Azərbaycan iqtidarının məsələlərə münasibəti çox yanlış və səviyyəsizdir
Prezident Administrasiyasının rəhbəri Ramiz Mehdiyev Ziyalılar Forumu və Rusiya Azərbaycan Təşkilatları İttifaqının fəaliyyətinə toxunaraq hər iki qurumun ünvanına xoşagəlməz fikirlər söyləyib. RATİ-nin yaradılmasına mənfi yanaşdığını deyən PA rəhbəri bu qurumun regionlarda yaranmış diasporla heç bir əlaqəsinin olmadığını, digər tərəfdən, burada ümumi maraqlardan kənar məsələlərin müzakirə olunduğunu bildirib. R.Mehdiyev həmin qurumun üzvlərinin öz şəxsi maraqlarını, mənafeyini güdmək məqsədi ilə belə bir təşkilat yaratdıqlarını da deyib.
PA rəhbəri qeyd edib ki, ittifaqın təşkilatçılardan biri ilə hələ təşkilat yaranmamışdan qabaq çox geniş söhbəti olub və ona öz mənfi fikrini bildirib.
R.Mehdiyev RATİ-nin yaradılmasını Rusiyada formalaşmış diaspora ilə qarşı-qarşıya qoyulma kimi qiymətləndirib. Onun sözlərinə görə, bu təşkilatın heç bir əhəmiyyəti yoxdur, sadəcə bu insanlar öz məqsədlərini güdürlər.
PA rəhbəri həmçinin Ziyalılar Forumunun fəaliyyətinə də toxunub. Bu qurumun ölkədəki ziyalıları təmsil etmədiyini deyən Mehdiyev Ziyalılar Forumunda toplaşan şəxslərin sadəcə əyləndikdərini bildirib.
R.Mehdiyevin səsləndirdiyi fikirlərə hər iki qurumun üzvü olan tanınmış yazıçı və kinorejissor Rüstəm İbrahimbəyovdən cavab gəlib.
"Azadlıq”a açıqlamasında Mehdiyevin əhəmiyətsiz sözlər danışdığını deyən İbrahimbəyov bildirib ki, PA rəhbəri daha vacib məsələlərlə məşğul olmalıdır: «Ölkədə konkret Ramiz Mehdiyevə aid o qədər problem var. Elşad Abdullayevin açıqlamaları, ofşor şirkətlər, hökumətin minlərlə digər problemi barədə danışmır, gəlib Ziyalılar Forumundan, RATİ-dən danışır. Dedikləri də həqiqətə uyğun deyil. Bu təşkilatlar bir-biri ilə bağlı deyil və hər ikisinin Azərbaycana böyük xeyri var və olacaq».
R.Mehdiyevin ittifaqın təşkilatçılarından biri ilə görüşünə gəldikdə, R.İbrahimbəyov onda bu barədə məlumatın olmadığını bildirdi və PA rəhbərinin danışdıqlarnı "mənasız söhbət" adlandırdı: «Mənasız sözlər danışır. Bu təşkilat başqa ölkədə, Rusiyada yaranıb. Özü də ictimai qurumdu, Azərbaycanın Prezident Administrasiyası ilə bağlı deyil. Belə sözləri deyən adamın ya siyasətdən başı çıxmır, ya da belə məsələlərə çox yanlış yanaşır».
R.İbrahimbəyovun sözlərinə görə, Prezident Administrasiyası belə işlərə qarışmalı deyil. Qurumun hansı məqsədlə yarandığını ictimaiyyət müəyyənləşdirir.
R.İbrahimbəyov bir neçə ilə əvvəl Rusiyada yaranan konqresin məhz Bakının müdaxiləsindən sonra demək olar, işini dayandırdığını bildirdi: «Rusiyada bunlara gülürlər. Bir neçə ilə əvvəl bizim yaratdığımız konqres gözəl işləyirdi. Bir-iki il əvvəl gəlib onun rəhbərliyini dəyişdilər, işlərinə qarışdılar, Bakıdan adamlar göndərdilər. Ona görə də indiyə qədər konqres qeydiyyatdan keçə bilmir və demək olar ki, işləmir. Bunlardan danışsınlar. Biz məcbur olduq Rusiyada yaşayan azərbaycanlıların maraqlarını müdafiə etmək, onları birləşdirmək üçün yeni təşkilat yaradaq. Bunlar başa düşmür ki, Azərbaycan Prezidenti Administrasiyası belə şeylərə qarışmalı deyil. Özləri süni nəsə təşkilatlar yaradırlar və deyirlər ki, bu təşkilatlar yaxşıdı və ancaq o olmalıdır».
R.İbraimbəyov hökumətin bu cür yanaşması və münasibəti ilə ölkədə vətəndaş cəmiyyətinin yaranmayacağını da qeyd etdi: «Hökumət məsələlərə belə yanaşsa, Azərbaycanda heç vaxt vətəndaş cəmiyyəti yaranmaz, ictimai rəy yaranmaz. Bunlar anlamırlar. Azərbaycan iqtidarının bu məsələlərə münasibəti çox yanlış və səviyyəsizdir». Azadlıq Qəzeti
