And olsun Allaha, bu məmləkətdə milli qardaşlıq ədaləti bərpa olmasa, vətəndaş azadlığı olmasa, Allahtaala bu ərazidən rəhmət nəzərini çəkəcəkdir
Milli ədavət qızışdıran yaşlılar müxənnətdən betərdir
Mən inqlab etmiş və onun əziyyətlərini çəkmiş bir fədaiyəm. Mənim silahdaşlarım çoxusu şəhidlər xiyabanında uyuyur. Allah rəhmət eləsin!
Mənə deyirlər ki, şair sən ancaq şer yaz. Qəbul. Lakin bunu mənə deyənlər də bəzən olanlardan yan keçirlər. İndi talışın "skoros” öyrənmək vaxtı deyil. Bu cür ucuz işlərə baş qoşmaq əvəzinə bir yavanın ağzını bağlamaqla məşğul olmaq məsləhətdir.
Bütün Azərbaycan: iqtidarı da, müxalifəti də yaxşı bilir ki, mənim vəhdət pozan, ara qarışdıran, talışı pisləməklə guya özünü "vətənpərvər lənkəranlı” kimi göstərən nadürüstlərə cavab verməyə mənəvi haqqım çatır. Siz yazmırsınız məcburam mən yazam. Kimə? AXCP, MUSAVAT, Vətəndaş Həmrəyliyi, ADP, ƏDALƏT və digər müxalifət partiyalarına və iqtidar partiyasına, Azərbaycan hökumətinə, Qafqaz Müsəlmanları İdarəsinə və bütün beynəlxalq təşkilatlara, səfirliklərə, AŞ-na, BMT-yə, müsəlman dövlətləri konfransına, müraciət edəm ki, ey İnsanlar, bu ölkədə nə vaxta kimi talış əsilli olduğumuz üçün bizə SEPARATÇI və yaxud başqa ölkələrin kəşfiyatçısı damğası vurulacaqdır. Hökumət bizə münasibətini bilmərrə dəyişməlidir. Biz Azərbaycanın əsil vətəndaşlarıyıq. Burada yaşayan bütün millətlərə və vətəndaşlara qardaşlıq iddiamız var. Bizdən düşmən düzəltmək istəyənlərə isə deyirəm: Ay vicdansızlar, 1988-1989-1990-1991-1992-ci illəri yada salın. Biz deyildikmi Ümumxalq Azadlıq Hərəkatının ön cərgələrində digər millətlərdən olan qardaşlarımızla Müstəqil Azərbaycan naminə ölümə atılanlar.
Qarşıda yenə sınaq günləri olacaq. Bu tarixdir, bu əbədiyyət yoludur. Biz bir-birimizi qaralamaqdan əl çəkməliyik. Biz yenə qardaşcasına Azərbaycan naminə yaşamalıyıq. Dedi-qodu əvəzinə demokratikləşmə, milli torelantlıq məsələsinin inkişafına xidmət etməliyik. Mən siyasətçi deyiləm. Bu o demək deyil ki, Azərbaycan istiqlaliyyətinin ən çətin məqamlarında vəzifələrdə piylənən, bu gün hər şey asanlaşandan sonra bizim kimi canını Vətən üçün qoymuş, bu yolda zindanlarda min bir əzab çəkən insanlara şər atan fitnəkarların böhtanlarına susub ötürməliyik peysərə. Artıq dözmək olmur. Bir var əvvəldən özü üçün yaşayan olasan, bir də var ki, millət üçün yanan olasan. Kişi, ağzımızı aça bilmirik bu məmləkətdə. Bir də görürsən şərəfi bir qəpiyin dördə birinə dəyməyən biri qalxıb deyir: Suss, talış, separatçı! Ada, nolub? Kimdi separatçı?
Axı bu gün Milli Şura yaradılıb ki, millət demokratik yolla bir az da irəliləsin. Çox gözəl. İrəliləyək də. Ay müxalifət rəhbərləri bir deyin görüm, bu Milli Şura deyəndə nə başa düşülməlidir? Əyər bu şura təkcə Azərbaycan Türkləri mənasında Milli Şuradırsa, bunun adını elə də qoyun, biz də işimizi bilək. Yox bu şura Azərbaycan və Azərbaycanlıların necə deyərlər ümummilli şurasıdırsa onda bizə qarşı səslənən o "separatçılar” sözü nə deməkdir. O xarici kəşfiyata işləyirsiniz nə deməkdir? Demirsiz biz qardaşıq, Olaq da. Nə istəyirsiz?
