Hilal Məmmədov
(Tələbə və gənclərə zindandan xitab)
5 il öncə, “Müəllimlər Günü” münasibətilə Hilal Məmmədovun tələbə və gənclərə zindandan ünvanladığı “MÜƏLLİM ZİNDANDA DA MÜƏLLİMDİR...” adlı xitabının bu gün də aktuallığını nəzərə alaraq, saytımızda dərc edirik...
Əziz tələbə və gənc dostlar!
Yəqin ki, heç yuxunuza belə girməzdi ki, bir gün zindandan sizə səslənəcəyik: axı, heç ağlınıza belə sığışdıra bilməzdiniz ki, həyatını elmə, təhsilə, ədəb və əxlaqın təbliğinə; insan haqlarının qorunmasına; xalqlar və ölkələrarası əlaqələrin xoşməramlı tərəqqisinə; ölkəsinin və xalqlarının azad, xoşbəxt və demokratik gələcəyinə həsr etmiş bir pedaqoq-alimin, hüquq müdafiəçisinin, jurnalistin cibinə narkotika atıb onu “narkobaronluqda” ittiham edəcəklər…
Odur ki, istər sizin, istər ölkəmizdəki və xaricdəki minlərlə azadfikirli insanların Azərbaycan hakimiyyətinin bu açıq-aşkar “narkobaronluq” şərinə qarşı kəskin etirazını görən sifarişçilər cəmiyyəti yeni uydurma iddialarıyla çaşdırmağa cəhd etdilər: digər xalqlara münasibətdə olduğu kimi, öz milli-etnik mənşəyinə də hörmət və məhəbbətlə yanaşıb talışların milli-mədəni tərəqqisinə, İran İslam Respublikasında və digər ölkələrdə yaşayan soydaşları ilə xoşməramlı təmasına həmişə şəffaf fəaliyyəti ilə yanaşan bir millətsevərə “dövlətə xəyanət” və “milli-dini ayrı-seçkilik salma” kimi daha iki cəfəng və absurd ittihamları irəli sürdülər...
Əziz dostlar! Şübhə etmirik ki, zərrə qədər sağlam məntiqi təfəkkürə malik hər kəs kimi, siz də bu üç ittihamın biri-birilə uyuşmadığını və hətta necə ziddiyyət təşkil etdiyini anladınız: axı, hər hansı bir xarici dövlətə işləyən casusun həm “narkobaron”, həm də hakimiyyətinə müxalif mövgedə durması bəşər ağlına sığışmayan absurd bir cəfəngiyyatdır...
Əlbəttə ki, ilk təlim-tərbiyə ocağı sayılan uşaq bağçasından tutmuş, orta ümumtəhsil və ali təhsil məktəbləri və elm müəssisələrinəcən rüşvət və korrupsiyanın tüğyan etdiyi bir məmləkətdə belə absurdların mövcudluğu da təəccüb yarada bilməz,-Siz ölkəmizdəki ictimai-siyasi durumun, o cümlədən, hüquq mühafizə orqanlarındakı real qüsurlu vəziyyətin nə qədər ağır və fəlakətli olduğunun bir daha şahidi oldunuz...
Əziz tələbə və gənc dostlar! Bir qisminizin kifayət qədər yaxşı tanıdığı müəllimi kimi, əminik ki, kimliyimizi də unutmamısınız: həbs edildiyimiz son günəcən, öz yaşam və davranışımızla bir vaxtlar mövcud olmuş pak müəllim imicini cəmiyyətə qaytarmaq naminə əlimizdən gələni əsirgəməmiş, -bir vaxtlar “Müəllim çörək yemir!” inancına sadiq qalaraq, sizin qarşınızda özümüzü həmişə mənən və cismən tox göstərməyə çalışmışdıq... Mühazirə vaxtı bir tələbənin,- “Müəllim, siz lap “bizim Cəbiş müəllimi” (eyni adlı filmdəki Cəbiş müəəllimin obrazını.,H.M.) xatırladırsınız...”,- sözlərinə verdiyimiz - “amma Cəbiş müəllimdən bircə əlavə fərqimiz də var ki, biz həm də “Rus Əhməd”ik (“Dəli Kür” filmindəki məhşur inqilabçı personaj.,H.M.), - sizin sabahkı xoşbəxt gələcəyiniz naminə “Sibirə və hətta qəbirə” də getməyə hazırıq...”, cavabımızı da yəqin ki bir çoxunuz unutmamısınız...
Əziz tələbə və gənc dostlarımız! İnanın ki, bu gün, bu qədər haqsız zindan məşəqqətlərinə düçar olsaq da qətiyyən ruhdan düşməmiş, əksinə, öz müəllimlik fəaliyyətimizi zindanda da davam etdirməkdəyik: fürsət var ikən,nəinki bir çox azğın məhbuslarla, o cümlədən, rastlaşdığımız hüquq-mühafizə işçiləri ilə də haqq-ədalət, azadlıq,din, ədəb-əxlaq, insan haqları və i.a. mövzularda maarifləndirici söhbətlər edir, onları da HAQQ yola dəvət edirik... Axı müəllim zindanda da müəllimdir...
Bu yaxınlarda həbs vaxtı cibimizdən çıxartdıqları fleş-kartımızı ekspertizaya göndərib, orada aşkarladıqları bir yazını (digəri saxta idi) cinayət işinə əlavə etdiklərini biləndə xeyli sevindim. Yeri gəlmişkən, hər birinizə həmin - “Bakı Biznes Universitetini tərk etməyimlə bağlı tələbə və gənclər qarşısında bəzi açıqlamalarım və tövsiyələrim”
(http://www.talish.org/news/baki_biznes_universitetini_t_rk_etm_yiml_bagli_olaraq_t_l_b_v_g_ncl_r_qarsisinda_b_zi_aciqlamalar_v_tovsiyy_l_r/2012-04-04-995)
adlı yazımızı tapıb bir daha oxumanızı tövsiyə edirik. Hesab edin ki, bu gün sizə ünvanladığım bu “Zindan xitabımız” da məhz həmin “Azadlıq xitabımıza” kiçik bir sözardı idi...
Bəşəriyyətin, o cümlədən, ölkəmizin sabahkı səadətli gələcəyi naminə mübarizədə hər birinizə Allahdan xeyir-dua diləyirik... Allah sizi qorusun! Amin!
Kürdəxanı təcridxanası
