Главная » 2012»Июнь»22 » Müsavat Partiyası Hilal Məmmədova azadlıq tələb etdi
15:58
Müsavat Partiyası Hilal Məmmədova azadlıq tələb etdi
Müsavat Partiyası İyunun 21-də hüquq müdafiəçisi, "Tolişo sado” qəzetinin baş redaktoru Hilal Məmmədov narkotik maddələrin saxlanılmasında şübhəli bilinərək hüquq-mühafizə orqanları tərəfindən saxlanılması ilə bağlı bəyanat verib. Bəyanatda deyilir:
"Bir neçə saat ailəsinə xəbər verilmədən saxlanılan və vəkilsiz dindirilən Hilal Məmmədovun evində axşam saatlarında axtarış aparılıb. Bütün hüquqi prosedur qaydalarının pozulması ilə aparılan axtarışdan sonra guya evində də narkotik tapıldığı bəyan edilib.
Hilal Məmmədov uzun müddətdir ki, ölkəmizdə vətəndaş cəmiyyətinin və hüquqi dövlətin formalaşması, insan hüquq və azadlıqlarının müdafiəsi, vətəndaşlarımızın ictimai-siyasi maariflənməsi uğrunda fəaliyyət göstərir. Riyaziyyatçı alim olan Hilal Məmmədov eləcə də, talış xalqının tarixinin, dilinin və ədəbiyyatının tədqiqi və populyarlaşdırılması istiqamətində bir çox elmi və publisistik məqalələri ilə tanınıb.
Qeyd edək ki, bundan öncə də "Tolişo sado” qəzetinin əvvəlki baş redaktoru, linqvist alim, professor Novruzəli Məmmədov şərlənərək həbs olunmuş, İran lehinə casusluqda ittiham olunaraq 10 il müddətinə azadlıqdan məhrum edilmiş, bir müddət sonra isə həbsdə vəfat etmişdir. N.Məmmədovun ailəsinə qarşı aparılan repressiya nəticəsində iki övladı da vəfat etmişdir. O zaman Novruzəli Məmmədovun və ailəsinin hüquqlarının müdafiə komitəsinə də məhz Hilal Məmmədov rəhbərlik etmişdir.
Müsavat Partiyası baş verən hadisəni vətəndaş fəallığına qarşı yönəlmiş repressiya kimi qiymətləndirərək qəti şəkildə pisləyir, mövcud iqtidardan insan hüquq və azadlıqlarına, eləcə də milli hüquqlara hörmətlə yanaşılmasını, Hilal Məmmədovun dərhal azad edilməsini tələb edir. Partiya bəyan edir ki, siyasi baxışlarına və vətəndaş mövqeyinə görə cəzalandırılan hər bir kəs kimi Hilal Məmmədovun da hüquqlarının müdafiəsi istiqamətində atılan bütün addımlara dəstək verəcək”.
