 RESPUBLIKA TALIŞ MƏDƏNIYYƏTI MƏRKƏZI
Azərbaycan Respublikasının Prezidenti cənab İlham Əliyevə
Sürəti: millət vəkili Mehriban xanım Əliyevaya
Respublika Talış Mədəniyyəti Mərkəzinin sədri Rafiq Cəlilov tərəfindən
MÜRACIƏT
Cənab prezident!
Bilirəm ki, Respublika Talış Mədəniyyəti Mərkəzinin Sizə ünvanladığı əvvəlki onlarla məktub və müraciətlər kimi bu müraciətim də aparat işçiləriniz tərəfindən gizlədilərək Sizə çatdırılmayacaq, əvəzində isə "psevdotalışların” KİV-lərdə RTMM-nə qarşı basqıları təşkil ediləcəkdir, buna görə də Sizə həm yazılı, həm elektron, həm qəzetlər, həm də açıq internet səhifələri vasitəsi ilə müraciət etmək qərarına gəlmişəm.
Sizə müraciət etməkdə məqsədim RTMM-in bütün üzvlərinin nigarançılığına səbəb olmuş, RTMM-in İH-nin üzvü, RTMM-in rəsmi orqanı olan "Tolışi Sədo” qəzetinin baş redaktoru d-r Hilal Məmmədovun saxta, uydurma ittihamlarla həbs edilərək, günahsız olaraq 8 aydan artıq bir müddətdə həbsdə yatmasıdır. Nəzərinizə çatdırıram ki, d-r Hilal Məmmədov 21 iyunda, 6 ilə yaxındır ki, həbsxana həyatı yaşayan, Talış ziyalılarının qənimi Elman Quliyevin ərizəsi əsasında, narkotik saxlama ittihamı ilə şərlənərək həbs edilmiş, 3 iyulda isə yenə də həmən Elman Quliyevin ərizəsi əsasında d-r Hilal Məmmədova "vətənə xəyanət” və "milli, dini, irqi ayrıseçkilik salma” maddələri ilə yeni ittihamlar irəli sürülmüşdür. Bəs əsl həqiqət nədən ibarətdir?
Əsl həqiqət ondan ibarətdir ki, d-r Hilal Məmmədov öz fikri olan, azad, demokratik bir quruluş arzulayan, yaltaqlıq və məddahlığı bacarmayan birisi olduğu üçün kimlərinsə (çox təəsüflə qeyd etmək istəyirəm ki, burada Sizin ailənin üzvü, millət vəkili Mehriban xanım Əliyevanın da adı hallanır) qəzəbinə tuş gəlmiş, buna görə də cəzalandırılması barədə göstəriş verilmişdir.
Cənab Prezident! Siz hər bir vətəndaşın Prezidentisiz və bu vətəndaşlar arasında Sizə müxalif fikirləri olan insanların olması da təbiidir, cəmiyyətin gözəlliyi də məhz onun fikir müxtəlifliyindədir, saxta, yalançı, uçuruma aparan təriflərdənsə, acı, lakin düz olan tənqid daha gözəl deyilmi? Əgər hər hansı bir dövlətdə öz fikri olan bir şəxs, fikir müxalifliyinə görə şərlənərək həbsə atılırsa, bu həmən dövlətin səhf, yanlış yolda olduğunun sübutudur.
Cənab Prezident! Sual edə bilərsiniz ki, məndə d-r Hilal Məmmədovun şərlənərək həbs edilməsi qənaəti haradan qaynaqlanır? Bu sualın bir cavabı var: görünən kəndə nə bələdçi... D-r Hilal Məmmədovun ittiham aktında onun milli, dini, irqi ayrıseçkilik salmasının sübutu kimi öz tələbələrinə elektron müraciəti götürülüb, müraciətdə d-r Hilal Məmmədov tələbələrinə deyir: "rüşvət verməyin, özünüzü rüşvətə alışdırmayın, bu gün rüşvət verən, sabahkı rüşvətxordur” və çox gülməlidir ki, "ekspert” İlhamə Quliyeva bu müraciətdə heç bir millətin adı çəkilməsə də "milli”, heç bir dinin adı çəkilməsə də "dini” heç bir irqin adı çəkilməsə də "irqi ayrıseçkilik” "aşkarlayaraq”, d-r Hilal Məmmədovun tələbələri "kütləvi itaətsizliyə çağırmasını” "sübut” edib, əgər İ.Quliyevanın təbiriycə tələbələrə "rüşvət verməyin” demək, "kütləvi itaətsizliyə çağırmaq”dırsa, dövləti cinayətdirsə, onda görəsən "ekspert İlhamə Quliyeva” Sizin anti-korrupsiya haqqında məlum fərmanınızı nə sayır?
