 Orada baş verənlər sanki bir həqiqəti səsləndirir: «Biz zəngin küveytlilər narazıyıq, görün Azərbaycanda insanlar nə düşünür...»
Sizcə Küveytdə nə baş verir? Azı 5-6 min dollar maaş alan zəngin camaat nə üçün etiraza qalxıb parlamenti tutur - orada ki aclıq, səfalət yoxdur?!
Dərin mətləblər axtarmağa dəyməz, orada da eynən bizdəki davadır. Həqiqətsiz yaşamaq olmur, hətta pul-para da kömək etmir, sakitləşdirmir adamı. Küveytli bilir ki, zəngin ölkəsi pulla dənizi ilə bərabər yalan okeanında üzür. Onun ölkəsi geri bir idarəçiliyə, ədalətsiz quruluşa, düzgün olmayan bir yola sahibdir. Harın şeyxlər ölkənin simvoluna çevrilib və əslində Küveyt təbiətin hesabına yağıb-guruldayır. Təbii sərvətlər qurtarsa, aciz bir ölkəyə çevrilə bilər. Halbuki elə etmək olar ki, indiki zənginlik daha böyük mənəvi və maddi uğurlara yol açsın. Küveytli bilir ki, onların aldığı pulların çoxluğuna səbəb şəxsi bacarıqları, ölkəsinin inkişafı, hökumətlərinin qoçaqlığı deyil. Əksinə. Küveytli anlayır ki, bu sadalananlar olsa, onlar daha çox qazanar və ölkələri misilsiz bir dövlətə çevrilər.
Küveytlilər həqiqətin yoxluğunu görür, hansısa formada buna qarşı çıxır. Elə Azərbaycanda da geniş mənada həqiqət davası gedir, baxmayaraq ki, bizdə yaxşı qazanc və iş yeri də yoxdur. Amma buna da səbəb eynidir - həqiqətin yoxluğu, yalanın hakim olması.
Küveytdə baş verənlər həqiqətin çörəkdən daha vacib olduğunun dərk edilməsidir. Tarix boyu insanları çörəklə aldadıblar. Daha doğrusu, onların çörək ehtiyacını önə çəkib həqiqətdən uzaq salıblar. Amma bir həqiqət də odur ki, həqiqətsiz yaşamaq olmur. Bir gün görürsən ki, heç çörək də tapa bilmirsən.
Heç bir romantikaya uymayaraq və gerçəklik hissini itirməyərək, əminliklə deyə bilərik ki, istənilən ölkə üçün həqiqət çörəkdən üstündür. Niyəsini izah etmək də çətin deyil. Şəxsən mən bunu bir qarın çörəyə möhtac olan aclara da, heç bir qayğısı və ehtiyacı olmayan toxlara da izah etməyə hazıram...
Bu sətirləri, bu fikirləri yazmaqdan isə yorulmuram...
Həqiqət olmayan ölkədə insanlar bir-birinin çörəyini əlindən alır. O ölkə tənəzzülə məhkumdur. Onun iqtisadiyyatı inkişaf edə bilməz, nefti və qazı da onu səfalətdən qurtara bilməz. Həqiqət olmayanda bir dövlət dərəbəyliyə çevrilir. Yalan hakim olur və hamı bu amansız hakimin hökmünü növbə ilə qəbul edir və acılarını yaşamalı olur.
Bizim hakimiyyət Küveyt əmirindən səxavətli, ədalətli və humanist deyil. Lakin bizi yollarla, körpülərlə, rənglənmiş binalarla aldatmaq istəyir. Neft pullarının qırıntıları ilə birtəhər dolanmağımızı, acından ölməməyimizi bizə üstünlük kimi sırıyır. Zəngin ölkəmiz isə talanır, daha varlı olmaq imkanlarından məhrum oluruq. Bizim normal səhiyyəmiz, təhsilimiz, çoxumuzun qazı-işığı da yoxdur. Üstəlik, ölkəni bürüyən haqsızlıq və yalan, saxtakarlıq və qanunsuzluqlar içində yaşamağa məhkumuq.
Bunu görmək çox ağırdır. Biz gördük ki, həqiqət olmadığı üçün zəngin, Küveytəbənzər ölkəmizdə adamlar çörək qazanmaq üçün yad ellərə səpələnir. Biz gördük ki, həqiqətdən uzaq düşmək üzündən nələri itiririk, hansı çətinliklərlə üzləşirik.
Odur ki, Küveytdə baş verənlər sanki bizim həqiqəti səsləndirir: Biz küveytlilər narazıyıq, görün Azərbaycanda insanlar nə gündədirlər...
Şahvələd ÇOBANOĞLU,
Azadlıq qəzeti
|
