 Nemət Pənahlı müdhiş videogörüntüyə görə həbs edilib
"Azadlıq aşiqi"ni həmin kasetə görə indi də dəlixanaya salmaq istəyirlər
Məhkəmənin hökmü ilə 6 il müddətinə azadlıqdan məhrum edilən Nemət Pənahlı yeni bir "bomba” partlada bilər. Qardaşı Səməd Pənahlının sözlərinə görə, N.Pənahlı ona məlum olan bütün sensassion faktları 24 saatlıq videokasetdə yerləşdirib. Bir sutka kameranın önündə dayanaraq bütün bildiklərini dilə gətirən Nemət Pənahlı sonradan kaseti bir neçə nəfərə ötürüb. Həmin adamlar da Azərbaycanın xaricində yaşayırlar. N.Pənahlı qardaşına deyib ki, onu həbs yox, ölümlə hədələyiblər. Əgər onu öldürərlərsə, həmin şəxslər kaseti üzə çıxarıb yayacaqlar. Səməd bəy deyir ki, bu müdhiş kaset ortalığa çıxsa, ölkədə böyük sensassiya yaradacaq: "Dedi ki, qardaş, mən 24 saat kameranın önündə oturmuşam. Bütün bildiklərimi danışmışam. Elə şeylərdir ki, mən onları heç yerdə deməmişəm. Bu məlumatlar açılsa, görəcəksiniz ki, ölkədə nələr olacaq. Onu da dedi ki, başıma bir iş gəlsə, bu məlumatlar yayılacaq. O kaset var, amma mən onun kimlərdə olduğunu bilmirəm”.
Səməd Pənahlının dediyinə görə, qardaşı məlum videokasetdə elə şeylər açıqlayıb ki, onlar barədə heç kitabında da heç nə yazmayıb.
Buna qədər əsas versiya o idi ki, Nemət Pənahlı hələ çap olunmamış 700 səhifəlik kitabının güdazına gedib. 90-cı illərin bir çox gizli olaylarına, N.Pənahlının Heydər Əliyevlə münasibətlərinə həsr olunan kitabın əlyazmaları hələ ki, gizli saxlanılır. Həbsi zamanı N.Pənahlının evinə gələn şəxslər bu gizli yazıları və kaseti tələb ediblər: "11 nəfər gəlmişdi. Dedilər, istəmirsinizsə, evi alt-üst edək, o kaseti və kitabı verin. Nemət bəyin kompüterini, yaddaş kartlarını apardılar. Amma mən deyə bilərəm ki, axtardıqları onların içində deyil. Nemət uşaq deyildi ki, onları ortalıqda saxlasın. Sonradan bizə ən müxtəlif vasitələrlə yol tapıb kitabı əldə etməyə çalışdılar. Mənim ən yaxın dostum təklif etdi ki, o kitabı ver, bu yolla hakimiyyətə təzyiq edib Neməti xilas edək. Sonradan məlum oldu ki, o, hakimiyyətdə təmsil olunan yüksək vəzifəli bir şəxslə yaxın münasibətlərdədir. Onun əli ilə bizdən nə isə öyrənmək istəyirlər. Mən də Nemətin qardaşıyam, o qədər ağılsız deyiləm ki, hər deyilənə inanım”.
Dünən Ombudsman əməkdaşlarının qardaşı ilə görüşdüyünü deyən S.Pənahlı onların polisdən də, müstəntiqdən də aşağı səviyyədə hərəkət etdiklərini deyir: "Nemət təcridxana rəisinin ona qarşı zorakılığına etiraz olaraq artıq 9 gündür aclıq edir. Mənim tələblərimdən sonra Ombudsman həbsxanaya adamlarını göndərdi. Gedib maraqlanmayıblar ki, Nemət 9 gündür aclıq edir, ona adicə həkim də ayırmayıblar. Əvəzində utanmadan böhtan atırlar ki, guya Nemət təcridxana əməkdaşlarına nalayiq sözlər deyib. Nə gözləyirdilər? Rəis deməliydi ki, Neməti döymüşəm?! Təcridxana rəhbərliyi bir tərəfdən Nemət bəyə, vəkilə minnətçi düşür ki, döymə məsələsini bağlayaq, keç günahımızdan, bir də belə şey olmayacaq. O biri tərəfdən də belə böhtan atırlar. Nemət bəy vəkilinə bildirib ki, rəis onun yanına iki müavini ilə gəlib. Müavinləri onun qollarını tutublar, rəis də döyüb. Döyəndə də deyib ki, sən indiyə kimi sovet hökumətini yıxdın, Mütəllibovu hakimiyyətdən apardın, filankəslərə bunu etdin, indi gör, sənin başına nə oyun açacam. Təhdid edib ki, barışığa getməsən, məndən ora-bura şikayət etsən, həkim çağırıb, səni dəli kimi qələmə verib, dəlixanaya saldıracam. Vasif Talıbovun Naxçıvanda elədiklərini burada tətbiq etmək istəyir. Axı Vasif Talıbov da səsini çıxardanı, haqqını tələb edəni dəli adıyla dispanserə atdırır”.
S.Pənahlı dünən qardaşının həbsxanadan vəkil vasitəsilə ərizə göndərdiyini, bugünlərdə bu barədə mətbuata geniş məlumat verəcəyini bildirib.
Xatırladaq ki, N.Pənahlı Cinayət Məcəlləsinin 221.3-cü (xuliqanlıq, silahdan və ya silah qismində istifadə edilən əşyaları tətbiq etməklə törədildikdə) maddəsi ilə ittiham olunub.
Azadlıq Qəzeti
|
