Nemət Pənahlı Uğrunda Mübarizə Komitəsinin sədri Miralim Bəhramov yanvarın 24-də azadlığa buraxılıb.
Komitə sədri "Media forum” saytına açıqlamasında deyib ki, onu yanvarın
19-da vəkil Elçin Sadıqovun ofisinin qarşısında həbs ediblər: "Azadlıq”
radiosuna müsahibəmdə demişdim ki, bu ölkədə insanın təhlükəsizliyi
təmin olunmur. İstənilən adama istənilən böhtanı atıb həbsə atmaq
mümkündür. Müsahibəmin səhəri günü dediklərim başıma gəldi.
Həmin gün Nemət Pənahlının qardaşı Səməd Pənahlı ilə görüşəcəkdim. Lakin
Səməd Pənahlının Nəsimi Rayon Polis İdarəsinə izahat verməyə
çağırıldığını eşidib birbaşa onun vəkilinin ofisinə gəldim. İlk vaxt elə
güman ediblər ki, mən birbaşa Səməd bəyin izahat verdiyi Nəsimi rayon
22-ci polis bölməsi qarşısına gəlmişəm və məni orada həbs ediblər.
Vəkilin ofisi Azadlıq prospektində yerləşir. İşi olduğuna görə getmişdi,
onu gözləyirdik. Binanın blokunda dayanıb yoldaşlarla qəzet oxuyurduq.
Bir polis işçisi bloka daxil olub dedi burada nə olub ki, bizi bura
göndəriblər? Qəzet oxuduğumuzu görüb çıxıb getdi.
Bir qədər sonra binanın qarşısında gəzişməyə başladım. Bu zaman bir
nəfər qolumdan yapışdı. Mülki geyimdə idi. Ondan soruşdum ki, qolumu
niyə tutursan, qolumu bir az da bərk sıxdı. Az sonra daha bir neçə nəfər
yaxınlaşdı ki, ağsaqqal, bizimlə getməlisən. Onlar özlərini təqdim
etmədilər, sadəcə hiss etdim ki, polis əməkdaşlarıdır. Məni Nəsimi Rayon
Polis İdarəsinə gətirdilər. Burada yazıb-pozandan sonra Nəsimi Rayon
Məhkəməsinə apardılar və məhkəmənin qərarı ilə 5 sutka inzibatı cəza
kəsildi. Blokda qəzet oxuyarkən içəri daxil olan polis və qolumdan
yapışan mülki geyimli şəxs məhkəmədə ifadə verdilər ki, guya mən onlara
qarşı təzyiq işlətmişəm”.
Miralim Bəhramov deyib ki, həmin gün Nəsimi Rayon Polis İdarəsi yeni
binaya - Bakı Şəhər Baş Polis İdarəsinin keçmiş binasına köçmüşdü: "Mən o
idarənin saxlama kamerasına salınan ilk şəxs oldum. Ümumiyyətlə deyim
ki, əvvəlki dövrlərə nisbətən saxlama təcridxanalarında, kameralarında
vəziyyət o qədər də pis deyil, şərait düzəlib”.
Komitə sədri Nəsimi Rayon Polis İdarəsində Nemət Pənahlının işini
araşdıran müstəntiq Müşfiq Əlməmmədovun qəbulunda olduğunu da deyib:
"Məndən ifadə aldı. Dedi ki, şahid qismində ifadə alıram. Çox sorğu-sual
oldu, amma onlardan bir neçəsinə yazılı cavab verdim. Bu suallar ondan
ibarət idi ki, nə üçün Nemət Pənahlının tutulması faktını
siyasiləşdiririk, nə üçün onu müdafiə edən qurum yaranıb.
İstər müstəntiqlə söhbət zamanı, istərsə də məhkəmədə mən bir şeyi başa
düşdüm - bu ölkədə ya hüquq müdafiəçisinin nə olduğunu bilmirlər, ya da
bilmək istəmirlər. Onlar sual edirdilər ki, niyə məsələni
siyasiləşdirirsiniz. Amma mən hesab edirəm ki, onlar məni həbs etməklə
özləri məsələni siyasiləşdirilər. Hakimiyyət istəmir ki, mən Nemət
Pənahlının hüquqlarını müdafiə edim. Lakin biz öz yolumuzu davam
etdirəcəyik”.
Miralim Bəhramov xalq hərəkatı dövründə AXC Ali Məclisinin üzvü və
Cəlilabad şöbəsinin sədri olub. Sovet hakimiyyəti dövründə 15 ay həbsdə
yatıb. Azadlığın və Sülhün Müdafiəsi Beynəlxalq Hüquq Təşkilatında
Siyasi Məhbusların Hüquqlarının Müdafiə Komitəsinin həmsədridir. Xalq
hərəkatı liderlərindən olan Nemət Pənahlı yanvarın əvvəllərində
xuliqanlıq ittihamı ilə tutulandan sonra Nemət Pənahlı Uğrunda Mübarizə
Komitəsi yaradıb.
