Elçin Namazov: «Namaz qılan və oruc tutan adamı adi saatı bilməyə imkan vermirlər»
Bu il avqustun 11-də həbs edilmiş islam-azeri.az Internet qəzetinin baş redaktoru Ramin Bayramov MTN-də ifadə verməkdən və digər istintaq hərəkətlərində iştirakdan imtina edib. Bu barədə "Turan”a vəkil Elçin Namazov bildirib.
Onun sözlərinə görə, buna səbəb MTN-in səlahiyyətlərini aşmasıdır. "Cinayət Məcəlləsinin 228.1-ci və 234.1-ci maddələri ilə istintaq aparmaq səlahiyyəti Daxili Işlər Nazirliyinə verilib. Buna baxmayaraq, R.Bayramovun bu maddələrlə ittiham olunmasına dair cinayət işi hələ də MTN-də aparılır. Biz işin aidiyyəti üzrə göndərilməsi barədə vəsatət vermişik. Lakin həmin vəsatətin verilməsindən 4 gün ötməsinə baxmayaraq, hələ də cavab almamışıq.
Halbuki, qanunun tələbinə görə, vəsatətə 48 saat ərzində baxılmalıdır. Bu özbaşınalıq barədə Baş Prokurorluğun nümayəndəsi ilə söhbətimiz olub. Nümayəndə söz verib ki, bu barədə rəhbərliyə məruzə edəcək. Lakin həmin məruzədən də heç nə əldə olunmayıb. Sonda bu qərara gəldik ki, istintaqda iştirakdan imtina edək. Bununla bağlı rəsmən istintaqa məlumat vermişik”, - deyə vəkil bildirib.
O, R.Bayramovun səhhətində ciddi problemlərin yarandığını deyib: "Ramin Bayramov hazırda qanazlığından və davamlı başgicəllənmələrindən əziyyət çəkir. Təcridxana onun bu vəziyyətinə laqeydlik nümayiş etdirir".
Onun sözlərinə görə, Bayramova qarşı yaradılmış ən ciddi problemlərdən biri də onun saatla təmin edilməməsidir: "Dəfələrlə müraciət edərək, bildirmişik ki, Bayramov namaz qılan və oruc tutan adamdır. O, təcridxana şəraitində saxlandığı üçün nə namazın, nə də orucun vaxtını bilir. Buna görə də ona adi plastik saat vermək istəyirdik. Lakin təcridxanadan bildirildi ki, buna imkan verilməyəcək. Daha sonra xahiş etdik ki, heç olmasa Bayramovun saxlandığı kameranın qarşısına saat asılsın ki, vaxtı bilsin. Lakin buna da imkan verilməyəcəyi deyildi. Hesab edirik ki, bu, vicdan azadlığının bilərəkdən pozulmasıdır”.
E.Namazov qeyd edib ki, istintaq tərəfindən yol verilən özbaşınalıqlar və Bayramovun üzləşdiyi problemlərlə bağlı müraciət hazırlayır. "Müraciət yerli və beynəlxalq jurnalist təşkilatlarına, insan haqlarını müdafiə edən təşkilatlara və Azərbaycandakı diplomatik nümayəndəliklərə ünvanlanıb. Müdafiə tərəfi ciddi dəstəyə ehtiyac duyur. Ümid edirik ki, müraciətimizə müsbət yanaşılacaq”, - deyə o, vurğulayıb. Xatırladaq ki, Ramin Bayramov odlu silah və narkotik vasitələr saxlamaqda ittiham olunur.
