Главная » 2012»Декабрь»7 » Macallının yeni icra başçısı da yaramaz işlərlə məşğuldur
22:04
Macallının yeni icra başçısı da yaramaz işlərlə məşğuldur
Masallı Ziyalılar Birliyinin bir qrup üzvü rayon rəhbərliyinin qanunsuz əməllərilə bağlı RATİ-də mətbuat konfransı keçirib
Birliyin sədri Məmmədağa Eynullayev bu ilin aprelində rayona icra başçısı təyin edilən Rafiq Hüseynovun özündən əvvəlki icra başçısı Qəzənfər Ağayevin qanunsuz əməllərini davam etdirdiyini deyib. Geniş miqyasda rayonda quruculuq və ya abadlıq işləri aparılmadığı deyilib. Rayonda quruculuq adına iki il öncə təmir edilmiş icra hakimiyyətinin binasının təkrar təmiri, yenicə tikilmiş Heydər Əliyev mərkəzinin sökülərək 50 metr kənarda tikilməsi, yol kənarlarına çəkilməkdə olan hasar göstərilib. Rayonda təhsilin ağır duruma düşməsi xüsusi qeyd olunub. Təhsil şöbəsinin müdiri Aslan İlyasovun təyinata qədər mal-qara alverçisi olmasına diqqət çəkilib. İcra hakimiyyəti səviyyəsində təhsilin bir saat belə pedaqoji təcrübəsi olmayan humanitar şöbənin müdirinin nəzarətində olduğu qeyd edilib.
Təhsil şöbəsinin korrupsiya yuvası olması iddia edilib.
Çıxış edənlər rayonun sosial həyatı ilə bağlı müxtəlif faktlar səsləndiriblər. Onların sözlərinə görə sənədlər üzərində yollar təmirli olsa da gerçəkdə palçıq əlindən tərpənmək olmur. Hər həftənin cümə günü icra başçısının qəbul günü olsa da buna riayət olunmur və icra başçısı vətəndaşları qəbul etmir. Təsadüfən qəbuluna düşən vətəndaşlarla isə kobud davranır. İcra hakimiyyəti hüquq şöbəsi ictimai fəallığına görə Ziyalılar Birliyinin üzvlərini izləməkdə, icra başçısı Rafiq Hüseynov siyasi savadsızlıqda ittiham edilib. Belə ki, birlik üzvü Ramil İbadullayev icra başçısının yadına gələn il prezident seçkisi olduğunu salıb və əhalini iqtidardan narazı salmamağı tövsiyyə edib. R.İbadullayev icra başçısının "Cənab prezidentin sizin səsinizə ehtyacı yoxdur"- deyə cavab verdiyini konfrans iştirakçılarına çatdırıb.
Rayon sakinlərindən pul toplamaq üçün rəsmi qurumların mağaza və digər obyekt sahibləri qarşısında mülklərinin "müasir tələblərə" cavab vermədiyi üçün sökülməsi tələbi qoyduqları deyilib. Sahibkarların belə müasirlikdən rüşvət verməklə yaxa qurtardıqları nəzərə çatdırılıb. Rayon məhkəmə sədrinin yaş və xidmət müddətinin başa çatmasına baxmayaraq hələ də vəzifədə qalmaqda davam etməsi onun icra başçısının yerlisi olması ilə əlaqələndirilib.
Birlik üzvləri rayonda durumun belə davam etməsinə seyrçi qalmayacaqlarını, müxtəlif tipli aksiyalara əl atacaqlarını bildiriblər. Birlik üzvlərinin təqib, şantaj yolu ilə həbsləri baş verərsə buna görə rayon rəhbərliyinin məsuliyyət daşıyacağı nəzərə çatdırılıb.
