İran İslam Respublikasının Xarici İşlər Nazirliyi Azərbaycan Respublikasının Tehrandakı səfirini nazirliyə çağırtdırıb.
İRNA-nın məlumatına görə, İran İslam Respublikasının Xarici İşlər Nazirliyi bildirib: Azərbaycan Respublikasının Milli Təhlükəsizlik Nazirliyi tərəfindən İran İslam Respublikasının dövlət orqanlarından birinə qarşı ittihamlarla yanaşı olan bir bəyanat yaymasının ardınca, Azərbaycan Respublikasının Tehrandakı səfiri Cavanşir Axundov İranın Xarici İşlər Nazirliyinə çağırtdırılıb. C.Axundovun İranın Xarici İşlər Nazirliyinə çağırılmasından sonra, İran İslam Respublikası hökumətinin məsələ ilə bağlı Azərbaycan Respublikası hökumətinə etirazı səfirin diqqətinə çatdırılıb.
İran İslam Respublikasının Xarici İşlər Nazirliyi bütün ittihamları rədd edərək, bildirib ki, Azərbaycan Respublikası hökumətinin bu hərəkəti iki ölkənin xarici işlər nazirlərinin son Naxçıvan iclasında razılığa gəldikləri anlaşma habelə, Azərbaycan Respublikasının müdafiə nazirinin son Tehran səfəri zamanı əldə edilmiş anlaşma ilə ziddiyyət təşkil edir.
İran İslam Respublikasının Xarici İşlər Nazirliyinin rəsmiləri həmçinin, sionist dairələrin dünyanın müxtəlif ölkələrində İran İslam Respublikasına qarşı oxşar ittihamlar irəli sürmələrinə işarə edərək, Azərbaycan Respublikasının Tehrandakı səfirinə bu hərəkətlərdə bir növ ahəngdarlığın olması haqda xəbərdarlıq edərək, dost və qardaş Azərbaycan Respublikasının da bu oyuna daxil olmasından təəssüf və narazılıq ediblər.
Azərbaycan Respublikasının Tehrandakı səfiri də cavab olaraq Azərbaycan Respublikası hökumətinin İran ilə bütün sahələrdə əlaqələrin genişləndirilməsində siyasi iradəyə malik olduğunu vurğulayaraq, İranın reaksiyasını təmsil etdiyi dövlətə çatdıracağını bildirib.
