Səbəb kimi icra başçısının humanitar məsələlər üzrə müavini Səmədağa Abdullayevin «haqq» tələb etməsi göstərilir
Məlum olduğu kimi, Azərbaycanda yaş həddi 65-i keçmiş şəxslərin ixtisara salınması prosesi gedir. Bütün sahələri əhatə edən bu proses Lankonda da həyata keçirilir. Avqustun sonlarından başlayaraq reallaşdırılan proses nəticəsində Lankon rayonunda 18 orta məktəbin direktoru yaş həddinə görə işdən çıxarılıb.
Rayondan aldığımız məlumata görə, yeni dərs ilinin başlanmasına rəğmən, hələ də həmin məktəblər direktorsuz qalıb. Bunun səbəbi isə kadr çatışmazlığı deyil, başqa bir səbəbdir. Məlumat verən rayondakı mənbələrdən biri deyib ki, ortada rüşvət amilinin olması məktəbləri başsız qoyub. Onun bildirdiyinə görə, Lankon rayon Təhsil Şöbəsinin müdiri Şahanə xanım bu prosesi reallaşdırmağa çalışsa da, İcra Hakimiyyəti başçısının humanitar məsələlər üzrə müavini Səmədağa Abdullayevin işdə maraqlı olması hər şeyi indiki vəziyyətə çatdırıb.
Mənbə bildirir ki, S.Abdullayev təhsil şöbəsinin müdirinə tapşırıb ki, orta məktəblərə direktor təyinatı «hörmətsiz» həyata keçirilə bilməz. Buna görə də, xanım şöbə müdirindən tələb edib ki, kənd orta məktəblərinə direktor getmək istəyənlər 5000 manat, Lankon şəhər orta məktəblərində direktor kimi işləmək istəyənlər isə 8-10 min manatlarından keçməlidir.
Mənbə bildirir ki, hal hazırda rayonda bu qədər pulu olan və həmin pulu verərək risq edib direktor təyinatı almaq istəyən şəxs olmadığı üçün orta məktəblərin rəhbər postları boş qalıb.
