Главная » 2012»Май»21 » Müxalifət Bakının mərkəzində mitinq keçirib (video)
17:38
Müxalifət Bakının mərkəzində mitinq keçirib (video)
Bu gün yüzlərlə müxalifət fəalı Bakının mərkəzində etiraz aksiyası keçirib.
İctimai Palatanın fəalları "Xaqani” Ticarət Mərkəzinin qarşısında toplaşaraq Fəvvarələr Meydanına doğru yürüş ediblər. Onlar "Azadlıq!”, "İstefa!”, "Korrupsiyaya yox!” şüarlarını səsləndirərək bir neçə dövrə vurduqdan sonra Sabir bağına yollanıblar. Burada yürüşçülərlə polis arasında toqquşma baş verib. Polis onları uzun müddət saxlaya və vəziyyətə nəzarəti əlinə ala bilməyib. Yalnız xüsusi təyinatlı dəstənin gəlişindən sonra vəziyyət dəyişib.
Nəticədə onlarla adam saxlanılıb. Paytaxtın digər yerlərində də müxalifətçi qrupların spontan yürüşləri keçirilib. Bütün bunlar "Eurovision” müsabiqəsini işıqlandırmaq üçün Bakıya gələn çoxsaylı xarici jurnalistlərin gözləri qarşısında baş verir.
Digər bir yürüş isə Konstitusiya Məhkəməsinin binası tərəfdən Əziz Əliyev küçəsi ilə dənizkənarı bulvara doğru olub. Xüsusi təyinatlı polis dəstələri Kukla Teatrının qarşısındakı bağda yürüşçüləri saxlayıb. Polislər zorakılıq tətbiq edərək onlarla adamı saxlayıblar. Saxlanılanlar avtobuslara əyləşdirilərək Səbayel rayon polis bölməsinə aparılıb. Bir qadın möhkəm döyülüb, o yerə yıxılaraq huşunu itirib.
