 Dünyanın ən böyük gəmiçilik şirkətlərindən biri olan "Palmali”nin sahibi Mübariz Mənsimov Rusiyanın "Kommersant” qəzetinə geniş müsahibə verib. O, şirkətinin biznes fəaliyyətindən, Rusiyadakı seçkilərdən, Türkiyədə media biznesinə yatırım qoymasından və siyasi ambisiyalarının olub-olmamasından danışıb.
M.Mənsimov deyib ki, onun şirkətinin biznes dövriyyəsi ötən il daha da artıb, şirkət neft məhsullarının daşınması həcmini 1.5 dəfə artıraraq 6.5 milyon tona çatdırıb.
Xatırladaq ki, "Palmali” şirkətlər qrupu Aralıq dənizi, Xəzər və Qara dənizlərdə yüklərin daşınması üzrə ixtisaslaşıb. O, ARDNŞ-in və Rusiyanın "LUKoyl” şirkətinin cənub istiqaməti üzrə baş daşımaçısıdır.
M.Mənsimov deyib ki, "Palmali”nin Rusiyada daşımaları da ötən il 15 faiz artıb. Ancaq bu artım əsasən Türkmənistan və Qazaxıstandan daşınan neftin hesabına baş verib. Rusiyanın daxili bazarında isə "Palmali”nin vəziyyəti stabildir. "Bizim ”LUKoyl" və "Russneft”lə uzunmüddətli müqavilələrimiz var. Ayda orta hesabla 250 min ton neft daşıyırıq. Lakin mən görürəm ki, Rusiyada donanmanın gücü çatandan çox yük potensialı var. Problem köhnələn gəmi donanmasındadır. Hansı ki, beş il əvvələ qədər neft şirkətləri onlardan istifadə etməyə hazır idi. Ancaq indi köhnə gəmilərlə yük daşımağa sifariş vermirlər və risk götürmək istəmirlər. Çünki başa düşürlər ki, 4 min ton yük daşıyan neft tankeri qəzaya uğrasa bunun nəticələri necə olacaq. Köhnə gəmilər tədricən "metallom”a gedir, ancaq yeni gəmilər də o qədər çox deyil. Ona görə də bazarda defisit yaranıb" deyə biznesmen bildirib. M.Mənsimov qeyd edib ki, "Palmali” şirkətinin gəmilərinin böyük əksəriyyəti yenidir və şirkət bu gəmilərin sayını ilbəil artırır.
M.Mənsimov deyib ki, ötən il onlar Volqoqrad gəmi zavoduna 10 yeni tanker sifariş versələr də sifariş yerinə yetirilmədi və indi müqaviləni pozub "Krasnoe Sormovo” zavodu ilə yeni müqavilə bağlayacaqlar. "Palmali”nin tankerlərinin əksəriyyəti məhz bu zavodda yığılır. M.Mənsimov bildirib ki, bu zavodda yığılan tankerlərin biri onlara 19 milyon dollara başa gəlir. Türkiyə tərsanələrində isə belə gəmini 14 milyona sifariş vermək olar. Biznesmen "Palmali”nin gəmilərində işləyən dənizçilərin maaşları barədə də danışıb. Deyib ki, minimal maaş 2 min dollardan çoxdur. Gəmi kapitanları isə 3-4 min dollar alır. İritonnajlı tankerlərin kapitanlarının maaşları isə ayda 12-14 min dollara çatır.
 Biznesmen deyib ki, "Palmali” şirkətlər qrupunun gəmiçilikdən başqa biznes-aviasiya, kommersiya təyinatlı daşınmaz əmlak, hotel biznesi və digər fəaliyyət sahələri də var: "Bizim Rusiyanın bir sıra regionlarında kommersiya təyinatlı daşınmaz əmlakımız var. Hazırda Moskvada bir neçə hotel açmaq üçün danışıqlar aparırıq. Həmçinin bizim Türkiyə və Azərbaycanda beşulduzlu butik-otellərimiz var, təxminən 100 otaqdan ibarət”. M.Mənsimov üç il əvvəl hava yükdaşımaları biznesinə də girişdiyini, bir neçə yük təyyarəsi aldığını, lakin bu sahədən çəkildiyini də açıqlayıb: "Bu bizim seqment deyil, mən bir daha bu sahəyə girmərəm. Məlum oldu ki, bu sahə çox korrupsiyalaşıb və ağırdır. Baxmayaraq ki, texniki baxımdan gəmiçilikdən daha asandır”. İş adamı son illər Türkiyədə bir neçə media-aktiv almasının səbəbləri barədə də danışıb. Deyib ki, bunda hansısa siyasi motivlər yoxdur. "Biz radiostansiya, telekanal almışıq, hazırda daha bir telekanal açırıq. ”Palmali"nin bzinesdən başqa heç bir ambisiyaları yoxdur. Şirkətin sahibi mənəm, mənim isə heç bir siyasi ambisiyam mövcud deyil, ona görə də bu aktivləri hansısa başqa məqsədlər üçün istifadə etmək marağı yoxdur" deyə, o bildirib.
M.Mənsimov deyib ki, son qiymətləndirmələrə görə, onun şirkətlər qrupunun bazar qiyməti 6-7 milyard dollar arasında dəyişir. O, Rusiyadakı siyasi vəziyyət və biznes mühiti barədə də sualı cavablandırıb. Deyib ki, ötən ilin dekabrında keçirilən Duma seçkilərini tam demokratik sayır: "Hakim partiyanın dəstəyi azalıb, lakin əvvəlki kimi çoxluğa sahibdir. Seçkilərdən sonra insanların küçələrə çıxıb öz mövqelərini ifadə etməsi də normaldır. Hər kəsin buna haqqı var. 2000-ci ildən sonra Rusiyada yaranan sistem Avropa ölkələrindən fərqli olaraq onun stabil olmasına imkan verir. Mən bu gün Rusiyada biznesimi sıfırdan qura bilərəm. Bütün mürəkkəbliklərə baxmayaraq, şərtlər əvvəlkindən daha yaxşıdır”.
TALISH.ORG
|
