 Britaniyada çıxan həftəsonu dərgisinin müəllifi bu iddianı irəli sürərək bir suala cavab axtarır. Britaniyanı Azərbaycanın "çirkli zənginlər"i ilə birləşdirən nədir?
Çirkli zənginlər: Britaniyanın sevimli diktatorluğunun o qədər nefti var ki, onun varisləri bu neftdə çimirlər...lakin Azərbaycanın nağılvari sərvətinin altından çox bulanıq sirlər pırtlayır.
Bu Britaniyada bazar günləri çıxan "The Mail on Sunday” qəzetinin baş sərlövhəsidir.
İkinci sərlövhədə oxuyuruq: Neft ötən il 19 milyard funt sterlinq gəlir gətirib, lakin ehtimal olunur ki, bu pulun çox hissəsi birbaşa prezident İlham Əliyevin və onun ailəsinin ciblərinə axıb.
KLEOPATRADAN DA QƏRİBƏ
Məqalənin müəllifi Will Stewart yazır:
"Qədim Misir hökmdarı Kleopatra öz vücudunun gözəlliyini hifz etmək üçün uzunqulaq südündə çimərmiş. Azərbaycanın paytaxtı Bakıda isə bundan da qəribə müalicə təklif olunur. Xanımlar Gucci və ya Oscar de la Renta geyimlərini soyunaraq bir vaxtlar Marko Polonun inandığı kimi 40 dərəcəyədək qızdırıldıqda dəri xəstəliklərindən, yel xəstəliyindən, artritdən və hətta "əsəb”dən müalicəvi effekti olduğu söylənən xam neft vannalarına girirlər”.
Tibb elmi isə deyir ki, belə vannada 10 dəqiqədən artıq qalan insan özünü karsirogen təsirə məruz qoyur" - yazır jurnalist.
BAKI DUBAY OLMAQ İSTƏYİR
Will Stewart davam edir ki, Bakı açıq-aşkar İpək Yolunun Dubayına çevrilmək istəyir. "2019-cu ilədək Bakı planetin ən hündür göydələni – 1, 25 milyard funt sterlinqə başa gələcək və bir kilometrədək səmaya ucalacaq 189 mərtəbəli bina ilə qürrələnəcək. Bu bina hazırkı rekordun sahibi Dubayın Bürc Xəlifəsindən 30 faiz hündür olacaq. Hərçənd, söhbət zəlzələ təhlükəsi olan regiondan gedir”, - yazır jurnalist.
Daha sonra "The Mail on Sunday” qəzetində oxuyuruq: "Heç kim Azərbaycanın heyrətmaiz neft sərvətinin nə qədərinin 50 yaşlı prezident İlham Əliyevin, onun aşnalarının və müftəxorlarının bank hesablarına axdığını bilmir. Lakin bunu inamla demək olar ki, onlar təsəvvüredilməz dərəcədə varlıdırlar. Müstəqil təhqiqatın təxminlərinə görə, dövlət neft və qaz şirkəti əhalisi 10 milyon nəfərdən də az olan ölkədə ötən il 19 milyard funt aterlinq gəlir əldə edib”.
"Əliyev özü Rusiyada təhsil alıb, lakin qızları Leyla və Arzunu Londonda bir ilinin təhsil haqqı 15 min funt stelinq olan Kraliça Qızlar Kollecinə göndərib” – yazır Will Stewart.
Jurnalsit fikrini belə bir ehtimalla davam etdirir ki, bu gün Əliyeva bacıları Dubayda, Parisdə və Londonda 50 milyon funt sterlinqlik mülkiyyət portfelinə malik olub, tikintidən gələn faizləri anaları ilə bölüşürlər.
AİLƏNİN SƏRVƏTİ
"Deyilənlərə görə, Leylanın biznes imperiyasına gəlirli hava yolları şirkəti, mobol telefon konsernləri daxildir, lakin Bakının bulanıq kommersiya dünyası bu iddialrı yoxlamağa imkan vermir və hətta belə iddialar da var ki, Azərbaycanın Londondakı səfirlyinin binası da onun mülkiyətidir” – yazır qəzet.
Müəllif bildirir ki, indi 26 yaşlı Leyla və onun milyarder oğlu olan müğənni əri Hayde Parka baxan penthausda yaşayırlar.
Özünü sənətsevər və kübar kimi göstərən Leylanın ünsiyyət çevrəsinə Elisabeth Murdoch, Lord Mandelson və Şahzadə Andrew kimi qüdrətli insanlar daxildir.
Qəzet iddia edir ki, Leyla beş-on rəfiqəsi üçün keçirdiyi şam yeməyində təkcə əla sampan şərabına 300 min funt sterlinq xərcləyib.
