Iştirak əkon Əğəpı, Şinənoz, Şitənqi
I şəkil (Şinənoz, Əğəpı)
(Vaqe bedə ali məktəbi dəhlizədə)
- Əğəpı, Əğəpı, bımand hələ.
-Çiçe, Şinənoz, tıledəş, nəfəsı emandə. Səhətən ıştı?
-Çımı səhətəkəs hejo tıniş. Zə, şəyton, ə çiçe votə çımı həxədə? Zə, az kəynə nəvəm de zoə- də zoə? Bə rujon nəvedəm boğonədə, diyo kənoədə de zoon dımmaçone kardedəm. Bə şəvon kinozalonədə, anfiteatronədə xəlqi merdon vanqonədəm? Hay?
-Şinənoz, Şinənoz, az hiç jıqo sıxanon bəvotem? Im sıxanon bə çımı bı qəvi damame? In qəv lol bıbu, kəlmə sıxan kardey nızını. Bə iqlə Xıdo ğəssəm bıbu, bə i həzo visti ço peyğəmbəri, bə çordə məsumi, bə İmom Huseyni ğəssəm bıbu, az jəqo sıxanon kardəmni ıştı həxədə, lap hiç kəsi barədə!
- Zə, tı çekonə votəni, ısət omedəm de Şitənqi didorədə, əy bəmı votışe ki, Şinənoz, həni çəməki əğətni. Ə sıxanon ki, ıştı həxədə bəmı Əğəpı votəşe, həni bəy şək nime. Çiç votəşe, həx votəşe, az bəy deştə dı çəşi bovə kardedəm.
-Şitənqi votışe ki, ıştı həxədə ə sıxanon az votəme?
- Haəni, Şitənqi votışe ki, ə mırdolə sıxanon, ə bıhtonə kəlimon tı votə çımı həxədə. Boçi votə, zə, ısə bətosnem tıni. Çiç kardəme bətı, çe bevəcim bıə bətı. İ rayonijimon, i xəlqi odəmimon, i zıvoni bınovonimon, tolışimon. Otırnoş, qasbuən i nəslədəmon, i coni vəsləmon. Tı bəpe çımı həxədə jəqo bıhtonə sıxanon boçi bıvoti?!
-Kinə, bə rəhmətşə nənəm qur, bə dədəm qur, bə comərdə pəm con, bə əzizə moəm con, bə cıvonə boəm con, bə xosə hovəm con, bə ım şinə con ğəssəm bıbu, az çə sıxanon xəbə nime. Bovə bıkə, kinə tı mısılmon niş? Kinə, mıni ısət zınedəş? Isə dı kurse ivrədə handedəmon. Məsə ki, çe ki həxədə tosə ısə qıləy vılisə ziyodə sıxan votəme? Kinə, çımı qəvədə bo i kəsi jıqo sıxan kəynə beşə ki, ısət ıştı həxədə bıvotım?
- Zə, ə Şitənqi axməx bıə, cındo bıə, ya detı arəş ni, ya tı bəy qıləy bevəci kardə, şımə arədə çiçbə ki, iberdəmə ıştı zıvonədə bəmı jıqo bıhtonon, mırdolə sıxanon kardedə? Şımə oxo dustbin deyəndı, Ğəbul imtohoni vaxtonku yəndı zınedon, deyəndı dustəti kardedon. Votedəş ım sıxanon bıhtonin, mandə vırədə, hiç nıbe-nıbe əv ıştı zıvono jıqo kəlimon boçi bəpe bıvoti? Şımə arədə jı çi bıə ki?
- Şinənoz, ıştən zınedəş ki, az ve vaxte ki, şımə dimi-dido kardeyku xəbə hestıme.
-Ha, zınedəm, dəy oşnə bıə dəvardə i manqədə dı-se bəjən bı həxədə de xoş əhvoli qəpən jəmone. Şitənqiən har dəfə demı didor kardeədə, tıni mıku xəbə səydə, səlom-dıvo vığandedə, azən omedəm bətı rosnedəm. Hejo ıştı çokətiku qəp jəydə, tıni tarif kardedə, xoşə xatiron qəp jəydə. Bəs çekonə bedə, ısət ıştı zıvono bə çımı ədres mırdolə sıxanon votedə?
