 Milli Təhlükəsizlik Nazirliyi bu il yanvarın sonlarından fevralın 20-nə qədər həbs edilmiş 22 ölkə sakininin Azərbaycanda əcnəbilərə qarşı terror aktları hazırlayan İran agentliyinin üzvləri olduğunu elan edib.
MTN-in bəyanatında deyilir ki, sözügedən şəxslər casusluq və digər ağır cinayətlərə hazırlıqla dövlətə xəyanətdə ittiham olunurlar. Azərbaycan vətəndaşları Niyazi Kərimov, Mübariz Əliyev, Elman Tağıyev, Nüsrət Cəlilov, Rəhim Qasımov, Məmmədtağı Zəkiyev, Bəhram Həşimov, Ayaz Abbasov, Əfqan Abbasov, Şahin Məmmədov, Mirələsgər Ağayev, Rövşən Zülfüqarov, Həmidağa Ələkbərov, Seymur Qasımov, Taleh Rəsulov, Ceyhun Həbibov, Elmin Kərimov, Zahid Məmmədov və digərləri "İslam İnqilabının Mühafizəçiləri Korpusu” – "SEPAH”ın əməkdaşları tərəfindən məxfi əməkdaşlığa cəlb olunublar.
MTN-nin bəyanatında deyilir: "Onlara Azərbaycanın dövlət təhlükəsizliyinin əleyhinə istifadə oluna biləcək məlumatlar toplamaq və "Sepah”la əməkdaşlığa hazır olan insanlar tapmaq tapşırılıb.
Əsas rollardan birini Nardaran sakini Niyazi Kərimov oynayırdı. O, hələ 1999-cu ildə Məşhəd şəhərində "Sepah” əməkdaşı Əkbər Pakraveş tərəfindən cəlb edilib. Sonuncu Kərimova Bakı şəhərində fəaliyyət göstərən ABŞ, İsrail və Qərb dövlətlərinin səfirlikləri, nümayəndəlikləri və təşkilatlarının əməkdaşlarına qarşı terror-təxribat aksiyalarının həyata keçirilməsi məqsədilə xüsusi hərbi təlimlərə cəlb olunmaları üçün Azərbaycan Respublikasının vətəndaşları sırasından münasib şəxsləri taparaq "Sepah”ın əlaqəsinə verməyi tapşırıb.
Həmin andan etibarən 2011-ci ilə qədər Kərimov dəfələrlə İrana gedib, orada "Sepah” nümayəndələrindən tapşırıq və pul alıb. İran tərəfin tapşırıqları əsasında Kərimov 15-dən çox insanı İran tərəfin əlaqəsinə verib. Bu qrup daha çox dini ziyarətlər adı altında İrana səfər edib. Məxfi mənzillərdə görüş zamanı "Sepah” nümayəndələri Azərbaycan vətəndaşlarını qərb ölkələri və İsrailin nümayəndəliklərinə və vətəndaşlarına qarşı terror aktları törətmək üçün hazırlayırdılar.
Sonradan adları qeyd olunan Azərbaycan Respublikasının vətəndaşları Tehran və Kərəc şəhərlərinin yaxınlığında yerləşən hərbi düşərgələrdə xüsusi hərbi təlimlər keçib.
Təlimlər başa çatdıqdan sonra "SEPAH”ın əməkdaşları həmin Azərbaycan vətəndaşlarından məxfi əməkdaşlıq barədə iltizam alıb və hər birinə təxəllüs verilib.
Onlara dövlət sirri olan məlumatları toplamaq və Gürcüstan vətəndaşlarının İranla əməkdaşlığa cəlb etmək tapşırığı verilib.
Sonralar "Sepah” nümayəndələri bu qrupun üzvləri ilə müxtəlif ölkələrdə görüşlər keçirmiş, onlara tapşırıqlar və təlimatlar vermişdir.
İranlıların İsrailin "Soxnut” təşkilatına, BP şirkətinə, American Fast Food restoranına və xarici ölkələrin diplomatik missiyalarına qarşı terror aktları planlaşdırdıqları müəyyən olunub. Bu məqsədlə qrup üzvlərinə silah və xüsusi vasitələr göndərilib. Həbs edilənlərdən bir neçə avtomat, tapança, snayper tüfəngi, qumbaraatan, güllələr, qumbaralar, trotil şaşkalar, detonatorlar müsadirə edilib.
Faktla bağlı MTN CM-in 274 (dövlətə xəyanət) və 228.2.1 (qanunsuz silah saxlama) maddələri ilə cinayət işi açıb".
Sonda MTN xatırladır ki, İran xüsusi xidmət orqanları ilə əməkdaşlığa cəlb edildikləri barədə könüllü surətdə məlumat verən şəxslər məsuliyyətə cəlb edilmir.
Qeyd edək ki, bu, son vaxtlar Azərbaycanda İran xüsusi xidmət orqanları ilə əməkdaşlıqda ittiham edilərək həbs olunan birinci qrup deyil.
|
