Sülh və Demokratiya İnstitunun direktoru Leyla Yunus Müsavat başqanının müşaviri Yadigar Sadıqovun üzləşdiyi təxribatla bağlı daxili işlır naziri Ramil Usubova müraciət edib. Müraciətdə deyilir:
Hörmətli cənab nazir.
25 iyun 2013-cü il tarixində Lənkəran şəhərindəki çayxanaların birində Müsavat Partiyası başqanının müşaviri Yadigar Sadıqovun stoluna Rəşid Kərimov adlı birisi əyləşmiş, müxalifətin ünvanına təhqirlər yağdıraraq Sadıqovu təxribata çəkməyə cəhd etmişdir. Lakin sonuncu təxribat ehtimalı haqqında öncədən məlumatlı olduğundan cavab verməmiş, qalxaraq çayxanadan uzaqlaşmışdır. Buna baxmayaraq, tapşırığı yerinə yetirən R.Kərimov Yadigar Sadıqov və daha iki nəfər tərəfindən döyülməsi haqqında ərizə yazmışdır. Tamamilə aydındır ki, Rəşid Kərimovun hərəkətləri və ərizəsi müxalifət partiyasının fəalını həbs etmək üçün açıq təxribatdır. Ərizənin hakimiyyətyönlü KİV-lər və "Azərtac” dövlət agentliyi tərəfindən yayılması da sübut edir ki, söhbət öncədən hazırlanmış, Bakıda da məlum olan təxribatdan gedir. Yadigar Sadıqovun evinin Jeep markalı 90 BA 303 nömrə nişanlı maşınla polislər tərəfindən müşahidə altına alınması da təxribat versiyasını bir daha təsdiq edir.
Nəzərinizə çatdırmaq istəyirəm ki, seçki ilində həbs edilmiş müxaliflərin sayı artıq 30 nəfəri keçib. Baş verən təxribatlar Sizin başçılıq etdiyiniz nazirliyə, eləcə də onun sağlam məntiqinə və qanuna riayət etməsinə etimadı sarsıdır.
Lütfən, seçkiqabağı mühiti müxalifət partiyalarının fəallarının yeni həbslərilə daha da mürəkkəbləşdirməyin.
Azərbaycanın dinc sabahına və sağlam məntiqə ümidlərlə
Leyla Yunus
Sülh və demokratiya institunun direktoru
