Peşdım siyə, sədom eşə,
Tolış, opotəbə vişə,
Mandəyonən bə toş beşə,
Tolış be jedən bə həşə,
Haray, dod, əl-əmon, haray,
Tolış lay-lay, Tolış lay-lay! Əli Nasir
Lay-lay məjən bo tolışon, hay Əli,
Zikkə bıjən, pekə əvon, hay boli!
Tolış heste rəği-rişə zındəni,
Manğort bedə, ışta navi vindəni,
Forse kardə, tolışə qəzet handəni,
Lay-lay məjən bə tolışon, hay Əli,
Zikkə bıjən, pekə əvon, hay boli!
Az zındənim, çəmə oxoy çiç bəbe,
Jıqo bışo çəmə koon hiç bəbe,
Millətiro kəşə zəhmət püç bəbe,
Lay-lay məjən bə tolışon, hay Əli,
Zikkə bıjən, pekə əvon, hay boli!
İqlə "məmməd” bə qəzeti doydəni,
Hiç həvoyən "Tolışi sədo” səydəni,
Çı əcəbe xıdo əvi jəydəni,
Lay-lay məjən bə tolışon, hay Əli,
Zikkə bıjən, pekə əvon, hay boli!
Kami tolış hiç tolışi votdeni,
In zıvoni hiç bə hisob qatdəni,
Çəvon dılon bı zıvoni sütdəni,
Lay-lay məjən bə tolışon, hay Əli,
Zikkə bıjən, pekə əvon hay boli!
Iştı lay-lay lap odəmi bovnedə,
Ğeryətmandon əv de dıli tovnedə,
Ve vırədə xəyoliko novnedə,
Lay-lay məjən bə tolışon, hay Əli,
Zikkə bıjən, pekə əvon, hay boli!
Xıdo bətı ümür bıdə ve-veni,
Omə rüjon tı çok-çoki dəvoni,
Xahiş kardəm, tıno xıdo, tı həni,
Lay-lay məjən bə tolışon, hay Əli,
Zikkə bıjən, pekə əvon, hay boli!
Həbibi Heybət (Əliyev Heybətulla Həbibi zoə) - 1960-nə sori Ostoro Şuvi diədə moədə bə. 1990-nə sori Azərbaycan Rusi Zıvoni iyən Ədəbiyyati İnstitut orıxniyəje. Şuvi di miyonə məktəbdə muallim ko kardedə. Hələ miyonə məktəbədə handə vaxtonku şer nıvıştedə, şeronıj devri məbuatədə çap bə.
|
