Bu gün (18 mart 2014) Bakı Beynəlxalq Mətbuat Mərkəzində Talış Ədəbiyyatı Təəssübkeşləri təşkilatı və “Etnoqlobus” Beynəlxalq Onlayn İnformasiya – Analitik Mərkəzi ilə birgə Azərbaycanın gənc Talış yazarları Aytən Eyvazonun “Dıli sədo” romanı və Vüqar Mirzəzadənin “Vətən” adlı şerlər kitablarının təqdimat mərasimi keçirilmişdir.
Tədbirdə 100 nəfərə yaxın Talış ədəbiyyatsevərləri və qonaqlar iştirak edirdi. Tədbiri gənc tədqiqatçı-tarixçi Rəzzaq Xansıvo idarə edirdi. Gənc yazarların yeni nəşr olunmuş kitablarının təqdimat mərasimində tanınmış Talış şair və yazıçıları Xanəli Tolış, Əli Nasir, Camal Lələzoə və Bəxtiyar Ruşin də iştirak edirdilər. Onlar hər iki yazarın yeni kitabları barəsində ürək sözlərini ifadə etdilər. Görkəmli Azərbaycan və Ləzgi yazıçısı və ləzgi dilində dərc olunan “Samur” qəzetinin baş redaktoru Sədaqət Kərimova təqdimat mərasimində iştirak edirdi. O da, qardaş Talış dilində yazan gənc ədiblərə öz təbrik və arzularını çatdırdı. Tədbirdə ən maraqlı məqamlardan biri də, onun işində Azərbaycan Xalq Artisti Faiq Ağayevin iştirak etməsi oldu. O, çıxışına Talış dilində başlayaraq, gənc yazarları işıq üzü görmüş yeni kitabları münasibəti ilə ürəkdən təbrik etdi və onlara gələcəkdə də yaradıcılıq uğurları arzuladı.
Tədbirdə çıxış edən Talış ziyalıları və yaradıcı insanları Əlimərdan Şükürzadə, İradə Məlikova, Mirfəyaz Vahabov, İsrafil Hüseynov, Habil Məydonson, Akif Metəmənson, Feyruz Şivəxanov, Seyran Dadaşov, Rüfət Baxşızadə və o cümlədən bu sətirlərin müəllifi yeni nəşr olunmuş əsərlərin bədii məziyyətləri barəsində söhbət açaraq, gənc yazarlara yeni-yeni yaradıcılıq nailiyyətləri arzu etdilər.
Tədbirin təşkilatçılarından biri olan “Etnoqlobus” Mərkəzinin rəhbəri Gülnarə xanım İnanc da, gəncləri nəşr olumnuş yeni kitabları münasibəti ilə təbrik etdi və onları öz əli ilə hazırladığı xüsusi hədiyyələri ilə mükafatlandırdı.
Təqdimat mərasimin yekun işində söz alan müəlliflər – Aytən Eyvazon və Vüqar Mirzəzadə tədbirin işində fəal iştirak etdiklərinə görə qonaqlara öz dərin minnətdarlıqlarını bildirdilər.
Tədbirin sonunda isə, Yaradıcı qrupun Talış dilində ekranlaşdıqları “Feesbok sərgüzəştləri” bədii filminin fraqmentlərindən hazırlanmış jurnal təqdim olundu.
Mehdibəy SƏFƏROV
Talış kulturoloqu
Tədbirdən hazırlanan foto reportajı təqdim edirik
