Lerik rayon İH başçısı Rövşən Bağırov məsçidin tikintisinin başa çatmasına az qalmış onun sökülməsinə əmr vermişdir
35 evdən ibarət Lerik rayonunun Peştətük kəndi Lənkəran – Lerik şossesinin 37-ci km-də yerləşir. Mənbəyini Talış dağlarının zirvəsindən alıb, şırhaşırla axan "Vazəru” çayı coğrafi cəhətdən füsunkar məzərələrə malik olan Peştətük kəndinin ortasından axıb keçir.
Son samanlar respublikamızın varlı-karlı insanları tərəfindən kəndin hər yerində müxtəlif təyinatlara malik turist obyektləri tikilmişdir.
Dini inanclarına həmişə qayğı və həssaslıqla yanaşan peştətüklülər İslam dininin bütün ritual-ayinlərinə böyük hörmətlə ciddi əməl edirlər.
Çox təəssüflər olsun ki, daim qonaq-qaralı olan, eləcə də çoxlu insanların gəlib-getdiyi bu gözəl kənddə indiyə kimi ibadət etmək üçün məsçid tikilməmişdir.
Bütün bunları nəzərə alan kənd ağsaqqalları üç il bundan qabaq Peştətükdə həm kənd sakinlərinin, həm də turist qismində buraya axışıb, gələn müsəlmanların ibadət etmələri üçün kəndin mərkəzində, heç kimə mane olmayan bir yerdə məsçid tikmək qərarına gəldilər. Bu məqsədlə əlaqədar sakinlər kənd bələdiyyəsindən müvafiq torpaq sahəsi almış və tikintinin başlanması üçün bir neçə dəfə Lerik rayon İcra Hakimiyyətinə müraciət etmişlər. Lakin, bu müraciətlərdən xeyli müddət keçməsinə baxmayaraq, Lerik rayon İH məsçidin tikintisinə icazə ilə bağlı Azərbaycan Respublikası Dini İşlər üzrə Komitəsinə müraciət etməyərək, kənd sakinlərinin qanuni istəklərinin reallaşmasına kömək etmək əvəzinə bilə-bilə maneçiliklər törətmişdir.
Belə ki, Peştətük kənd əhalisi şəxsi vəsaitləri hesabına 3 il bundan əvvəl aldıqları xeyli miqdarda tikinti materallarının yağış və qar altında xarab olduğuna görə, onlar bələdiyyədən aldıqları yertdə məsçidin tikintisinə başlamaq məcburiyyətində qalmışlar.
Lakin, Lerik rayon İH başçısı Rövşən Bağırov məsçidin tikintisinin başa çatmasına az qalmış onun sökülməsinə əmr vermişdir.
Peştətük kənd sakinləri məsçidin sökülməməsi xahişi ilə Lerik rayon İH başçısı R. Bağırovun qəbulunda olsalar da, o fikrindən dönməmiş və qəti surətdə tikilinin sökülməsinə sərəncam vermişdir.
Hal-hazırda, Peştətük kənd sakinləri dini özünü ifadə ilə bağlı AR Konstitusiyasında təsbit olunmuş vətəndaş hüquqlarının pozulmasına görə çox narahatdırlar.
Onlar Peştətük kəndinin məsçidinin sökülməməsi ilə bağlı həm AR Prezidenti cənab İlham Əliyevdən, həm də Qafqaz Müsəlmanlarının Şeyxülislamı hacı Allahşükür Paşazadədən kömək istəyirlər.
