 26 Bakı Komissarına polyar münasibət:
İlham Əliyev: Azərbaycan xalqının qanını axıdan şaumyanlar
Heydər Əliyev: Stepan Şaumyanla birlikdə onun mübariz dostları və silahdaşları
Dövlət Agentliyi olan "AzərTAC” İlham Əliyevin Yevlaxda etdiyi çıxışın mətnini yayıb.
Mətnin 26 Bakı Komissarlı ilə bağlı olan hissəsini diqqətinizə çatdırırıq:
"Mən göstəriş verdim, şəxsən! O abidə sökülsün, dağıdılsın"
"Məni bir prezident və vətəndaş kimi ən çox hiddətləndirən o deyil ki, misal üçün, biz bilmirdik 1918-ci ildə nələr baş verirdi, 26 komissar qəhrəman kimi təqdim olunurdu, əslində isə onlar azərbaycanlılara qarşı amansız qəddarlıq törətmişdi.
Yəni məsələ onda deyil ki, bunları bilmirdik, indi bilirik.
Məsələ ondadır ki, biz onların qəhrəman olduqlarına inanırdıq. Yəni belə tərbiyə almışdıq.
Azərbaycan xalqının qanını axıdan şaumyanlar və onun kimi qəddar erməni cinayətkarlar Azərbaycanda qəhrəman kimi təqdim olunur, onların şərəfinə abidələr ucaldılırdı.
Bakının mərkəzində 26 Bakı komissarının şərəfinə abidə ucaldılmışdı.
Mən göstəriş verdim ki, o abidə sökülsün, dağıdılsın.
Mən göstəriş verdim, şəxsən!
Çıxışı diqqətlə oxuyan bir məktəbli bu çıxışdan nə öyrənə bilər?
Orda nifrət, kin və hiddətdən başqa heç nə yoxdur. Mətndəki bir məqama xüsusi olaraq diqqətinizə çəkmək istəyirəm.
"Məsələ ondadır ki, biz onların qəhrəman olduqlarına inanırdıq. Yəni belə tərbiyə almışdıq”.
Doğurdan da cənab prezident belə tərbiyə alıb.
Aşağıda təqdim etdiyimiz mətn 1978-ci ildə Stepan Şaumyanın 100 illik yubileyində Azərbaycan Kommunist Partiyasının Birinci katibi olan yoldaş Heydər Əliyevin nitqindən seçmələrdəndir
"Bakı Kommunasının şanlı epopeyası"
Odlu-alovlu on səkkizinci ildə Qafqaz üzərində Lenin bayrağı, Sovet hakimiyyəti bayrağı qaldıran Bakı Kommunasının şanlı epopeyası Oktyabr yollarının ilk yolçularının unudulmaz hünəridir, mübarizlərin və qurucuların bütün nəsilləri üçün tükənməz ilham mənbəyidir…
Stepan Şaumyanla birlikdə onun mübariz dostları və silahdaşları Məşədi Əzizbəyov, Alyoşa Caparidze, İvan Fioletov, 26 Bakı komissarının 26-sı da əbədiyyətə qovuşmuşdur.
Xahiş edirəm inqilabçı mübarizlərin əziz xatirəsini yad etmək üçün ayağa qalxasınız…
Stepan Georgiyeviç Şaumyanın peşəkar inqilabçıya məxsus dərin məzmunlu, qısa, lakin parlaq həyatı, çoxcəhətli partiya və dövlət fəaliyyəti əməkçi xalqın azadlıq və xoşbəxtliyi uğrunda, kommunizm ideallarının təntənəsi uğrunda fədakarcasına mübarizə aparmaq rəmzidir.
Stepan Şaumyan öz iti zəkası ilə, məsələləri dərin təhlil etmək, hadisələrin mahiyyətinə nüfuz etmək və onların bütün dialektik qanunauyğunluğunu görmək kimi heyrətamiz bir istedadı ilə fərqlənirdi.
İdeya yenilməzliyi, bolşevik prinsipiallığı, fəhlə sinfinə hədsiz sədaqət, inqilab düşmənlərinə qarşı barışmazlıq Stepan Şaumyanın qəhrəman xarakterinin ayrılmaz xüsusiyyətləri idi.(Alqışlar)…
Son nəfəsinədək böyük məqsədə xidmət edən Stepan Şaumyan bu nikbin şüarı bütün nəcib həyatı boyunca özünə bayraq etmişdi (Alqışlar)…
1907-ci ilin iyunundan Stepan Georgiyeviçin inqilabi fəaliyyətinin Bakı dövrü başlandı. Tale onu neft şəhəri ilə möhkəm bağladı…
1918-ci ilin martında müsavatçılar Sovet hakimiyyətini boğmaq niyyəti ilə Bakıda antisovet qiyam qaldırdılar. Bolşeviklərin qəti və möhkəm tədbirləri sayəsində qiyam yatırıldı…
Stepan Şaumyan hər cür millətçilərə – müsavatçılara, daşnaqlara və menşeviklərə qarşı barışmaz və amansız mübarizə aparırdı…
Stepan Georgiyeviç Şaumyanın nəcib obrazı Azərbaycan zəhmətkeşlərinin bütün nəsilləri üçün ruhlandırıcı timsaldır (Gurultulu alqışlar)…
Bu gün biz iftixar və məhəbbət hissi ilə deyirik ki, erməni xalqının böyük oğlu Stepan Şaumyan həm də Azərbaycan xalqının, bütün Zaqafqaziya xalqlarının, bütün çoxmillətli və vahid sovet xalqının oğludur (Gurultulu, sürəkli alqışlar)…
Şərhimizi vermədən hər iki mətni diqqətinizə çatdırdıq.
Nəticənı çıxartmaq isə oxucuların öhdəsinə düşür.
Abzas.net
|
