Avropadan Asiyaya gedən rabitə xətti sıradan çıxıb
Masallı Rayon Telekommunikasiya Qovşağında baş verən partlayışla bağlı yeni məlumatlar almışıq. Məlumatlarda bildirilir ki, Rabitə və Informasiya Texnologiyaları naziri Əli Abbasov hadisə yerinə baş çəkəndən sonra qovşağın müdiri Əmanət Əzizovu tutduğu vəzifədən azad edib. Sabiq YAP-çı deputat Vəsatət Əzizovun qardaşı olan Əmanət Əzizov həm də hakim partiyanın Masallı təşkilatının sədridir. Məlumatlara görə, Əmanət Əzizov işdən çıxarılandan sonra Masallının icra başçısı Qəzənfər Ağayev büdcə təşkilatlarının rəhbərləri ilə keçirdiyi toplantıda qovşağın müdirini sərt tənqid edib. Icra başçısı bildirib ki, Əmanət Əzizov vəzifəsinin öhdəsindən gələ bilməyib. Qəzənfər Ağayev, həmçinin YAP-çı müdiri peşəkarları qeyri-peşəkarlarla əvəzləməkdə suçlayıb.
Bu arada Rabitə və Informasiya Texnologiyaları nazirinin müavini Iltimas Məmmədov maraqlı bir açıqlama verib. Iltimas Məmmədov deyib ki, Avropadan Asiyaya gedən rabitə xətti Masallıdan keçir. Nazir müavininin açıqlamasından belə aydın olub ki, əsas güc həmin xəttin bərpasına yönəldilib. Onun sözlərinə görə, artıq bu istiqamətdə bərpa işləri başa çatdırılıb.
Iltimas Məmmədov həmçinin əlavə edib ki, indi əsas vəzifə rayon mərkəzi ilə kəndlər arasında rabitə əlaqəsini bərpa etməkdən ibarətdir. Nazir müavini bildirib ki, yaxın 10 gün ərzində elektron ATS-in fəaliyyəti tam bərpa oluna bilər. "Telekommunikasiya qovşağının işinin təşkili mütəmadi gedəcək. Sadəcə telefon rabitəsinin bərpası işi yaxın 10 gündə başa çatdırılacaq”, - deyə Iltimas Məmmədov vurğulayıb.
"Azadlıq”a daxil olan məlumata görə, rəsmi qurumları narahat edən məsələlərdən biri Avropadan Asiyaya gedən rabitə xəttinin yaddaş blokunun pozulmasıdır. Məlumatlarda bildirilir ki, adətən bu xətdə müəyyən qüsurlar olub və bu zaman danışıqlar yaddaş blokunda qeydə alınmayıb. Indisə partlayış baş verib və yaddaş bloku tamamilə sıradan çıxıb. Onun bərpası olduqca müşkül məsələdir, hətta qeyri-mümkündür də söyləmək olar.
Iltimas Məmmədovun bu açıqlaması rəsmi qurumların hadisə barədə dediklərini alt-üst edir. Nazir müavini bilərəkdən, ya bilməyərəkdən ilginc bir faktı ictimailəşdirməklə olayın "texnogen səbəblərlə” baş verdiyinə şübhələri artırır. Və partlayışın terror aktı olması barədə versiyanı gücləndirir.
Ekspertlər də hesab edir ki, qovşaqda baş verən partlayış "texnogen səbəblər”lə bağlı deyil.
