Lənkəran bazarının rayonun ticarət dövriyyəsində əhəmiyyətli payı var. Kənd təsərrüfatı məhsullarının böyük əksəriyyəti, digər ərzaq növlərinin, eləcə də qeyri-ərzaq (paltar, təsərrüfat malları və s.) məhsullarının xeyli hissəsi burada satılır. Digər tərəfdən, şəhərdaxili, rayon mərkəzindən kəndlərə, eləcə də Astaraya, Masallıya, Lerikə gedən avtobusların dayanacağı da burada yerləşir. Əhalinin tələbatı səbəbindən şəhərdə fəaliyyət göstərən taksilərin də əksəriyyəti buraya yığılır. Bir sözlə, Lənkəranda bütün yollar bazardan keçir. Lakin 213 mindən artıq əhalinin bazarı heç də ürəkaçan vəziyyətdə deyil.
Lənkəran şəhər sakini Elşad Abbasov deyir ki, ilin yarısını bazar palçıq içərisində olur. "Keçən il bazar ətrafındakı yollara asfalt döşədilər. Lakin, asfaltın keyfiyyəti necə idisə, elə birinci qışdan sonra yararsız vəziyyətə düşdü. Və palçıq yenə də dizə qalxdı. Bazarın yaxınlığında olan kanalizasiya xəttləri də işləmir. Yağış yağanda oraya sadəcə su yığılır, daşır və nəhayət torpağa hopur”.
Nail Məmmədov isə diqqəti avtobus dayanacaqlarına yönəltdi. "Buradakı avtovağzaldan hər gün minlərlə adam istifadə edər. Amma yalnız şəhərdaxili avtobuslar dayanan yerdə 2 xırda dayanacaq var ki, onlar da yalnız yayda günəşdən, qışda yağıntıdan qorunmaq üçündür. Oturmağa yer belə yoxdur. Üstəlik, zibil qalaqları ilə doludur. Kəndlərə gedənlər isə açıq havada gözləmək zorundadırlar. Çünki zamanında avtobus dayanacaqları üçün yer ayrılmadı. Boş yerlərin hamısı dükan tikmək üçün satıldı”, - deyir Nail bəy.
Avtomobil sahibi olan Ədalət Məmmədov deyir ki, bu ətraflarda maşın saxlamaq üçün yer tapmaq müşkül məsələdir. "İcra strukturları əhalinin rahatlığını deyil, öz mənafelərini güddüklərindən maşın saxlamaq üçün heç bir ərazi ayırmadılar. Bütün yerlər ticarət obyektləri tikmək üçün paylanıldı”. Ədalət bəy, hesab edir ki, çıxış yolu bazarın bir hissəsinin başqa yerə köçürülməsindədir: "200 mindən artıq əhalisi olan rayonun bir bazarı olmamalıdır. Hər şey bu xırda ərazidə cəmləşib”.
Lənkəran İcra hakimiyyəti başçısının şəhər təsərrüfatı üzrə müavini Möhübbət Babayev də bildirir ki, bazarın bir hissəsinin köçürülməsi planı mövcuddur. Lakin bunun nə zaman baş verəcəyi və hansı yerə köçürüləcəyi hələ müəyyən olunmayıb.