-Kinə, votey əbıni az dəy dustəti kardedəm, dəy con-ğəlbədə imon, hətta votey əbıni yəndı çok zınedəmon. Votedəş i manqe detı oşnə bıə, əmma əv bı dəvardə haftədə oməy pəydo be çımı tono, ğəbul imtohoniku jıqo hiç yəndı vindəmon nıbe. Həminə ruj ıştı dumo oməbe, koridorədə vindışe mı, oməy nez be...
(səhnə qardedə, i haftə bənav bıə hadisə nişo doydə)
II şəkil (Şitənqi, Əğəpı)
(Vaqe bedə ujən universiteti dəhlizədə)
- Həmro Əğəpı, i dəğə şıməni norohət kardey bəbe?
- Boçi əbıni? Aha, Şitənqi, Şitənqi, səlomməleyk, kanə həmro. Tıni yodo bekarde bəbe? Bə ğəbul imtohon oməbimon. Dıqlə lodə-kosibə hırdənbimon. Deyəndı oşnə bımon. Məlum be ki, dıkəsən Tolışə maholo oməmon: tı Vərqəduzo, az Masallio. Lap nezə diyonədə jiyedəmonbən, yəndıku bexəbə.
Dıvanqonə qətımone yəndı. Dəmə bə imtohon omə-əməni muşayət kardə boliyonən deyəndı dimi-dido kardışone. İmtohoni bənav bıə sohbətədə məlum be ki, az be şparqalka dəbəşem bə imtohon, çımı bıvə, ıştı bıvə ve dəhət bin ki, jəqo məkə, əmma az ıştə votə kardıme. Iştı bıvəən tınış omujən karde bəmı, votışe” “çe Əğəpıku co məbiş, əy çiç nıvışte, tınən ovoştıniş bıştəno, Roste?
-Poste, roste. İdomə az qəp bıjənım: İnşa nıvıştey imtohonbe. Sinfi miyonə partonədə deyəndı qitə nıştimon, tı bino karde Səməd Vurğuni “Komsomol” poemaku nıvıştey, azən rohət ovoştınedəbim ıştıku. Zolımə muəllim oməy de rıki pekardışe tı, votışe: “Bəşt çiyo bışi lap dumuttono bınışt, əyo inşa dəvom bıkə, de zoə,(yənı demı) koy məbi, bıdə ıştən bınıvışti. Çekomco bənıvıştim, ji çi zınedəbim ki, bənıvıştimən? Ləzi bədiqə vərəqon təhvil dome, beşim bə bi.
-Çə vaxtiku dı-se bəjən avtobusonədə yəndı vindəmone, diyəro bə diyəro hol-əhvol qətəmone. Zınedəm ki, zavodonədə qıləyədə ko kardedəş.
-Ha, bəli, Sərdarov zəvodədə operator ko kardedəm. Harsor hozı bedəm, cəhd kardedəm bə ali məktəb dəşum, dəşe zınedənim. Bəxtım obedəni ki, obedəni.
-Bəs iyo çiç kardedəş?
-De şımə eyni kursədə qıləy kinə heste, Şinənoz, i manq bəbe dəy didor kardedəm. Zınedənıbim tı dəy ico handedon, i rayonıjiyon, zınəşe ki, az Vərqəduzovıjim, Şinənozi bomı qəp jəşe ki, dəy qıləy rayonıjən handedə, çəy nom Əğəpı. Votem: “Ha, az əy çok zınedəm, çımıku bəy səlom bıbəyş. De Şinənozi anə ıştıku sohbət kardəmone, ıştı həxədə lap ve çiyon omutəme. Həmən dərəsəym ki, Şinənoz tıni ciddiə hırdən zınedə, etibo kardedə bətı, hıı, jəqoy?
