Masallı rayonunun Şıxlar kəndinin 300 nəfərə yaxın sakini Bakı-Astara şossesinin Masallıdan keçən hissəsini bağlayıb. Bu barədə "jam.az" saytı rayondan məlumat verib.
Məlumatda deyilir ki, əhalinin etiraz aksiyası keçirməsinə səbəb icra başçısı Rafil Hüseynovun artıq bir neçə dəfədir onları qəbul etməməsidir. Şıxlar camaatının dediyinə görə, dəfələrlə üzləşdikləri problemlərlə bağlı Masallı icra başçısının qəbulunda olmağa çalışıblar. Lakin hər dəfəsində müxtəlif bəhanələrlə Hüseynov onları başından edib. Bu gün isə səbrləri daşdığından Bakı-Astara yolunu bağlayıblar. Əraziyə Post Patrul Xidmətinin əməkdaşları cəlb olunub. Onlar etirazçılardan yolu açmalarını istəyir.
Bu arada sözü gedən aksiya ilə bağlı daha bir məlumat yayılıb. "Cənub xəbərləri" qəzetinin baş redaktoru Zahir Əmənov KİV-nə bildirib ki, Masallıda əhalinin bu narazılığına səbəb Aşıq Telli Borçalının 20 Yanvar hüzün günündə Masallıda toyda iştirak etməsini bildirməsidir. "Hazırda Masallı Rayon İcra Hakimiyyətinin binasında yetkililərlə görüşürəm. Bura Masallı camaatı yığışıb və 20 Yanvar günündə toy edilməsi xəbərini özlərinə təhqir hesab etdiklərini, bunun aydınlaşmasını tələb edirlər. Bura yığışan əhali də, İcra Hakimiyyətinin və polisin nümayəndələri də belə bir toy mərasiminin olmadığını bildirirlər. Aşıq Telli Borçalının toy xəbəri yalandır, yəqin ki, biz masallılar bunun sonuna çıxacağıq" - deyə Zahir Əmənov qeyd edib.
Hadisə ilə bağlı Musavat partiyasının Masallı rayon təmsilçisi Xasay Səfəroğlu isə Facebook səhifəsində belə bir status paylaşıb: "Bu gün Masallının "Şıxlar" və "Yeddioymaq" kəndlərinin 300-ə yaxıbn sakini etiraz olaraq Bakı-Astara yolunu bağlamışlar. Polis müdaxilə edib, yaralananlar var. Yaralananlar xəstəxanaya aparılıb. Hal-hazırda Masallı rayon xəstəxanasında qələbəlik hökm sürür. Kənd camaatının etirazına səbəb son vaxtlar kəndə baş verən oğurluq hadisələrinin üstünün açılmaması, məmurlar tərəfindən vətəndaşlara laqeyid münasibət və c. hallardır... Xəstəxanada polislərə qarşı etiraz davam edir".
Göründüyü kimi aksiyanın səbəblərilə bağlı ziddiyyətli məlumatlar var. Amma görünən odur ki, hazırkı avtoritar rejim şəraitində xalqın kütləvi narazılığının ifadəsi baş tutub.
