Главная » 2012»Май»22 » Leyla Yunus: “Azərbaycanı mafia-klan rejimi idarə edir” (video)
16:14
Leyla Yunus: “Azərbaycanı mafia-klan rejimi idarə edir” (video)
Azərbaycanda insan haqları ilə bağlı vəziyyət acınacaqlıdır və "Demokratiya naminə oxu!” kampaniyası dünya birliyinin diqqətinin bu sahədə problemə yönəldilməsi üçün keçirilir. Bu barədə Sülh və Demokratiya İnstitutunun (SDİ) direktoru Leyla Yunus "Eurovision” ərəfəsində yerli hüquq müdafiəçilərinin birgə keçirdiyi kampaniyanın yekunlarına həsr olunmuş bugünkü mətbuat konfransında bildirib.
"Azərbaycanda hətta avtoritar rejim də deyil, klan-mafia idarəetmə sistemidir. Hazırda ölkədə 70-dən çox siyasi məhbus var. Onların bəzisi dinc nümayişlərdə iştiraka görə həbsdədir. Hətta Rusiyada da buna görə 15 sutka verirlər”, - o qeyd edib.
L.Yunus siyasi məhbusların sırasına dövlət çevrilişinə cəhddə ittiham olunaraq 10-12 il azadlıqdan məhrum edilmiş İslam Partiyasının fəallarını da daxil edib.
L.Yunus həmçinin diqqəti 7 jurnalistin həbsinə yönəldib. "Eurovision”dan sonra onları 5-7 il müddətinə həbs edə bilərlər. Bundan əlavə, 4 hüquq müdafiəçisi cinayət məsuliyyətinə cəlb olunub.
L.Yunus vətəndaşların mülkiyyət hüquqlarının pozulmasına xüsusi diqqət yetirib.Bakıda 60 min sakin öz mənzilindən qanunsuz çıxarılıb. "Eurovision” bu prosesi sürətləndirib”, - o qeyd edib və deyib ki, mülkiyyətin götürülməsi qanunlar, Nazirlər Kabinetinin qərarları pozulmaqla həyata keçirilib.
O, avropalı jurnalistlərə müraciət edərək onları Azərbaycanda insan hüquqları məsələsinə laqeyd qalmamağa çağırıb.
"Avropada korrupsiyaya "yox” deyin ki, satqın siyasətçilər Əliyev rejimindən pul almasınlar, uzaq Azərbaycanda isə demokratiyaya "hə” deyin”, - o vurğulayıb.
Lakin L.Yunusun çıxışı hökumətyönlü və dövlət KİV-ləri jurnalistlərinin çılğın reaksiyasına səbəb olub. Onlardan biri L.Yunusun sözlərində "etikanın pozulması” nı görərək dövlət əleyhinə fikirlərə etiraz edib.
"Xalq qəzeti”ndən olan digər jurnalist Əliqismət Bədəlov xarici jurnalistləri inandırmaq istəyirdi ki, Azərbaycanda "həbs edilən jurnalist” yoxdur, sadəcə jurnalist vəsiqəsi olan şəxslər həbs olunublar.
Amma Reportyorların Azadlığı və Təhlükəsizliyi İnstitutunun direktoru Emin Hüseynov həbs edilən jurnalistləri adbaad sayıb. Bu zaman hökumətyönlü jurnalistlər qışqırıq salaraq danışmağa maneçilik törədiblər.
Siyasi fəal və jurnalist Rövşən Hacıbəyli diqqəti İctimai telekanalın Avropa Yayım Şurasının siyasi plüralizmin təmin edilməsi prinsipini pozması üzərinə yönəldib.
Siyasi Azadlıqlar Alyansının rəhbəri Anar Məmmədli diqqəti bir ildən sonra Azərbaycanda keçiriləcək prezident seçkiləri üzərinə kökləyərək ölkədə azad və ədalətli seçkilər keçirməyə şəraitin olmadığını qeyd edib.
Jurnalist Şahvələd Çobanoğlu "Demokratiya naminə oxu!” kampaniyasının dünya ictimaiyyətinin Azərbaycanda sarayların yaraşıqlı fasadları arxasında real problemləri görməsi üçün keçirildiyini söyləyib.
Xarici jurnalistlərin "Evrovision”dan sonra Azərbaycan iqtidarının özünü necə apara biləcəyi sualına cavab olaraq L.Yunus repressiyaların güclənəcəyi proqnozunu verib.
