Avropa Şurasının insan hüquqları üzrə komissarı Nils Mujnieks: "Hilal Məmmədov milli azlıqların nümayəndəsi, alim və jurnalistdir. O və digər bir çox jurnalistlər, blogerlər, icitmai xadimlər qanunsuz olaraq mühakimə ediliblər"

Azərbaycan hakimiyyəti siyasi məhbusları, hüquq müdafiəçilərini, jurnalist, bloger və digər fəalları azad etməlidir. Bu barədə Avropa Şurasının insan hüquqları üzrə komissarı Nils Mujnieks azərbaycanlı jurnalistlərlə söhbətində bildirib.

Hökumətyönlü telekanalın nümayəndəsi belə bir sual verib: “Nə üçün Avropa Şurası “separatçı” Hilal Məmmədovu müdafiə etməklə ikili standartlara yol verir, eyni zamanda Ukraynada separatçıları pisləyir?”.

“Hilal Məmmədov milli azlıqların nümayəndəsi, alim və jurnalistdir. O və digər bir çox jurnalistlər, blogerlər, icitmai xadimlər qanunsuz olaraq mühakimə ediliblər. Bu, təkcə ifadə azadlğı məsələsi deyil, bu, Azərbaycanda insanları qanuni əsaslarla yox, seçmə yolla, yəni siyasi sifarişlə həbs edən, mühakimə edən hüquq sisteminin azadlığı məsələsidir.

Ötən ilin avqustundan bu proses genişlənərək iri miqyas alıb. Avropa Şurasının ikinci belə  ölkəsi yoxdur ki, orada mənim bütün tərəfdaşların həbsdə olsun, odur ki, ikili standartlardan söhbət gedə bilməz”, - N.Mujnieks bildirib.

Həmin jurnalistin “Avropa Şurası Azərbaycan hökumətinin fikrini nəzərə alırmı yoxsa onun üçün fərqi yoxdur” sualının cavabında avropalı komissar deyib ki, bu fikirlə razı deyil və bununla bağlı rəsmi Bakı ilə mübahisə edəcək.

“Baxın, burada iki variant mümkündür: ya Avropa Şurasında idiotlar oturur və separatçılar, narkomanlar, intihar edənlər və inqilabçılarla əməkdaşlıq edir, ya da Azərbaycanın hüquq sisteminin vəziyyəti çox pisdir. Mən sizi əmin edə bilərəm ki, biz idiot deyilik”, - N.Mujnieks vurğulayıb.

Turan-ın müxbirinin “Mujnieks Xədicə İsmayılova, Rəsul Cəfərov və digər siyasi məhbusların taleyi barədə nə düşünür” sualının cavabında avrokomissar deyib ki, Azərbaycan hökuməti onları azad etməlidir.

“Onlar Xədicəni, Rəsulu, Hilalı və ədalətsiz olaraq həbsdə olan digər hüquq müdafiəçilərini və jurnalistləri azad etməlidirlər”, - o bildirib (contact.az).

TALISH.ORG