 Masallı rayon İHB-sı Rafil Hüseynov və onun müavini Seymur Nuriyev Babaser su bəndini özəlləşdiriblər
ƏSSALAMUN-əleykum, ey ADƏM övladları !
Keçən dəfə Masallı rayon İHB- sı Rafil Hüseynovun rayonda söküntü-tikinti adı ilə başladığı korrupsiya və rüşvət məsələlərindən, rayonun mərkəzi küçələrinin bərbad halda olması ilə əlaqədar onu bir balaca sancmışdım. Rafil müəllimin haray-həşirinə hansısa kiçicik işçisi N.Bağırov həmin söhbətə rəy bildirərək, mən ditdilinin kiminsə ovucunda sıxılıb məhv edilməsini xatırlatdı.
Dediklərimin doğruluğuna başqa söz tapmayan İHB-nın qulbeçəsi olan N.Bağırov mənə məsləhət bildi ki, Rafil müəllimin "bəzi idarə müdürlərini gözümçıxdıya salaraq” həmin bərbad halda olan küçələrin hasarlarının tikilməsini də dilə gətirim, gen-bol tərifləyim. Məhz "məhv olmağımdan qorxub”, N.Bağırovun "ultimatumunu” nəzərə alıb, yazının linqində "korrupsiyanın işğal yolu” başlıqlı rubrikaya ötəri ekskurs etdim.
Ay zavallılar, bu bədbəxtlər qanmırlar ki, "Ditdili” kimisə sancmaq istəyəndə onun qorxu hissi olmur, sancıb bir qarın murdar qanınızdan sorandan sonra, doydum deyib, uçub gedir. Acgöz məmurlardan fərqli olaraq, rüşvət almır, kasıbların qanın sovurmur...
Ay canınıza daraşım, xeyli vaxt idi ki, Masallı rayonunun Babaser kənd sakinləri mənimlə dərdləşmək istədiklərini bildirmişdilər. Bu gün vaxt tapıb, hərlənib getdim Babaser kəndinə. KİV-dəki obyektiv çıxışlarımı xatırladan kənd camaatı sanki xilas yollarını mənim kəndə gəlişimdə gördülər.
Demək olar ki, kənd camaatı hamılıqla İHB-sı Rafil Hüseynovun və onun müavini Seymur Nuriyevin qanunsuz əməllərindən, kəndin ərazisində olan "Babaser su bəndi”nin dağıdılmasından söz açdılar. Çıxış edənlər bildirdilər ki, sözügedən su bəndi 1960-cı illərdə yeddi kəndin kənd təsərrüfatı sahələrinin suvarılması və əhalinin mal-qarasının yay vaxtlarında istifadə edilməsi üçün tikilmişdir. SSRİ hökuməti dağıldıqdan sonra bu bənd bələdiyyə mülkiyyətinə keçməsi əvəzinə, "Viləşçay su meliorasiya idarəsinin” balansına keçirilmişdir. Qeyd edim ki, keçmiş sovxoz dövründə kənd rəhbərliyi həmin su bəndinə xeyli miqdarda müxtəlif növ balıq atmışdı. Sakinlərin dediyinə görə, iki ildir ki, qanunsuz olaraq, İHB-nın müavini Seymur Nuriyev həmin bəndin balıqlarını özü üçün satmasına rəhbərlik edir. Sakinlər bunu da bildirdilər ki, hər gün bu bənddən iki-üç ton balıq çıxarılıb aparılması bir yana, kənd camaatına həmin balıqdan bir dənə də olsun pulla satılmır. Söhbət əsnasında bəlli oldu ki, hal-hazırda bənddən çıxarılan balıqların puluna İHB-sı Rafil müəllim də şərikdir. Biz camaatla bəndə gedəndə kəndin rəsmiləri, eləcə də bəndin qanunsuz gözətçiləri əlimdə kamera görüb, bizdən qaçıb uzaqlaşdılar. Mənimlə bəndə gələnlər isə onların torlarına düşən balıqları çıxarıb, aralarında bölüşdülər (mənim də payımı verdilər).
Vallah burda deyiblər də "oğrudan-oğruya halaldır”! Neyləyim?
Ay canınıza daraşım, Vallahi yalan danışa bilmirəm. Ona görə özümə də iki balıq çatmasını deyirəm. Sizcə haramdır, yoxsa halal?!
Bu barədə yerində aparılan vidoe çəkilişi də oxucuların nəzərinə çatdırırıq.
http://www.youtube.com/watch?v=BapYqCppGW4&list=UU5BwQ066-FkjrFTggXP_aAw&index=2
DİTDİLİ bəy,
Masallı rayonu, Babaser kəndi,
24 dekabr 2012-ci il |
