 Vəyu vardən bə çəmə di
Vəyu vardan bə çəmə di,
de hay-hayi,
de dəpi, de "Halay”i.
"Ha boli pəvəndi,
lap bənə ğəndi”...
Vəyu vardan bə çəmə di,
de hodi-hodi, de itoti.
"Xıdom”, "Xıdom” sədo jiədə
Vəyu rost bedə de sırdi.
Vəyu vardan bə çəmə di.
Vəyu səpe sıə şole,
sıə şoli jiədə qıləy sırre...
Hırdənon qıleyni
pişe bızını ım çı sırre.
Şoli jiko erəxe,
Ani həx be, peşo sıre.
Cikış karde, jəşe çəqqə.
Iştənış şodoe bə nənə və,
Qucış karde əcey qi
dimış dəsuy bəçey dimi
- Nənə, çəmə vəyu reçine?
- Ha bala, ha!.. Reçine, xanıme!
Bəsə həmmey "gəlin”onsə,
"nevesta”onsa reçine, xanıme...
Ha loləm
Ha loləm..,
bı sutə kəvşəni miyonədə,
rast qınim bətı.
Ha dılış məlalinə loləm..,
kıştışe mı ıştı ın sıəti,
Kəvşəni miyonədə ın şahəti.
Nıştim bə zono,
nuşo bıdəm bətı ıştə nokəti...
Dim dəsum bəştı bın səltənəti
Ki, tı bızıni ın divonə aşiqi.
Ha loləm..,
çiçon dəvardin çımı dılo..?
Bı kainatədə..,
çanə nezimon, çanə diəro..?
Çanə az tıni zındəm..,
zındəş tı, anə mıni..?
In sırrinə dınyoədə,
qıle sir tıniş, qıle mı...
İyəndı sırri nızınə,
sırdomon deyəndı.
Boəmə vəyştebən,
ın sığə-daştinə kəvşən
Bəştı bı seyri
bıəm aludə, bıəm behuş.
Xəbəm ni oməm bə zono
keynəku...
Ava-uvə oməy bəcuş...
pur kardışe çemı çəşi..,
de kəvşəni xokə-puşi
Vo dızdışe, bardışe tı...
Deştə zərifə pəron,
çımı mijon maç karde tı, pəriş...
Dastım ğande, di be, di...
|
