Ve hurmətinə tolışon! Fərqış ni şımə koncojon – Azərbayconədə, ya de tale hukmi çı dınyo kon vırədə jiemon kardəjon! Şıməni həmə de 2013-nə tojə sori dıli-sıxto təbrik kardəm. Orzu kardəm ki, ın tojə sor bo Şımə xeyzonon ruzi-bərəkət, ijənən səlomətəti biə!
Bıdə çı soriku, şımə hırdənon şımə kanədə inə zıvonədə qəp jəy binokan! Çumçıko, bə odəmi rujqar əsıl baxtəvərəti de inə zıvoni omedə! Xosə çımı xalq, dard bəvədəy ki, əmə ve vaxt deştə be məsuliyyətəti ıştə xoşbəxtəti çı dasto doydəmon! Im çı tolışon ən yolə darde! Imsornəku həməvoy bındınəmon, çı dardi navi bıstənəmon! Dı-se sorən dəvardo, həni di bəbe!
Əmə deştə milləti fəxr kardəmon! Bəçəy qorış ki, qıləbəqılə peqəteədə bənə tolışon ğıryətmandə şəxsiyyəton konco hestin!? Bo Tolışi xeyzon ən muqəddəsə kiəye! Boən etiraf bıkəmon ki, bı kiədə bə nənə zıvoni tikəy loqeydətimon heste! In xosyət ısə boy bəmə - bə tolışon hiç damedəni! Boən, in xosyəti çı tojə soriku bınəmon bə kəno!
Dumoədə mandə 2012-nə sori çəmə milləti yodədə kali rizonış haşte. Bı sorədə çəmə xalqi zıvonədə iqlə qəzet bə "Tolışi sədo” qəzeti Sə redaktor, tolışi folklorşunas, çəy mədəniyyəti tədqiq bıkə, sruşinfikə alim, noxəşinə professor Hilal Məmmədov de nohəxə şərijon dənoy bə turmə. Dosə ımrujnə ruj əv hələ zindonədəy!
Çə tərəfoən dəvardə sori hejo bo professor Hilal Məmmədovi huquqon mudafiə karde çəmə Azərbayconi milli mənsıbiyətiku asli nıbə demokratik fikrinə içtimai insonon həmə bə i vırə qırdə ben! İ tərəfoən çı Hilal muəllimi bə turmə eqəte Azərbayconədə milli kosalidasiya ofəyəje! Boən həmə dıvo bıkəmon, çəmə milləti yolə zoə Hilal Məmmədov çı tojə sori sıftədə dustəğətiku ozod bıbu! Xıdo bəy xəşə con bıdə!
2012-nə sori oxiədə çı tolışon həyotədə qıləy yolə hadisə be. Jıqo ki, çəmə milləti kali ruşinfikə insonon qırdə ben bə i vırə - Azərbayconi Devlətəti Nominə Demokratik Tolışə İcoli ofəyəjone. Fik kardəmon ki, ADN DTİ 2013-nə sorədə çı tolışon milli-mədəni, mənəvi irsi omute, həmən çəy inkişafi roədə ıştə yolə töhfon bədo!
Xosə tolışon, çı ADN DTİ İdarə Heyəti nomıoən Şıməni de tojə - 2013-nə sori təbrik kardəm. Bıdə Xıdo Şımə dılo, çı Tolışi məhəbbəti, çı Azərbayconi məhəbbəti hiç vaxt benıka! Xəşəcon bıbən! Xoşbəxt bıbən!
Bəştə xalqi de yolə hurməti, Mehdibəy Səfərov Azərbayconi Devlətəti Nominə Demokratik Tolışə İcoli sədr
