Narkotik ittihamı ilə həbs olunan Şaiq Ağayevi ölümcül döyüldüyünü deyir
"Barmağlarımı sıxacla sıxırdılar, dubinka ilə dabanlarıma, böyrəklərimə vurudular… ölmək istəyirdim”
"Məni Narkotiklərərlə Mübarizə İdarəsinin Aydın adlı polis əməkdaşı döyürdü, barmağlarımı sıxacla sıxırdılar, dubinka ilə dabanlarımdan, böyrəklərimdən vurudular. İsgəncələrə dözməyib urəyim gedəndə isə onun "işverəni” Saleh üstümə su səpb məni ayıldırdı. Amma heç ayılmaq istəmirdim. Ölmək istəyirdim. Bir balaca ağlım başıma gələn kimi yenə məni döyməyə başlayırdılar”. Bunu dünən Lənkəran şəhər Məhkəməsində hakim Təyyar Abbaslının sədrliyi ilə keçirilən məhkəmə prosesində sərbəst ifadəsi zamanı 2013-cü il fevralın 5-də narkotik ittihamı ilə həbs edilən edilən Lənkəran şəhər sakini Şaiq Ağayev bildirdi.
İşgəncələrə tab gətirmədiyi üçün müstəntiqlərin ona təklif etdiyi bütün sənədlərə qeyd-şərtsiz imza atmağa məcbur olduğunu deyən Ş.Ağayev Bakıdakı təcridxanaya köçdükdən sonra uzun müddət müalicə alıb özünə gəldiyini dedi. O, üzünü dövlətin ona verdiyi vəkil İbarət Həsənova tutaraq bildirdi: "Allah bu kişinin atasına rəhmət eləsin. Dava-dərman almağa pulum da yox idi. Bu kişi özü 2-3 dəfə mənə dərman alıb gətirib”.
İttiham aktına görə, Ş.Ağayev fevralın 4-də Lənkəran şəhər aeroportunun yanında Saleh və Afərin ləqəbli Arza adlı şərti alıcılara 4 kibrit qutusunda ümumu çəkisi 8,53 qram qurudulmuş marixuana satıb. Fervalın 5-də polisə dəvət edilən Ş.Ağayev adı çəkilən şəxslərə narkotik maddəni satdığını və bunun müqabilində 140 manat pul alıdığını səmimi şəkildə etiraf edib. Özünün narkotik alüdəçisi olduğunu etiraf edən Ş.Ağayev Lənkəranda çay qırağında hər il iki kol narkotik xassəli çətənə kolu əkibvə satdığı narkotiki də özü istehsal edibm. Amma istintaq materiallarında göstərilir ki, Ş.Ağayev çətənə yetişdirdiyi ünvanı unutduğu üçün istintaqa göstərə bilməyib.
Amma Ş.Ağayevin zərəsizləşdirilməsi üçün xüsusi əməliyyat keçirən polis, nədənsə onu iş başında həbs etməyib və bir gün sonra polisə dəvət edib.
İfadəsi elan olunandan sonra, hakimin "bəs bunlara nə deyirsən?” sualına Ş.Ağayev cavabda bildirdi ki, ona verilən işgəncələrə görə istənilən cinayəti boynuna almağa hazır imiş: "Mən deyirəm axı, ölmək istəyirdim. Bəlkə dünyada heç kimə belə zülm verilməyib. Mənə hansı kağızı versəydilər, lap dar ağacına da desəydilər gedərdim ki, canın o zülmdən qurtarsın”.
Ş.Ağayev bildirdi ki, o heç vaxt heç kimə narkotik satmayıb. Amma onu buna təhrik etməyə çalışıblar: "Bilirdim ki, məni ilişdirmək istəyirlər. Afərinin də Aydının adamı olduğunu bilirdim. Dəfələrlə mənə zəng edib ona "şey” (narkotik) təşkil etməyimi demişdi. Hətta bu işə əmim oğlu Mikayılı da qatmışdılar. Mikayıl mənə dedi ki, onlara narkotik boyun olub, tapa bilmir, mən Lənkəran uşaqlarından tapım. Mən demişdim ki, bu yolun yolçusu deyiləm, mənim üç üşağım var, namaz qılan adamam. İkincisi, əgər məndən narkotik alırdılarsa, niyə elə yerində məni tutmadılar? Güya məni polisə dəvət ediblər. Məni polisə filana dəvət etməyiblər. Səhər tezdən mülki geyimli adamlar və polis olmayan Saleh də evimə basqın ediblər. Hamısı da mülki geyimli olub. Qorxub 102-ə zəng eləmişəm. Evimin qapı-pəncərəsini qırıb evə giriblər. Azyazşı uşaqlarımı, yüksək təzyiqli xəstə olan həyat yoldaşımı itəliyib ağır sözlərlə təhqir ediblər. Məni arvad-uşağın yanında döyüb aparıblar. Evdə heç nə tapmadılar, heç cibimdə, evimdə də 1 manat olsa belə pul da tapmadılar. Çünki evimdə nə narkotik, nə də pul olub. Mən qəbristanlıqda günəmuzd işləyən fəhlə adamam. Ölən olanda qəbir qazıram, ya da kimsə ölüsünün qəbirini təmir etdirəndə 5-3 manat verir mənə”.
