Bu gün, 10 oktyabr 2013-cü il tarixdə 1 saylı Bakı İnzibati-İqtisadi Məhkəməsində Eldəniz Quliyevin və Mehdibəy Səfərovun iddiaları əsasında, təsisçi olduqları Azəri – Talış milli-mənəvi dəyərlər İctimai Birliyinin Azərbaycan Respublikası Ədliyyə Nazirliyinin Hüquqi Şəxslər və Vətəndaşlıq Vəziyyəti İdarəsi tərəfindən Dövlət qeydiyyatına alınmaması ilə bağlı son Məhkəmə iclası keçirilmişdir.
"Cavabdeh” tərəf Məhkəmədə iştirak etmirdi.
Məhkəmədə iddiaçıların vəkili Seyran Dadaşov çıxış edərək bildirmişdir ki, ƏN-nin Hüquqi Şəxslər və Vətəndaşlıq Vəziyyəti İdarəsi bir il ərzində ciddi arqument və əsaslar göstərmədən 4 dəfə Birliyin Dövlət qeydiyyatına alınmasına imtina edərək, iddiaçıların Konstitusiya hüquqlarını kobud şəkildə pozmuşdur . O, bildirmişdir ki, hətta, Birliyin Nizamnaməsində və başqa sənədlərdə müəyyən xırda qüsurlar olsa belə, ƏN-nin müvafiq idarəsi vətəndaşların hüquqlarına sayğı ilə yanaşaraq bütün çatışmazlıqların aradan götürülməsi naminə onlara lazımi köməkliklər etməlidir. Qanunçuluqda göstərilən qaydalara əsasən, bütün çatışmazıqlar barədə bir məktubda qeyd olunmalı və əhatəli şəkildə vətəndaşın nəzərinə çatdırılmalıdır!
İddiaçı Mehdibəy Səfərov Məhkəmənin nəzərinə çatdırmışdır ki, ƏN-nin Hüquqi Şəxslər və Vətəndaşlıq Vəziyyəti İdarəsi Azəri – Talış milli-mənəvi dəyərlər İctimai Birliyinin təsisçiləri olaraq mənim və Eldəniz Quliyevin Azərbaycan Respublikasının Konstitusiyasında 58-ci maddə ilə təsbit edilmiş vətəndaşlıq hüquqlarımızı pozmuşdur. Vəkil S. Dadaşov isə öz növbəsində Məhkəməyə sədrlik edən Fəqan Əhmədovdan iddiaçıların pozulmuş hüquqlarının təmin olunması üçün təsis etdikləri Azəri – Talış İctimai Birliyinin Dövlət qeydiyyatından keçirilməsi barədə Qərar çıxartmağı xahiş etmişdir.
Bütün bu dinləmələrdən sonra Hakim Fəqan Əhmədov Qərar çıxartmaq üçün fasilə elan etmişdir.
Fasilədən sonra isə qəribə hadisə baş vermişdir. Belə ki, 1 saylı Bakı İnzibati-İqtsadi Məhkəməsinin hakimi Fəqan Əhmədov heç bir səbəb göstərmədən Azəri – Talış milli-mənəvi dəyərlər İctimai Birliyinin Dövlət qeydiyyatına alınmasını təmin etmək əvəzinə əksinə, imtina ilə bağlı qərar çıxartmışdır. O, çıxartdığı ədalətsiz qərarla bir daha iddiaçılar Quliyev Eldənizin və Səfərov Mehdibəyin ölkə vətəndaşı kimi AR Konstitusiyasının 58-ci maddəsində təsbit olunmuş "Birləşmək hüquqlarını” pozmasına rəvac vermişdir!
Azəri – Talış İctimai Birliyinin
mətbuat xidməti