Deyirsiz iqtidar avtoritardır, klandır nə bilim nə. Mən siyasətçi deyiləm, o sözləri də yaxşı bilmirəm. Siz bilərsiz. Bəs axı siz də elə çıxır ki millətçisiz. Necə olur döşünə döyüb mən türkəm deyənə nə mutlu deyirsiniz, mən talışam deyənə separatçı? Düzdür indi deyəcəksiniz ki, əsla, əsla biz belə düşünmürük və demirik. Bəs axı gözünüzün qarasının ağının önündə bizə belə deyənlər var, sıranızda onu da başa çəkirsiz.
Təkidlə tələb edirəm: Mövqeyinizi bildirin bəylər, cənablar, yoldaşlar, qardaşlar! Əşi, təklikdə hansınızla söhbət edirəm deyirsiniz: Qardaş, can, Əli Nasir doğru deyirsən, prezident fərmanına da əməl olunmalıdır, hələ üstəlik milli məsələdə beynəlxalq konvensiyalarla əlaqədar qəbul olunan öhtəliklər də yerinə yetirilməlidir. Amma bir yerə yığılıb, bu və digər dəyərlərin həyata keçirilməsindən ötrü birgə bir təşkilat yaradırıq, orada kimlərsə bizə iftiralar atır, "otur yerinə separatçı talış” deyir hamınız susursunuz.
Türkiyədə bir ermənini nə üçünsə öldürmüşdülər. Deyəsən haqsız yerə öldürmüşdülər. Türklər hamı ayağa qalxıb onun haqqını müdafiə etdilər. Heç olmasa onlardan öyrənək. Bir talış düşüb içinizə, içinizdə elələri var ki, az qalır onu yesin. Ay qardaş, neyləyək gəlib ÜmumAzərbaycanın taleyyüklü işlərində iştirak etməyək? İştirak etməsək deyəcəksiniz ki, talışlar özünü kənara çəkir. İştirak da edirik, bizi aşağılamaq istəyənlərə loyal münasibət bəsləyirsiniz.
Cəmil Həsənli, qardaş, bu sayaq daxili intizamı olan bir Şura iləmi bədxahları sayından çox olan bu məmləkətin idarə edənləri olmaq istəyirsiniz? Kişi mərdi qovub namərd eləmək namərdlərin sayını artırar və bunu namərdlər edər. Mən bu yazını məni qorumaq naminə mənə "Şair sən şer yaz, siyasətə qarışma" deyən dostlarıma, həm də hamıya yazdım ki, daha dözmək olmur. Bu siyasət deyil, bu ağrıdır, bu faciədir, bu dəhşətdir. Nə bizim ayrı bir gedəsi yerimiz var, nə də qeyrilərinin. Kişilər, biz bu vətəndə yaşamağa və onu qardaşcasına qorumağa məhkumuq! And olsun Allaha bu məmləkətdə milli qardaşlıq ədaləti bərpa olmasa, vətəndaş azadlığı, olmasa Allahtaala bu ərazidən rəhmət nəzərini çəkəcəkdir. Cərgələrinizdə sağlam gəncliyi reallaşdırın. Demirəm ağsaqqallar olmasın. Olsun! Lakin köhnə palan içi eşən, milli ədavət qızışdıran yaşlılar müxənnətdən betərdir. Gəncliyin beynini zəhərləyən, ruhən qocalmış və çürük fikirlərlə vəhdətimizə zərbə vuran virusları təmizləyin. Ey AXCP, ey MÜSAVAT mən də AXC-nin üzvü olmuşam. Özünüz bilirsiniz ki, ən fəallarından olmuşam. Demək olar ki bu qurumun yaranmasında və formalaşmasında az zəhmətim olmayıb. Bunu bilənlərin çoxu rəhmətə getsə də, axı salamat qalanlar da var. Hansınız "Ey Ana Vətən" deyə meydanlarda bu marşı mənimlə birgə oxumamısınız? Qardaş, eləmiyin, etməyin! Gəlin Azərbaycan naminə qardaş kimi əl-ələ verib yaşayaq.
Bəylər, cənablar, nə iqtidara düşmənik, nə müxalifətə. Biz sizə qardaşlıq əli uzadırıq, Siz o əldən yapışın. Kimlər tərəfindənsə talışlara vaxtikən asılan yarlıqları atın kənara. Bax deyirəm bu gündən sonra talışlara kim separatçı deyəcəksə peşiman olacaq.
Biz, Azərbaycanda yaşayan Talışlar, bu məmləkətin vətəndaşlarıyıq və onu bütün təşkilatlarında təmsil olunmaq haqqımız vardır.. Və təmsil olunacağıq da!
Hamınıza ali ehtiramla,
Əli NASİR