Vəkili İ.Həsənov isə Ş.Ağayevin səhər saat 9-da polisə aparıldığını, yalnız axşam sat 23.00 radələrində onunla görüşə bildiyini deyib. Habelə vəkil vəsadət qalıdraraq işdə adı keçən və Ş.Ağayevin ona işgəncə verən şəxslərin məhkəmə prosesinə dəvət edilməsi barədə vəsadət qaldırıb. Hakim vəsadətləri qəbul edib, işdə adları keçən polis əməkdaşlarının prosesə gəlmədiyini deyərək, onların məcburi şəkildə prosesə gətirilməsi barədə göstəriş verdi.
Proses iyunun 25-i saat 09.30-a təxirə salınıb.
Xatırladaq ki, 2013-cü il yanvarın 14-də Lənkəranda övladının müəllim tərəfindən döyülməsi ilə bağlı videomüsahibəsi yayılan valideyin - Şahiq Ağayev fevralın 5-də həbs edilib. Yalnız bir həftədən sonra ailə üzvləri xəbər tutublar ki, Ş.Ağayev Narkotiklərlə Mübarizə İdarəsinin cənub Regional Şöbəsinə aprılıb. Ailə üzvləri baş verənlərin məhz mətbuatda və sosial şəbəkələrdə yayılan videoçarxla bağlı olduğunu güman ediblər. Belə ki, yanvarın 14-də Lənkəran şəhər 8 saylı orta məktəbdə Vüsalə adlı müəllimənin 6-ci sinif şagirdi Arzu Ağayevanı döyməslə bağlı şagirdin özü və atası Şahin Ağayev müsahibə verib. Şagirdin atası Şahin Ağayev video-çıxışında bildirib ki, müəllimin silləsi nəticəsində qızının qulaq pərdəsi partlayib, sırğası itib. Məktəb direktorun isə bildirib ki, Vüsalə müəllimə tənbeh edilib: "Müəllimə 40 yaşlı qızdır. Xarakterində problemlər ola bilər. Şagird müəlliməyə söz qaytarıb. O da qızın qulağını dartıb. Hər gün müəllimlərə tapşırıram ki, şagirdlərlə düzgün rəftar edin, onlara əl qaldırmayın. Amma hərdən belə hadisələr də olur”.
Dünən "Bizim Yol”un əməkdaşı Ş.Ağayevin evində də olub. Ev adlanan əslində bir sınıq-salxaq daxmadır. Bunu fotoşəkillərdən də aydın görmək mümkündür. Ailənin yeganə stabil gəliri aldıqları 90 manat sosial yadımdımdır. 3 uşağ və həbsdəki Ş.Ağayevə baxmaq yükü isə ağır hipertoniyadan əziyyət çəkən həyat yoldaşı Gülbəniz xanımın üzərindədir.
"Gedib tarlada onun-bunun üçün işləyirəm. 10-15 gün idi pomidor tarlasında işləyirdim. Amma təzyiq imkan vermir ki…. Üç dörd dəfə tarlada ürəyim gedib. Sahibkarlar da qorxurlar ki, ölüb onların ayağında qalaram deyə mənə iş vermirlər. Dolanışıq çox çətindir. Qızlar böyükdür, başa düşürlər. Amma Adəmin (oğlu) 4 yaşı var. O gün qonşunun uşaqları dondurma yeyirdilər. Səhərə qədər ağladı. Uşaqdır, məhləyə buraxmıram. Gedib qonşu uşaqların əlində bir şey görüb istəyir, mən də ala bilmirəm. Gücüm də heç yerə çatmır. Bilirəm ki, prezidentimiz yaxşı adamdır. O, belə zülm haqqında eşitsə, saxtakar polislərin başına oyun açar. Amma mən sözümü prezidentə nece deyim. Hakimiyyət, pul polisin əlindədir. Nə istəsələr edirlər, nə də deyirlərsə yuxarılar onlara inanır”, - Gülbəniz xanım dedi.
Ş.Ağayevin böyük övladı Arzu Ağayeva isə kitab-dəftərindən əl çəkmir. Məktəndən aldığı tərifnamələri gətirərək əməkdaşımıza təqdim edir. Həm də yay tətili başlamasına baxmayaraq kitabları bir qrağa atmayıb. Böyük arzusu telejurnalist olmaq olan A.Ağayevə həm də savadlı olub, pul qazanmaq və ailəsini dolandırmaq arzusundadır. 6-ci sinif şagirdi olan qızcığazın hazırda bir arzusu var: "Ata demişdiki bu il də əlaçı olsam mənə noutbuk alacaq. Amma atamı gəlib apardılar. Noutbuk istəmirəm, böyüyüb özüm alaram. Atamı isəyirəm!”
İdrak Abbasov
Lənkəran