- Rost votedə, i rayonıjimon, əmma co-co diyədə jiyedəmon. İyo bəyəndı bələd bimon.
-Əğəpı, rosti bıvot, du məvot, Şinənoz ıştə dimi toşedə?
-Yəni bənə zoə xəyləğe dim toşedə?
-Zə, tı dığət kardəni? Harruj dim toşedə.
-Valla, fik doəmni. Ha çiç bıbu ısə. Kinon veyni ıştə dimi muon de toği pevatedən, xususi usul heste. Bəştə fik doə kinəy, tankardemon, vid-fəson, poyemon, qəpemon... səliğə-səhmonə moynəy. Bə ivrə şedəmon bə Universiteti jimonxonə, əv bə kinon jimonxonə, az bə zoon jimonxonə. Piyodəən, de avtobusiən şəmon, hiç noduzə hərəkət vindəmni çəyku.
-Çe əcəb, dəy nınəviş? Jıqo əy tarif kardedəş!
-Çiçbe, rıvniye? Toxtə bıbi. Az deştə divojə kinə bə pəvəndimon, Şinənozən zınedə, vindəşe.
Çekonə be də Şinənozi oşnə biyon?
- Hiç, təsadufən, avtobusədə vindıme əv, eqınim dumu əy, oxo ki, ın tolışə kinə bə moyə tıkə oməy. Isə manqi bəbe, dimi-dido kardedəmon.
-Yəğın ıştı iminə savdıye.
-(sıredə) İminə?Bıvot həni çandinə?
-Əv çekonə bedə?
-Omutım bətıəni. De kom zılmi- zəfo kinə dıl ki varde bə dast? Nəvedəş dəy, boği toykiyə kıçonədə, kinoteatri peşonə zılmotə nıştəcoonədə, dast ğandedəş bəçəy tənikə vıron, lıputon, sinə poton, qavzon. Bəjəni jıqo nəvə bəçəton bardəm bəştə mənzıl, demı hıte rozi bedənibu, dəy sə kardedəm, demı hıte rozi bedəbu, diyə kardedəm, kinə benışe, tojnidəm, rədd kardedəm, ya ne kinə beşedə mıddəti dəy nəvedəm, ta ki tojə kinə bə dom eğandıme, kanə qılə tojniedəm, şedə zuze-zuze...
-Isə jıqo çiyedə ki, nubə çe Şinənoziye?
-(sasimə bedə) Ne, ne. Boçi ki? Əv coye. Çəmə zonə moynəye. Detı i rayonıje. Iştıku dəvardey əzınim.
- Şitənqi, bəmı diyəkə. Çekonə bıbu, oxo oməmutem. Hərənqoni bə Şinənozi namusi bıqınoş, ıştəni mardə bızın.
-Ha, ne. Çiç votedəş, zə. Jəqo çi nibəbe, nibəbe...
(hay bə i ton şedən. Pərdə eqınedə. Səhnə qardedə)
III şəkil (Şinənoz, Əğəpı)
(Vaqe bedə ujən 1-nə şəkli vırədə)
-Əğəpı, Əğəpı, oqət, oqət hələ. Az dərəsəym, Şitənqi ə bıhtonon ıştı zıvonədə bəmı boçi votəşe?
-Kinə, oxo jəqo sohbət çımı-çəy arədə bıəni. Az jəqo sıxanon bəy votəmni. Çe curə odəmiş tı?!
-Çok, çok. Sa faiz bovə kardəm ki, tı ə sıxanon votəni, hiç şımə arədə jəqo sohbətən bıəni. Hovsələkə, hovsələkə.Votedəm, az dərəsəym ki, boçi ıştı nomədə ə sıxanon rosniyəşe bəmı?
-Boçi?
- Tı ki bəy votə bə çımı namusi təcavuz bıko, tı dəy jıqo-jıqo bəkaş. Bə rosti əv həni demı ıştə plani bə vırə rosney əzıni, bə rosti az çəy dastədə səlomət beşedəm, çəy plan bə vırə rəsəni, bə ğərol omə ki, ıştıku xusus bıstəni. Mıni sı bıkəy-bıvğandi ıştı səpe, tıni həmron-odəmon arədə rısvo bıkəm, çımı-ıştı arədə eqıni qıləy deşmenəti. Har məsəkəs tu-lənət bıkə bətı ki, bəştə divojə kinə bais bıə, əv çe pəvəndiku co kardəşe...
