Главная » 2012»Февраль»8 » Iran-Azərbaycan münasibətləri Pənah Hüseyn və Əfşar Süleymani kontekstində
16:38
Iran-Azərbaycan münasibətləri Pənah Hüseyn və Əfşar Süleymani kontekstində
Iki gün əvvəl ANS televiziyasında jurnalist Mirşahin Ağayevin aparıcılığı ilə "Ən yeni tarix” verilişinin çəkilişləri gedərkən dramatik anlar yaşanıb, efir çəkilişləri yarımçıq dayandırılıb. Bu barədə "Qafqazinfo”ya yazdığı "Pənah Hüseynin ANS-dəki rəzaləti” adlı köşəsində jurnalist Arzu Abdulla bəhs edib. Bir çox qonaqlarla yanaşı, verilişə Əbülfəz Elçibəy dövründə baş nazir işləmiş Pənah Hüseyn və Iranın ölkəmizdə səfiri vəzifəsində çalışmış Əfşar Süleymani də dəvət olunub. "Ən yeni tarix”in budəfəki mövzusu "Iran-Azərbaycan münasibətləri” olub.
Aparıcı Mir Şahin səfirə xitabən "O vaxtlar Əfşar Süleymani 1992-ci ildə Iran hökumətinin Qarabağa yardım etdiyini ilk dəfə söylədi. Bu yardım nədən ibarət idi?” sualına Əfşar Süleymani, "silah-sursat yardımı etdik”, cavabını verib. Pənah Hüseyn bu zaman yerindən etiraz edib ki, dövlətlər arasında olan bəzi məsələlər var ki, onun geniş kütlə üçün açıqlanması düzgün deyil. Sabiq səfir isə bu barədə 20 illik siyasi fəaliyyətini işıqlandırdığı kitabında da yazdığını bildirib. Daha sonra o zamankı prezident Əbülfəz Elçibəyin Irana o qədər də müsbət olmayan münasibəti haqqında danışılanda Pənah Hüseyn bu fikirə kəskin etiraz edib və "Azərbaycan Iran münasibətlərinin ən yaxşı dövrü mənim prezidentim Elçibəyin dönəmində olub” deyib. Buna etiraz edən Süleymani isə Pənah Hüseynin prezidenti Elçibəyə əsl "sevgsini” sərgiləyib. Əfşar Süleymani Pənah Hüseynə Irandakı söhbətini xatırladıb. "Pənah bəy, siz Irana gəlmişdiniz. Sizinlə Əbülfəz Elçibəyin Irana olan soyuq münasibətindən danışdıq. Elçibəyin Irana soyuq münasibətinin səbəbini soruşanda Siz belə cavab verdiniz: ”Əbülfəz Elçibəy tarixçdir, o, siyasətçi deyil".
Əfşar Süleymaninin bu xatırlatması vəziyyəti kəskinləşdirib. Keçmiş baş nazir üzünü Mir Şahinə tutub, Əfşar Süleymanini göstərərək, "Bu əskiyi bura niyə çağırmısan?” deyə bağırmağa və dəhşətli dərəcədə əsəbləşdiyini, özündən çıxdığını sərgilməyə başlayıb. Bu zaman qarşı tərəf, "əskik sənsən”, deyib. Həddindən artıq əsəbləşən Pənah Hüseyn Əfşarinin üstünə yüyürüb, onu vurmaq istəsə də, təhlükəsizlik işçiləri buna imkan verməyiblər. Pənah Hüseyn daha sonra Mir Şahinin üstünə qışqırmağa başlayıb: "Məni bu verilişə nahaq çağırmısız. Çağıranda bilsəydim ki, bu şərəfsiz (əlini Əfşar Süleymaniyə uzadıb) də burdadı, heç gəlməzdim”. Əfşar Süleymani isə yenə də sakitcə P.Hüseynin cavabını qaytarıb: "Pənah bəy, şərəfsiz sən özünsən”.
Bu dəfə P. Hüseyn yenə Əfşar Süleymanini döymək üçün onu üstünə yeriyib. Və Əfşar Süleymaniyə üzünü tutub "Bu oğraş iki ildir arvad məhkəmələrində qalıb” deyib. Bu dəfə də Əfşar Süleymani sakit şəkildə "Elə bunu da sən etmisən də” cavabını verib.
Vəziyyətin nəzarətdən çıxdığını görən Mir Şahinin "Çəkilişi saxlayın, bu veriliş efirə də getməyəcək, qonaqlardan üzr istəyirəm” bəyanatını verib.
Baş verənlərlə bağlı "Qafqazinfo” Əfşar Süleymani ilə əlaqə saxlayıb. Sabiq səfir köşə yazısında qeyd olunan məqamları təsdiqləyərək, prosesin bu şəkildə davam etməsində günahkar kimi P. Hüseynin adını çəkib: "Pənah Hüseynin xasiyyətini hamı yaxşı bilir. Hətta Nəsib Nəsibli mənə baş verənlərdən çox pis olduğunu dedi”.
P.Hüseyn isə "Qafqazinfo”ya belə cavab verib: "Mən ANS-in efirində olmamışam”.
Olayla bağlı anspress.com-da Mir Şahinin də mövqeyi yayılıb. Mir Şahin bildirib: "Ən yeni tarix”in son verilişini yarımçıq saxlamalı oldum. "Azərbaycanın müstəqilliyi dövründə Iran-Azərbaycan münasibətləri” mövzusunda hazırladığımız bu verilişə qonaq çağırılmış şəxslər arasında Azərbaycanın keçmiş baş naziri Pənah Hüseyn və Iranın Azərbaycanda səfiri olmuş Əfşar Süleymani də var idi. Verilişdən əvvəl qonaqlar, o cümlədən Əfşar Süleymani və Pənah Hüseyn birlikdə idilər. Onlar arasında qarşılıqlı ikrah, ya da qəbul etməmək kimi hallar hiss etmədim. Studiyaya da hamı ilə birlikdə getdilər. Təxminən yarım saat hər şey qaydası üzrə gedirdi. Mübahisə isə Əfşar Süleymaninin Elçibəy hakimiyyətinin Iran siyasətini xatırlatmasından sonra baş verdi. Mən bu hadisəni Azərbaycanda debat və diskussiya mədəniyyətimizdəki problemlərlə izah edirəm..." (Azadlıq Qəzeti)