Haşiyə: İ.Quliyeva Əvəz Zeynallının işi üzrə də ekspertdir və məhkəmədə sadə bir cümlənin sintaksis təhlilini verə bilməyib. Cənab Prezident! Görün insanların taleyini kimlər həll edirlər...
Cənab Prezident! D-r Hilal Məmmədovun ittiham aktında onun "1992-ci ildən başlayaraq vəzifəli şəxsləri İranın xeyrinə cəsusluğa cəlb etməsi” yazılsa da, nə bir vəzifəli şəxsin adı, nə də
ki, cəsusluğun predmeti göstərilməyib, sübut kimi isə yenə də 6 ildir ki, həbsxana həyatı yaşayan Elman Quliyevin bu ilin iyun ayında yazdığı ərizəsindəki "eşitmişəm” sözü (?) götürülüb.
Cənab Prezident! "20 il müddətində MTN-nin gözündən yayınan”, "sadə, lakin MTN-dən ayıq bir vətəndaşın ərizəsi ilə həbs edilən” d-r Hilal Məmmədovun "1992-ci ildən bu yana İranın xeyrinə cəsusluğunu” ifşa edən məqamlardan biri də, məncə isə ən başlıcası bu biabırçı, dövlətimizə utanc gətirən istintaqda Milli Təhlükəsizlik Nazirliyinin iştirak etməməsidir, düzdür, prokurorluq "istintaq qrupuna” MTN-nin iki əməkdaşının adlarını yazsa da, onlardan heç biri istintaqda iştirak etməmiş, d-r Hilal Məmmədovla heç bir istintaq tədbiri keçirməmişlər, bildiyimiz kimi isə "dövləti cinayətləri”, xüsusən cəsusluq ittihamlarını məhz MTN araşdırır.
Cənab Prezident! RTMM olaraq Sizin ölkəmizə başçılıq etdiyiniz dövrdə, RTMM-in iki aktiv üzvünün, həmən Mərkəzin rəsmi orqanı olan "Tolışi Sədo” qəzetinin iki baş redaktorunun saxta ittihamlarla, konkret olaraq 2007-ci ildə RTMM-nin sədri, dilçi-alim, "Tolışi Sədo” qəzetinin baş redaktoru professor Novruzəli Məmmədovun oxşar ittihamla həbsini, 2009-cu ildə professor Novruzəli Məmmədovun həbsxanada müammalı ölmünü, indi isə yenə də RTMM İH-nin üzvü, "Tolışi Sədo” qəzetinin baş redaktoru, fizika-riyaziyyat elmləri doktoru Hilal Məmmədovun həbsinin motivlərini anlamaqda çətinlik çəkirik və bu həbslərin Talış xalqına, onun əsl ziyalı təbəqəsinə basqı kimi dəyərləndirmək məcburiyyətində qalırıq.
Cənab Prezident! Talış xalqı Azərbaycan dövlətçiliyi uğrunda mübarizədə, tarixi keşməkeşlərdə, Azərbaycanın müstəqillik əldə etməsində, Qarabağ döyüşlərində daima öndə olmuş, dövlətçilik maraqlarını hər şeydən üstün tutmuşdur. Bu sədaqətin bədəli olaraq isə Sizin rəhbərlik etdiyiniz iqtidarın Talış xalqına, onun ziyalı zümrəsinə basqısını anlaya bilmirik.
Cənab Prezident! Ümüdvaram ki, Siz bu müraciəti diqqətlə oxuyub, çıxış yollarını arayacaqsız, çıxış yolu kimi Siz vaxt tapıb respublikamızın ikinci ən böyük etnosu olan Talışların rəsmi təşkilatı olan RTMM-in üzvləri ilə görüşə də bilərsiz və ya bu müraciətimə görə məni də d-r Hilal Məmmədovun yanına göndərə də.
Hörmətlə:
Rafiq Cəlilov,
Respublika Talış Mədəniyyəti Mərkəzinin sədri
07 fevral 2013-cü il |
