 Sıxan dıroz, sıxan kırt
Şairişbu, tınən boştə ro bınə,
Zulfuğari rizi səpe po bınə.
Im vətəni qədə-qudə odəmon,
Talan kardən, bəvon əmon mədəmon,
Xunpesovnon kardə koon pedəmon.
Qılə-qılə çəvon dərsi bıdəmon.
Şairişbu, tınən boştə ro bınə,
Zulfuğari rizi səpe po bınə.
Hiççi haştənin boəməno "piəçınon”,
Əmon mədən, xəlği şəv-ruj oçınon.
Dəvonəmon ozod, şəffof səçınon,
Xəlğon ıştə sofə mivə bıçınon...
Şairişbu, tınən boştə ro bınə,
Zulfuğari rizi səpe po bınə.
Milləti yol bəçəy loyiğ şəxs bənie,
Hiççi tamə nıkə, pokə nəfs bənie,
Xəlği dardibızın, xoşə ləfz bənie,
Dınyo nəbzi, ritmi qətəkəs bənie.
Şairişbu, tınən boştə ro bınə,
Zulfuğari rizi səpe po bınə.
Xəlği vədəbışı bəpe pok bıbu,
Əğıdəş sof, əməlonış çok bıbu,
Dınyobızın, sivil, ruşinfik bıbu,
Dastədəş naəhlon jəyo lok bıbu!
Şairişbu, tınən boştə ro bınə,
Zulfuğari rizi səpe po bınə.
İqtidari "sıpə kutə” çəş məkə,
Bo məmuron məbi nınqə riz, nokə,
Milli, şəxsi koy marağon boy cokə,
Milləti tale bəştə boydəğ bıkə...
Şairişbu, tınən boştə ro bınə,
Zulfuğari rizi səpe po bınə.
Edəs, millət çanə məzlum, bəbole,
Poymol bedə, cım goydəni, ku, lole!
Mavuji xəlğ hıtə, əşteş məhole,
Dastı-poçəş dəbastə bıə, behole!
Şairişbu, tınən boştə ro bınə,
Zulfuğari rizi səpe po bınə.
Jığo sıxan bıkə, ŞƏRİ quş eşu!
Boştə xəlği ta conı dasto bışu.
Bənə "cıvonmardəy” ıştı nom beşu.
Fəxır bıkə detı hətta mardəşu!
Şairişbu, tınən boştə ro bınə,
Zulfuğari rizi səpe po bınə.
08.11.2011
|
