 Və yaxud: "Sanki uşaq bir atanın belindən gəlir, böyüyüb başa çatanda isə yaş kağızında başqa atanın adı yazılır”
Bu yazının linqi 20 iyul 2009-cu il tarixdə "Cənub xəbərləri” qəzetində çap olunmuş "Xeyriyyəçi niyə küsüb?” başlıqlı və böyük qalmaqala səbəb olan məqalədən xəbər verir.
Sirr deyil ki, gənclərimiz əsgəri xidməti başa vurduqdan sonra, bu ölkədə heç yerdə lazım olmadıqlarına görə bir tikə çörək dalınca Rusiyanın soyuq Sibirinə hicrət etməyə üstünlük verirlər. Vətəndən uzaqda min cür çətinliklərlə, xüsusən Rus OMON-çularının işgəncə və təqiblərinə baxmayaraq pul qazanır, Azərbaycanda qalan valideynlərinə də maddi yardımlarını əsirgəmirlər.
Hətta bir çoxları boya-başa çatdıqları el-obasında xeyriyyəçilik də edirlər.
Masallı rayonunun Kolatan kəndindən olub Rusiya Federasiyasında yaşayanlar 2009-cu ildə kəndə təbii qaz çəkilməsi məqsədi ilə 87 min ABŞ dollar göndərdilər. Müsahibim, Kolatanlı ağsaqqal Hacı Rəzzağın dediyinə görə, həmən pulun 80 min dollarını sabiq rayon Qaz İstismarı İdarəsinin müdiri Elxan müəllim özündən yuxarı ağaları ilə birgə həzm borularından keçməsinə nail oldular. Xatırladaq ki, SSRİ dönəmində rayonun ən ucqar kəndi Sığdaş və Ninalova da qaz xətti çəkilmişdi. ”Xoşbəxt sosializmdən kommunizmə” keçid dövründən bəri təbii qazın gəlişini insanlar hələ də səbirsizliklə gözləməkdədirlər.
87 min dolların qoxusunu duyan rayon İH-nin başçısı Qəzənfər Ağayev kənd əhalisinə dəfələrlə bildirdi ki, qazınız yaxın aylarda çəkiləcək.
Mən isə qaz çəkilişi məsələsini kökündən araşdırmağa başladım. Bu işlə bağlı hətta "Azəriqaz” rəsmilərinin mənim diktofonuma dedikləri bu günün özündə də aktualdır. Bildirilmişdi ki, rayonun Kolatan, Xanalion, Sığdaş, Babakücə, Ninalov və digər dağətəyi kəndlərə qaz çəkilişi 2013-cü ilə kimi plana salınmamışdır. O vaxt mən camaata bildirdim. Çox yazdım, çox dedim, eşidən olmadı.
Elxan müəllim 80 min dolları qamarlayıb Gəncəyə anoloji vəzifəyə getdi. Kolatan və ona qonşu kəndlərin köhnə qaz borularının bəzi çürümüş yerlərini qaynaq edib, necə deyərlər camaatın gözünə kül üfürdülər. Onu da qeyd edim ki, kənd sakinləri dərdini deməyə dürüst adam tapa bilmirlər.
Sözümün canını lap unutmuşdum e...!
Dedim axı, köhnə borular ordan-burdan qaynaq edildi. Bir də eşitdik ki, İH-başçısı Qəzənfər müəllim Az.Tv-dən çəkiliş qrupu dəvət edib.
Kolatanda qaz çəkilişinin açılışı ilə əlaqədar ərazi nümayəndəliyinin inzibati binası qarşısında mitinq düzənləyib (Allah səni rəhmət eləsin, Mirzə Cəlil, kaş ki, bu kəndə də məxsusi bir ad seçəydin!).
Deyirsiz sonrası nə oldu? – Necə nə oldu, o oldu ki, kəndin buyruq müqəvvaları, ərazi nümayəndəsi və bələdiyyə üzvləri əvvəlcə Qəzənfər müəllimin ayaqları altında iki qoyunu qurban kəsdilər, təriflər yağdırdılar, salavatlar çevirdilər.
Binanın arxasında isə "I" əməliyyatı, yəni bələdiyyəçilər çiyinində gətirdikləri qaz balonuna şlanq qoşub, məşəlin yandırılmasını hazır vəziyyətə gətirdilər. Qəzənfər müəllim kənd camaatının alqışları altında balondan gələn qaz məşəlini yandırdı, elə həmin gün axşam Az.Tv kanalizasiyası Kolatanda qaz çəkilişini yayımladı.
Oxşar vəziyyət qonşu Bədəlan kəndində də baş verdi. Qaz problemi ilə bağlı yaşadığım Sığdaş kəndindən bir neçə kəlmə deməsəm, "göydə mələklər də qınayar bizi”.
Hələ Kolatanda "qaz” söhbəti bitməmiş, mənə təqib və təzyiqlər də ara vermirdi. Sabiq ərazi nümayəndəsi Valeh Mikayılovla olan 87 min dollarlıq söhbətə Boradigah polis bölməsinin rəisi mənim haqlı olduğumu təsdiq etməsiylə nöqtə qoydu. O ərəfədə kəndimizin tanınmış, müqəddəs "Mursəli”ocağını inhisara götürən bəzi hacı və kərbəlayılar da fürsətdən istifadə edib, camaatı aldadaraq bir ay müddətinə kəndə qaz çəkiləcək, deyə qapı-qapı düşüb, 50-100 manatdan pul yığdilar.
Onda da haray qopardım, ay camaat, sizi aldadırlar! – Mən dedim, mən eşitdim.
Çox keçmədi, hər kəs anladı ki, bu hakimiyyət əgər paytaxt əhalisinə qaz vermirsə, ucqar, ona lazım olmayan Sığdaş kəndinə heç vaxt verməz. Hər cümə namazından sonra "qaz razborka”sı gündəmdən çıxmır ki, çıxmır...
Mətləbdən uzaqlaşmayıb, onu da deyim ki, "xudanəkərdə” Kolatana qaz verilsə, İH başçısı dəyişilsə, məşəlyandırma "mərasiminə” təkrar Az.Tv- reportyorları ezam olunacaqmı?
Düzünə qalsa, Kolatanlılara nə balondan yandırılan yalançı məşəl , nə də onu yandıran lazım deyil. Onları Rusiyada balalarının zülümlə qazanıb kəndə qaz çəkilişinə görə göndərdikləri 87-min ABŞ dollarının acı taleyi maraqlandırır. Müqəvva bələdiyyə üzvləri isə deyirlər ki, rayona yaxın günlərdə yeni başçı təyin olunacaq, qaz problemini də o həll edəcək. Mənsə deyirəm ki, "sanki uşaq bir atanın belindən gəlir, böyüyüb başa çatanda isə yaş kağızında başqa atanın adı yazılır”
Belə ki, bizdə bir iş adamı obyekt tikir, həmin obyekti başqasının adına yazırlar. Bu da YAP-ın (Yalançı Azərbaycan Partiyasının) siyasətidir.
P.S. Bir keçəlin qap-qara bığı varmış, bir gün keçəl durur güzgü qabağında əllərinə vazelin sürtüb, bığını sığallayır, sonra əlini başına çəkmək istəyəndə, dərindən ah çəkir. Arxadan atasına diqqətlə baxan uşaq birdən deyir: Atacan, ahın dağlara, darıxma, inşaallah sənin də başına tük gələr.
Mətləb DADAŞİ,
Azərbaycan Jurnalistlər Birliyinin üzvü
|