HEYDƏROVUN MİLYARDER BALALARI
Məqalədə son dərəcə bahalı şərabların verildiyi başqa bir məkandan – Londonun dəbdəbəli Naytsbric məhəlləsindəki Azərbaycan restoranından da söhbərt açılır.
"The Mail on Sunday” bu restoranın Kəmaləddin Heydərovun milyarder oğulları Tale və Nicata məxsus olduğunu yazır.
Qəzet yazır ki, iş təkcə varlı Azərbaycanlıların Britaniyaya məftunluğu ilə bitmir. Britaniya biznesmenləri də neftlə zəngin Bakıya vurğundurlar.
Azərbaycan Dövlət Neft Şirkəti, Tale Heydərovun Londonda mənzillənmiş Avropa-Azərbaycan Cəmiyəti Britaniya siyasətçilərinin Bakıya səfərlərini təşkil edir.
Qəzetin yadığına görə keçmiş müdafiə naziri Liam Fox, Lord Fraser, Lord Sheikh, Bob Blackman, Mark Field, nəqliyyat naziri Stephen Hammond və hətta Olster Yunionistlərinin lordu Kilclooney üçün Bakıya müftə səfərlər təşkil edilib.
Lakin qəzet yazır ki, Bakıya səfərlərinin sayına və intensivliyinə görə York hersoquna kimsə çata bilməz.
Müxbir qeyd edir ki, Azərbaycan prezidenti ilə Şahzadə Andrew-nu həm də "şit zarafatlara” olan həvəs birləşdirir.
Bununla, belə, yazır qəzet, Azərbaycan hakimiyyətinin jurnalistlərə, insan haqları fəallarına qəddar münasibəti zarafat bir məsələ deyil.
BRİTANİYAPƏRƏST AZƏRBAYCAN TİRANI
Məqalədə deyilir ki, Azərbaycana səfər etmiş Britaniya rəsmilərindən heç biri rəsmi Bakını tənqid etməyib.
"Yəqin ki, onlar haqlıdırlar, - yazır "The Mail on Sunday” qəzeti, - məsələ burasındadır ki, Əliyev tiran olsa da, Britaniyapərəst tirandır”.
Müəllif qeyd edir ki, bu ölkədə Avropanın gələcək nəsillərinin enerji təhlükəsizliyi yatır və Əliyev inandırmağa çalışır ki, onun hələ yüz illik qaz ehiyatı var. Həm də bu təchizatın marşrutu "rus ayısı Gazprom” və təməlçi despotizmə malik Səudiyyə və İran üçün əlçatmazdır.
"Özünün bütün absurdluğuna baxmayaraq, Azərbaycan Qərbsimalı müsəlman ölkəsidir…Buradan 200 kilometr cənuba gedin və qarşınıza İranın nüvə ambisiyalı teokratiyası çaxacaq” – deyilir məqalədə.
BİR VAXTLAR BASHAR ASSAD DA "YAXŞI OĞLAN" SAYILIRDI…
Daha sonra Britaniya biznesinin Bakıdakı fəaliyyətinə toxunan Will Stewart davam edir: "Dəniz sahilində tikilmiş 33 mərtəbəli ayparaşəkilli "Crescent” oteli tezliklə açılacaq. Bundan sonra "Ulduz müharibələri” filmindəki Ölüm Ulduizunu xatırladan Full Moon mehmanxanası da istifadəyə veriləcək. Bakının "Ağ Şəhər”ini tikən və lord Norman Foster kimi memarları olan Atkins UK şirkəti bildirib ki, söhbət Monakodan böyük və Qafqazın ən böyük layihəsindən gedir”.
Əliyevin lağa qoyulmasına və tənqid olunmasına baxmayaraq, - yazır Will Stewart, - Qərb liderləri gizlində neft və qaz perspektivi mənasında sabitlik gətirmiş şəxsə minnətdardırlar.
Jurnalist xatırladır ki, Suriyada Bashar al-Assad hakmiyyətə gələndə, Britaniyanın leyborist nazirlərindən biri bu hadəsni "yaxşı xəbər” adlandırmışdı.
O demişdi ki, "Bu çox istiqanlı, müasir baxışlara malik şəxs Suriyanı irəliyə doğru aparacaq”.
"Bu sözləri deyən nazirin adı Peter Hain idi…Lakin nə olar? Keçmişə nəzər bizi daha müdrik edir. Odur ki, indi deyəcəyim yalnız bir şey ola bilər: Stabil Əliyev sülaləsinə və onun göydələn saraylarına çox da bel bağlamayın. Bir gün çərxi-fələk tərsinə dönə bilər”.
Tərcümə AzadlıqRadiosunundur
|