-Yəğın ki, məqsədış ımbə. Əmma oxo tı bəy bovə əkəniş, ın hadisə bevuli əkəniş? Jəqoy?
-Zə, haye, ha. Tı vindedəş çəy bıxluzəti, xəbisəti, iblisəti?
-Əv de çımı sıxani ıştıku dast kəşə, ıştə xəbisə planiku diyəro bıə zibil ni. Bəy hukmən qıləy yolə təkon bə ki, ıştıku rədbə.
-Az bıvotıməni çiçbə?
-Çiçbəxo?
-Çekonə əy botı qəp jəşe, deştə navnə “pəvəndion” çiçon kardəşe, bı dəvardə manqədə demıən kardey piyəşe.
-Ne, kinə. Bəs əv votedəbe, detı pok nəvə, bətı dast novniyəşni?
-Rost votedə. Piyəşe, dastışən ğandə, əmma bə nav şey az imkon doəmni. Dəy Boku boğon nunəkilə vıronədəən nıştəm, dəy kinoteatron tyokiyə nıştəconədəən bəm, xəlvətə vıronədəən nəvəm. Bəmı dastən ğandəşe, əmma haştəmni, çəy dast mur doəme dənəme bəşəy qavz. Planış hestbe ın haftə bəçəy mandə kirə kə bəpe bəşimon. Bətı ki, rast omə, tı ki bəy jəqo votə, sasimə bə. Qasbuən tı bəy jıqo votə nəbəy, əv mıni de aldi bəştə mənzıl əbəy, koyi əsoxti. Bəştə orzu nırəsəy. Bıro bətı həddı-bisot dərəcədə təşəkkur kardedəm.
-Əsas ko tı vində. Bəçəy kaprizon cəvob doəni, dəy nezə munasibət haştəni-bıkəy. Çımı bəy hədə-tarsən qıləy vəsilə bıə ki, bətı zor nişo nıdəy, bəyo çok əşıni. Şukur bə Xıdo, jəqo zələməku rəxəyş.
-Deştı koməqəti. Ve səğbi.
-Hələ bahaşt ha, bəmı rosti bıvot. Çekonə bedə, ısətnə devri kinə, ıştənən kəsukə tələbə, çe jıqo pulinə-afiristə zoə vədə tov vardedə, bəştə tənikə vıron dast jəy haştedəni. De vəynə cinsi xəlvətə vıronədə qitə bınışti, ehtirosi çanqədə bə həlokbey dərəcə bırəsi, əmma əməli koy rozi nıbi, çekonə tov vardəbiş, çekonə ıştə intimə hisson tosnidəbiş, momentədə çe xətoku diyəro bedəbiş?
-Zınedəş, tınən çımı boli.( Həni bəsə bolisə yolə koməq karde bəmı, mını çe otəşo roxniye) Xəbə səydəş bə momentonədə az çekonə vaxtədə diyəro bedəbim, hı? Oxo çəmə ersi-adət heste, bəmə jıqo tərbiyə doəşone, kinə ıştə tənıkə vıron vəyə şəvi boştə pəvəndi, boştə kəbinə şuə əmonət bardənine. Azən har bəjən Şitənqi bəmı dast ğandeədə bəy votedəbim: Çımı mubhəmə vıron bəvədə ıştı bəbe ki, az ıştı kəbinədə bəbem, ıştı jen bəbem, ə əmonəton bəvədə ıştı bəbe.
-Bıji tolışə kinə! Boy ıştı çəkutə maç bıkəm! Rozi mandiş çımıku?
-Sa faiz!
-Azən ıştıku!
-Şimon!
-Şimon!
(pərdə eqınedə, pyes orəxedə)
05.07.2017
