 Yaşasaydı bu gün ustad Novruzəli Məmmədovun 70 yaşı tamam olacaqdı. Bu elə bir tarixdir ki, bu tarixi sükutla ötürmək olmaz, bu tarixin xalqımız üçün necə əziz olduğunu danmaq olmaz. Amma ürəyimizdə olan USTAD bu gün yanımızda deyil, buna görə də bizi maraqlandıran suallarla köklənmiş bu müsahibəni USTADIN həyat yoldaşı olan, AVAR kökənli TALIŞ qızı Məryəm xanım Məmmədovadan alası olduq. Məryəm xanım həmişəki kimi sadə və səmimi idi. Müsahibəni nəzərinizə çatdırıram..
- Məryəm xanım bayramınız mübarək.
- Çox sağ olun
- Məryəm xanım, nə var, nə yox?
- Şükür allaha, hər şey yaxşıdır, iki aydır ki, burdayam, bir az darıxıram.
- Bəs sizi ziyarət edən olmur?
- Niyə ki, Ataxan gəlir, Elxan gəlir, çox sağ olsunlar, daima mənimlə maraqlanırlar.
- Bəs hökumət?
- Burdakı hökumətin bir problemi var, vətəndaşın qayğısına qalmaq, mənə 3 otaqlı mənzil də veriblər, bir nəfər də ayırıblar ki, mənim çıxa biləcək problemlərimi həll eləsin.
- Dili öyrənə bilirsizmi?
- Alman dilini bilirəm, amma alman dili burada işləmir, istəyirəm Holland dilini də öyrənim.
- Məryəm xanım, ayın 10 Novruzəli müəllimin 70 yaşı tamam olur, bu barədə nə demək istərdiz?
- Nə deyə bilərəm? Novruz (Məryəm xanım ustadı bu cür adlandırdı) bütün şüurlu ömrünü millətinə həsr etdi, elə də böyük təm-təraq lazım deyil, elə qəbrinin üstünə gedib, gül qoysaz, onu yad etsəz, çox məmnun olaram. Novruz bütün gücünü, canını "Tolışi Sədo” qəzetinə verirdi, qəzeti yaşadırdı, millətini sevdiyi üçün mən də Novruza çox hörmət edirdim, Novruza görə, onun milli sevgisinə görə mən onun ellilərinə də hörmət edirəm.
- Məryəm xanım, bir sual verim, amma cavabı səmimi verin, zamanı geri qaytarmaq olsaydı, siz Novruzəli müəllimin yenidən "Tolışi Sədo” qəzetinin baş redaktoru olmasına razı olardınızmı?
- Bu suala mən öz yazımda geniş yer vermişəm, yəqin o yazını sizə çatdırarlar, siz də o yazıya toxunmadan dərc edin, hayıf ki, zamanı geri qaytarmaq olmur, amma olsaydı, mən onu yolundan çəkindirməzdim, heç buna cəhd də etməzdim, tam səmimi deyirəm. Amma zamanı geri qaytarmaq olsaydı, ən azı onu başa düşməyənlər və bu gün öz səhflərini anlayanlar, amma bunu ehtiraf etməyi bacarmayanlar, yəqin ki, həmən səhfləri bir daha təkrarlamazdılar.
- Demək Novruzəli müəllimin "Tolışi Sədo” qəzetinin baş redaktoru olmasına heyfslənmirsiniz?
- Əsla, niyə heyfslənim ki, Novruz öz millətini sevirdi, mən də ailəsi kimi onu başa düşürdüm, bilirdim ki, bu onun daxilindən gəlir, onun millətinə olan sevgisi məndə də bu millətə qarşı böyük bir hörmət hissi aşıladı.
- Məryəm xanım, qəzetimizə nə arzunuz var?
- Sizə uğurlar arzu edirəm, işiniz avand olsun, amma sizdən bir xahişim var: qəzetin bu nömrəsini Novruzun 70 illik yubileyinə həsr edəsiz. Əliyə (Əli Nasiri nəzərdə tutur), Hilala (Hilal Məmmədovu nəzərdə tutur), Akifə (Akif Dənziyevi nəzərdə tutur) mənim adımnan deyin ki, hərəsi Novruzəli haqqında bir yazı yazsınlar, sən də yaz, sənin maraqlı yazıların olur.
- Başqa nə tapşırığınız var?
- Heç nə, mənim də yazımı verin, amma redaktə etməyin, mən də tez-tez sizə yazılar göndərməyə çalışacam, bir də imkan olsa bizlərə qonaq gəlin, buralar İNSANIN yaşaması üçün çox münasib yerdir...
Müsahibəni götürdü:
Rafiq Cəlilov,
Tolışon Sədo, №08 (20), mart, 2012
|
