Azərbaycan Xalq Hərəkatının öncül simalarından biri, şair Əli Nasir Azərbaycan Xalq Cəbhəsinin sədri Əli Kərimlinin facebook sosial şəbəkəsi üzərindən Azərbaycan vətəndaşlarına demokratik düşərgənin canlanması üçün "nə etməli" sorğusuna reaksiya olaraq ona müraciət ünvanlamışdır.
Həmin müraciəti oxucularımızın nəzərinə çatdırırıq:
Əli Kərimliyə.
Əziz Milli Qardaşlarımız mən siyasətçi deyiləm. Amma elə bilirəm ki, məni Azərbaycan Ailəsi hamı şair kimi qəbul edir. Bəzən şairlər də siyasətdə lazım olur. Məsələn Nəsimi, Xətai, Zülfiqar, Cavid, Ulutürk kimi.
İcazənizlə Sizə bəzi qardaşyana sözlərimi bəyan edim, bəlkə lazım oldu. 1-ci; Mən MŞ-nın bu ilki ilkin mübarizə meydanlarında şairləri görmədim.Amma onlar lazım idi. Böyük müəllimlər, həkimlər, alimlər, fəhlə və qulluqçular ordusunun qoşulması gözə dəymədi. Gənclik çox zəif işartılarla yadda qaldı. Mütəşəkkillik və birgəlik çox zəif idi. Daxili intizam istənilən səviyyədə deyildi. Bu xalq işidir. Xalq işində Azərbaycanın millətləri təmsil olunmalıdır (Hərçəndi talışlar az-çox görünürdülər). Bu da bəzi məhdud düşüncəli adamlarda qıcıq yaradırdı.
Dili, adət-ənənəsi və kampakt yaşayış ərazisi olana millət, millətlərin birgəlik vahidi isə Xalqdır. Xalqı təşkil edən millətlər toplumunun yaratdığı hüquqi vahid isə dövlətdir. Dövləti də həmən millətlərin nümayəndələrindən təşkil olunmuş insanlar idarə edir. Buna da deyirlər Hökumət. Bütün ölkələrdə bu hökumətlərə nəzarət edən müxalifət vardır. Müxalifətə və iqtidara nəzarət edən Xalq vardır. Hansı ölkədə iqtidar özünü doğrultmursa, müxalifətdə olan alternativ işə düşür. Xalq doğrudan da mövcud olandan üstün alternativ görürsə, tərəzinin o tərəfini basır və nəticədə köhnəsi yenisi ilə əvəzlənir. Qardaşlarım, bizdə xüsusən mən köhnəlmişi ilə razı olmasam da yenisinin də hələ öz üzərində çox işləməli olmasına zərurət görürəm. Yaxşısı gec olsun, amma güc olsun, gözəl olsun, təmiz olsun, dürüst olsun. İnqlab xarici əsarətdən qurtamaq üçün yeganə yoldur. Bunu bu xalq edib. Bütün millətlərinin birgə qardaşlıq əzmi ilə. Lakin daxili ədalətin bərpası, nizamlanması ondan da qat-qat çətin olur. Ona da mən bilən "Demokratiya" deyirsiniz. Qabaqdan sınaq dolu illər gəlir. Sizin gələcəkdə məmləkətimizi o sayaq görmək istəyiniz varsa, buyurun bu günkü idarəçilikdə olan zəif nöqtələrin nə sayaq öz sağlam əksini tapacağını öz platformanızda qeyd edin. Və qoy bu millətlər birliyi olan xalq oxusun və tərəziyə baxsın. Tərəzidə Xalqın basdığı tərəf çəkəcəkdir. Bir millətə başı, o birilərinə ayağı göstərmək olmaz. Bu xəstəlik və belə xəstələr çoxlu bədxahı olan bu Xalqa 1 vahiddə toplanmağın yolunda uçurum yaradanlardır. Mən siyasətçi kimi danışmıram, Sizin bir qardaşınız kimi danışıram. Qardaşlar, Azərbaycan mono deyil. Bu ailədə olan bütün millətləri zaman bir məkanda bərabərhüquqlu qardaş qərar vermişdir. Bu təbii qanuna zidd gedən hər bir toplum gec-tez məhvə məhkumdur.
Azərbaycan vətəndaşının şəxsi azadlığı bu məmləkətin, bu qardaşlıq diyarının yenilməzliyinə gətirib çıxaracaqdır. Əks hala bu günümüz əsil bariz nümunədir. Qardaşlarım Siz mən şairə etiraz etməyə tələsməyin. Müxalifətdə olan stajlı rəhbərlərdən soruşun, sonra mənim ürəkdən gələn bu cümlələrimə sözünüzü deyərsiniz. Hamımız Azərbaycan naminə yaşamalıyıq. Bunu bizim üçün Sizlər təmin etmək arzusundasınız. Arzularınız çin olsun!
Yaşasın cəmiyyətimizdə insanlaşdırmaq işi ilə məşğul olanlar. Yaşasın həyatını Azərbaycan məmləkətini qardaşlıq, ədalət, bərabərlik, yenilməzlik səmtinə aparanlar.
Bu məmləkətin siması, onun təmsilçiləri gərək ana südü qədər təmiz və ata qüruru qədər əzəmətli və namuslu olmalıdırlar. And özü özlüyündə adi sözlərdən ibarət bir fikirdir. Lakin baxır andı kim içir. And içək şəhid qardaşlarımızın ruhuna ki, bu məmləkətimizi əsil birüzlü insanların idarəçiliyinə verilməsində bax o haqq olan tərəzinin yanında duracağıq. Monarxiya, avtoritarizm, qəddarlıq, qohumbazlıq, bölgəbazlıq, millətbazlıq geri, Vətəndaşlıq, qardaşlıq, bərabərlik, kişilik, qarşılıqlı məhəbbət və mehribanlıq irəli! Elə bilək ki, sabah səhərdən hər şeyi yenidən, ağ vərəqdən və təzə sətirdən başlayırıq. Uğur olsun Azərbaycan!
|
