İlham Əliyevin 2013-lə bağlı qəti mövqeyini bilmək üçün YAP-ın ali tədbirinin keçirilməsi planlaşdırılır
Hakimiyyətdəki Naxçıvan klanı Ilham Əliyevin 2013-cü il prezident seçkisi ilə bağlı mövqeyində dəyişikliyə nail olmaq üçün çabalarını davam etdirir. Qeyd edək ki, Ilham Əliyev "Əl Cəzirə” telekanalına müsahibəsində 2013-cü ildə namizədliyini irəli sürüb-sürməyəcəyi barədə qərara gəlmədiyini deyib.
Bu açıqlama Naxçıvan klanında ciddi təşviş doğurub. Klanın başında duran Prezident Administrasiyasının (PA) rəhbəri Ramiz Mehdiyevlə fövqəladə hallar naziri Kəmaləddin Heydərov düşünür ki, Ilham Əliyevin bu qeyri-müəyyənliyi hakimiyyəti Mehriban Əliyevanın timsalında iqtidardakı Bakı-Şirvan klanına təslim etmək yönündə atılmış ilk addımdır. Bu baxımdan Naxçıvan klanı tərəfdən Ilham Əliyevə təzyiqlərə başlanıldı. Bu klana yaxın bəzi YAP-çı deputatların "YAP-ın namizədi Ilham Əliyevdir” şəklində bəyanatlar səsləndirməsi dediklərimizə misal ola bilər.
Dünən əldə olunan məlumata görə, Ramiz Mehdiyev yaxın vaxtlarda YAP-ın qurultayının keçirilməsini planlaşdırır. Səbəb Ilham Əliyevin 2013-cü il prezident seçkisi ilə bağlı qəti mövqeyini bilməkdir. Istər-istəməz ölkə başçısı qurultayda bu məsələyə münasibət bildirməlidir. Çünki partiyanın qarşısında duran başlıca vəzifələrdən biri budur. Ən azı Naxçıvan klanı üçün Ilham Əliyevin növbəti seçki barədə nə düşündüyü tam aydın ola bilər.
Artıq YAP-ın rayon təşkilatlarında konfranslara start verilib. "Yeni Azərbaycan” qəzetinin dünənki sayı yerli təşkilatların konfranslarından hazırlanmış xəbərlərlə bəzədilib. Maraqlıdır ki, bütün konfranslarda Ilham Əliyevə müraciət hazırlanacağı bildirilir. Müraciətin mətni açıqlanmasa da, ehtimal olunur ki, bu, YAP-ın 2013-cü ildə ölkə başçısını vahid namizəd kimi görməsilə bağlıdır (Azadlıq Qəzeti).
