İlham Əliyevin Saakaşvili olmadığını Gürcüstanda da, Azərbaycanda da yaxşı bilirlər. Gəlin səmimi olaraq bir şeyi fikirləşək ki, Rusiya Gürcüstana girdiyi kimi Azərbaycana girə bilərdimi? Əlbəttə, girə bilməzdi. Ona görə də, Azərbaycanın təcrübə meydançası olmadığnı həm regionda, həm də dünyada yaxşı bilirlər. Təkcə bir faktı misal gətirmək istəyirəm. İlham Əliyev neçə ildir ki, ortaya mövqe qoyub ki, Azərbaycanın nə hava, nə də quru sərhədləri heç bir dövlətə qarşı istifadə olunmayacaq. Görün neçə illərdir dünya mətbuatı yazır ki, İran Azərbaycandan vurulacaq. Lakin bizim dövlət başçımız buna qarşı öz fikrini qəti şəkildə bildirib və hər kəs bundan əmin olub. Belə bir fikri ondan başqa hansı lider əminliklə deyə bilər? Bilirsinizmi bu əminlik haradan qaynaqlanır? Cənab prezident dövlət başçısı seçiləndən indiyə kimi dünya dövlətləri ilə ardıcıl, balanslı siyasət həyata keçirir. Ölkə artıq dünyada stabil mövqeyi ilə təmsil olunur. Dünyanın siyasi liderləri ilə keçirilən hər görüşdən sonra İlham Əliyevin dostlarının sayı artır. Bu gün İlham Əliyevin gücü onun hegemonluğunda deyil, diplomatiyasında, siyasətindədir. Cəmiyyətimiz bunun fərqindədir” .
C. Paşazadə gələn il keçiriləcək prezident seçkilərinə də münasibət bildirib. O deyib ki, Azərbaycanda bəzi məmurların yaratdıqları problemlər olmasa, ölkə böyük inkişafla irəli doğru gedir: "Bizim başımız cəmi 10 ildir ki, problemdən açılıb. Müstəqilliyimizin tarixi daha əvvələ getsə də, biz güclü dövlətə son 10 ildə çevrilməyə başlamışıq və bütün bunları şübhəsiz ki, İlham Əliyevin siyasəti nəticəsində qazanmışıq. Ona görə də gələn ilki prezident seçkilərində Yeni Azərbaycan Partiyası üzvlərinin və onun mövqeyini dəstəkləyənlərin prezidentliyə namizədi İlham Əliyev olacaq. Düşünürəm ki, İlham Əliyevin prezidentliyə namizəd olmaması üçün heç bir səbəb yoxdur” .
Millət vəkili reproduktiv sağlamlıq haqqında qanun layihəsinin müzakirəsinə də münasibət bildirib. Onun sözlərinə görə, belə bir qanun qəbul olunacağı təqdirdə ölkədə böyük söz-söhbətə səbəb olacaq: "Heç hənanın yeri deyil. Reproduktiv sağlamlıq Azərbaycanda ciddi problem kimi mövcud deyil. Əlbəttə gənclər ailə quranda yoxlanılmalıdır. Son vaxtlar iddia edirlər ki, İran da islam ölkəsidir və belə bir qanunu qəbul edib. Lakin unutmaq olmaz ki, İranda bu məsələ ilə bağlı lazım olan prosedurlar fərqli və şəffafdır. Qanunun bu şəkildə qəbulu 20 ildən sonra bacı-qardaşların evlənməsinə gətirib çıxara bilər. Bizim millətimiz əldən gedə bilər. Azərbaycanda heç bir ciddi ailə buna getməz” . |
