 Əssalamun-əleykum, ey ADƏM övladları !
Ay canınıza daraşım, ürəyim doludur. Heç bilmirəm sözümü necə qısaldım ki, vacib olan bəzi həqiqətləri diqqətinizə çatdıra bilim.
Son iyirmi illik tariximizin bəzən saxtalaşdırılmasına cəhd olunsa da, bütün ictimai-siyasi proseslərin iştirakçıları ölkədaxili hadisələrin canlı şahididirlər. SSRİ hökuməti dağılandan sonra bu gün hakimiyyətdə və deputatxanada oturanlar bağıraraq xalqı inandırmağa çalışıb dedilər ki, biz müstəqil olsaq, ölkənin bütün kənd yolları da sərvətlərimiz hesabına on santimetr qalınlıqda qızılla örtüləcək. Siz binəva, zavallı xalq da o boşboğaz, vaxtıilə kommunust dönəmində qanınızı zəli kimi sovuranlara inandınız, onları hakimiyyətə gətirdiniz. Onlar isə kreslolarına kleylənən kimi Sizləri tamamilə unutdular. Başladılar bala-bala Vətən torpaqlarını müqavimətsiz olaraq erməni dığalarına peşkəş etməyə.
Ölkənin siyasi palitrası tamamilə qara rəngə boyanmaqla, müxtəlif gözəllikdə olan rəng çalarları tamam silindi. Ölkənin milli sərvətlərini amansızcasına talan etməyə start verildi. Gözü doymayan hakimiyyət mənsubları dünyanın bütün ölkələrində özlərinə və nəvə-nəticələrinə dəbdəbəli villalar, malikanələr, xanimanlar inşa etdilər. Qudurğan nazir balaları Allahın müsəlman ümmətinə halal buyurduğu heyvan ətini bəyənməyib, haram sayılan "Ayı” əti kababına meyl etdilər... Hramı olsun, bununla işimiz yox!
 Hamını narahat edən problemlərdən biri də Masallı rayonuna təyin edilən icra hakimiyyəti başçısının (İHB) rayonun büdcəsini vəhşicəsinə mənimsəməsidir. Sabiq İHB-sı Ğəzi müəllim rayonun başına nələr gətirdiyi barədə çox demişəm. Keçən dəfə də onun cinayət xarakterli, korrupsiya məsələlərindən, rayon əhalisinin paybəlli torpaq sahələrini zorla, hədələmək yolu ilə əllərindən alıb öz yaxın adamlarının adına sənədləşdirib özəlləşdirməsini diqqətinizə çatdırmışdım. Təzə təyin olunan İHB-sı Rafil Hüseynov rayona gələn kimi, yan-yörəsində hərlənən hacı və şeytan xislətli "sluqaları” onu başa saldılar ki, "Masallı kökəlmək üçün” çox əlverişli rayondur...
Gözünə döndüyüm Rafil müəllim axı necə də olsa, keçmiş "komsomol” namenklaturasıdır, fikirləşdi ki, bu dünyada adama nə qalsa, torpaq qalar. Ərkivan, Sığdaş, Qodman, Babakücə, Ninalov kəndlərinin Masallı ilə Ərkivan kəndi arasında olan əhalinin paybəlli torpaqlarını özəlləşdirmək qərarına gəldi. Bir neçə gün öncə, sözügedən kəndlərin bələdiyyə sədrlərini, icra nümayəndələrini çağırıb, "müxtəlif hədələrlə” özəlləşmə sənədlərini imzalatdığı deyilir. Sığdaş kənd ağsaqqalları etiraz etsələr də Rafil müəllim torpaqların "sülh yolu ilə qaytarılmasının” mümkün olmadığını dilə gətirməklə bildirib ki, bu məsələ dövlətin regionların inkişaf planına aid olan işidir. Buna etiraz edənlər ciddi cəzalandırılacaqdır. Paybəlli və bələdiyyə fonduna daxil olan, təxminən 500 hektara yaxın torpaqların Masallı ərazisinə qarışdırılması, digər məkirli məsələlərdən də xəbər verir. Belə ki, bir neçə ay öncə, Respublikada ən böyük kənd sayılan Ərkivan kəndinə rayon statusu verilməsi barədə də söhbətlər dolaşırdı. Hansısa səbəblərdən bu məsələnin həlli dayandırıldı (bu ayrı söhbətin mövzusudur). Olayları dəqiqləşdirmək üçün qarşı tərəfin fikirlərini öyrənmək mümkün olmadı.
 Əgər həqiqətən rayon ərazisi genişləndirilərsə, deməli həmin torpaqlarda tikinti işlərin aparılması və yeni korrupsiyaya yol açılması da istisna deyil. Qazanan yenə hakimiyyətin məmurları, itirən isə torpaq sahibləri olacaq. Korrupsiyaya açılan yollardan biri də rayonda ötən il tikilməsi, bu il isə hər yerin sökülməsi və yenidən tikilməsidir. Ğəzi müəllim ötən il külli miqdarda vəsait sərf edib, İHB-nin inzibati binasını əsaslı təmir etdi. Yollara bahalı plitələr düzdürdü, rayonun daxili yollarına asfalt döşətdirdi. Bütün bu "abadlq” işləri tamamlanmamış, Rafil müəllim gələn kimi həmin abadlıq işlərini darmadağın edib, yenidən inşa etməyə başlayıb. Maraqlı budur ki, məktəblər, xəstəxanalar,kənd yolları uzun illərdir ki, bərbad vəziyyətdə olduğu halda, rayonda bu tikinti-söküntü işləri hansı maraqdan qaynaqlanır. Çox guman ki, rayona ayrılan vəsaitin mənimsənilməsi üçün korrupsiya mənbəyidir. Masallı bu gün müharibə zonasını xatırladır desəm, heç yanılmaram. Baxın bu şəkillərə, görün şəkillər sizin fikirlərinizi korrupsiyaya, yaxud daha çox "işğal” altına olan rayonlara gedən yollaramı aparır?
Ay canınıza daraşım, mən isə açıqca deyirəm ki, hakimiyyətin bu əməlləri daha çox işğala bənzəyir.
DİTDİLİ bəy,
Masallı rayonu,
27 noyabr 2012-ci il
|
