 Yaxud vaxtaşırı sökülüb-tikilən dukanların sahiblərinə təkrarən satılmasında kim qazanır, kim uduzur?
Qarabağ müharibəsi iştirakçılarına erməni vandalizmi yaxşı tanışdır. Əlbəttə, müharibə gedən rayonlara nəzər salsaq, görərik ki, tarixi abidələrimiz necə dağılır, o gözəl diyarın flora və faunası məhv edilir. Deyə bilərsiniz ki, sözümü Qarabağla başlamağımın önəmi nədir?
Hər bir "azəriyə” yaxşı məlumdur ki, mövcud hakim zümrənin bir amalı var: O da daha çox rüşvət almaq, korrupsiyaya bulaşmaq, sərvət toplamaq və bu amallarına mane olanları əzmək! Bu "siyasət” uzun illərdir, azərbaycanlıların beyninə virus kimi daxil olub: rüşvət verib vəzifə alan məmur çalışır ki, qısa müddət ərzində verdiyini artıqlaması ilə yığa bilsin. Əslində vətənini sevən, böyük qaçqın-köçkün ordusu olan, torpaq dərdi, ruh dərdi çəkən dövlət məmuru ağasına deyil, ilk növbədə vicdanına hesab verməlidir.
Tarixən Masallı rayonu "arıq eşşəyin yaylağı olub”. Cılız bir görkəmdə gələn rəhbərlər bu rayonun "xoşxasiyyət”, bazar əhlini əvvəlcə yumurta kimi dişlərinə vurub bərk-boşdan çıxardır, sonra başlayırlar camaatı yumurta qabığı kimi soymağa, günü-gündən şişməyə (Yumurta sözünü tez-tez təkrarlamağımı üslub səhvi kimi qəbul etməyin, şoğərib bu günlərdə çox dəbdədir.) Azərbaycana hansı rəhbər gəlibsə, özünəməxsus sözü və əməli ilə yaddaşlarımızda qalıb:
"Azərbaycan xalqı dözümlü xalqdır”...
"Məktəblərdən pnevmatik lüfəngləri yığışdırın, dünya bilsin ki, biz sülh tərəfdarıyıq”...
"Qoz əkin, hamam tikin!..”
"Azərbaycanda yaşayan azsaylı xalqlar türksoyludur...” və sair.
İndiki iqtidar isə "yumurta siyasəti” ilə yaddaşlarda qalacaq. Eyni qayda ilə rayonlara təyin olunan rəhbərlər də özünə oxşarlığı ilə seçilirlər. Əlbəttə, bu barədə uzun-uzadı yazmaq olar. Məni isə çox ağrıdan Masallının bu günü və sabahına vurulan ağır zərbələrdir. Axı biz bir tikə çörək dalınca soyuq Sibirə getsək də, Masallı bizim əzəli və əbədi məkanımız olaraq qalır. Görün bu gəlmə rəhbərlər Masallıya və onun əhalisinə necə qan uddururlar? Məsələn, bu rəhbərlərin sonuncu olan, Naxçıvan MR-ın duzlu, keçəl dağları qoynunda dünyaya göz açan Qəzənfər Ağayev yaşıllığa qərq olan Talış mahalının yaraşıqlı bir parçası olan Masallı şəhərinin "Qırmızı kitab”a düşən nadir uzunömürlü ağaclarını görəndə əsəb gərginliyi keçirdiyi göz qabağındadır...
Öncə qeyd etdiyim kimi, tezbazar "mayasını” çıxarmaq üçün nəyisə etməliydi, axı? "Ağackəsmə” əməliyyatına başladı. O, irigövdəli, genişkölgəli ağacları kəsdirdi, ərəb ölkələrindən "dollarla” çoxlu palmalar gətirib burada əkdirdi. Subtropik iqlimi kökündən dəyişib Masallını tropik iqlimli Ərəbistana çevirmək istədi. Lakin çox keçmədi, palmalar yanıb, gəndəlaşa döndü.
Hələ idarə və təşkilatlarındakı qanunsuz əməllərindən söz açmıram ( "Cənub xəbərləri” qəzeti ictimaiyyətə mütəmadi olaraq bu barədə məlumatlar verir). Məni bir də daha çox narahat edən rayonumuzda baş verən son olaylardır. "Köhnə bazar” kimi tanınan Ticarət mərkəzinin, dükanların tez-tez dağıdılmasıdır. Bir çox adamlar "çörək, vay” olsa da, dükan sahiblərinə nəinki kompensasiya ödənilmədi, hətta təzə tikilmiş dükanlar yenidən həmin adamlara baha qiymətə satıldı. Çox keçmədi ki, başçı bu dükanları da dağıtdırıb 10-15 metr yolun üstünə çəkib yenidən tikdirir. Binəva dükan sahiblərinin heç cınqırı da çıxmır. Deyirəm: ay barəkəllah, nə yaxşı biznesdir! Bir qədər vaxt keçəndən sonra, yəqin ki, mabədi olaraq, yolun daralmasını, adamların hərəkəti üçün yer qalmadığını görəndə yeni "Dekandağıtma” əməliyyatı başlayacaq.
Bu gün bu bazara baxanda Qarabağda ermənilərin dağıtdığı yaşayış məntəqələrimizi xatırladım... Gördüyünüz foto-şəkil ətrafında bu yazı olmasaydı, təzə gələn icra başçımıza vətənpərvərlik hissinin oyanması üçün yaxşı bir əyani təşviqat olardı.
Onu da qeyd edim ki, Masallının siyası "bozbaşını” elə bazardakı dükançılar bişirir. Yazıqlar nə etsinlər? Bu zavallılar ötən il istədilər ki, Qəzənfər müəllimi özlərinin bişirdikləri siyasi "bozbaşa” dəvət etsinlər, amma...
Amması o oldu ki, bazarın "şefi” əvvəl özünü "cəbhəçi” kimi göstərən, sonra ailəlikcə YAPçı olan Çingiz Həşimovu həbs edildi. "Başıbəlalı” bazar bütövlükdə Qəzənfər müəllimin inhisarına keçdi. Özgəyə "siyasi bozbaş” bişirən bazar siyasilərinin çığırtısı onda çıxar ki, təzə dükanlara "təzə qiymət” oxuna.
Yazının başlığındakı "müharibə” sözü bazar siyasilərinin bəzi hacı, kərbəlayı və məşhədiləri qorxutmasın, "Azərbaycan xalqı dözümlü xalqdır...”
Mətləb Dadaşi,
Jurnalist, karikaturaçı-rəssam
|
