Hacıbaba müəllim, salam.
Son vaxtlar siyasi mövqeyin və milli məsələlərə münasibətinlə bağlı çoxlu söz-söhbətlər mətbuat orqanlarında yayılmaqdadır. Mən də bu məsələlərə münasibət bildirmişəm. Fikirləşirdim ki, haqqında yazdıqlarımı obyektiv, müstəqil mövqe kimi qiymətləndirəcəksən. Lakin, belə olmadı. Adekvat cavabın aqressiv və qərəzli oldu. Xüsusilə talışlar haqda dediklərin özünü bu millətdən sayanların bircə nəfərini də təmin etmədi. Hətta, həyata açıq gözlə baxan, insani varlığı milli varlıqdan üstün tutan kimsələr də səninlə razılaşmanı özlərinə ayıb saydılar. Belə təsürat yaranırdı ki, böyüklük göstərib məsələyə professor kimi yanaşaraq mövqelərində professoryana dəyişikliklər edəcəksən. Təəssüf ki, bu da olmadı. Sənə irad tutanları top atəşlərinə məruz qoydun. Cavablarında kolxozyana eqaizmin nur kimi parladı. Özünü haqlı sayıb, diğər bütün başqalarını nəinki inkar etdin, hətta yaşına – başına baxmadan təhqirlərə məruz qoymaqdan, haqlarında böhtan və hədyanlar deməkdən, çayxana söhbətləri etməkdən belə çəkinmədin.
İndi bütün diqqətinlə “millət vəkili” olaraq millət vəkili pensiyasını ala bilməməyin şokunu yaşamaqdasan. Guya MİLLƏT VƏKİLİ olmusan, lakin bu status sənə qərəzli olaraq şamil edilmir. Mənim “düşmən, separatçı, cinayətkar” adlandırdığın Mehdibəy Səfərov və digər talışlarla işim yox. Hətta onlara da irad tutdum ki, sənin kimi 75 yaşlı həmyerlimizi qınamasınlar, təhqir etməsinlər. Hərçənd bəzi məsələlərdə haqlı idilər. Mənə görə Şaumyandan, Melkumyandan və onlar kimi 26 nəfərdən cild-cild kitablar yazanlar ölkəyə rəhbərlik edə bilərdisə, onlardan balaca bir dissertasiya yazıb PROFESSOR olmaq müqayisədə elə də böyük bir qəbahət deyil. Qəbahət olan, bu professor zontiki (çətiri) altında uzun illər yağışda, qarda, boranda, tufanda iri addımlarla irəliləməyindir. Bir yandan deyirsən ki, bu ölkədə son 20 ilin bütün seçkiləri saxtalaşdırılıb. Bir yandan da deyirsən ki, mən MİLLƏT VƏKİLİ olmuşam. Lənkəranın Lerik istiqaməti kəndlərindəki məntəqələr Yaşar Rzayev, Çapay Qəhrəmanov və onlara əmr vermiş "ЦК" işçiləri tərəfindən saxtalaşdırıldıqdan sonra 5 il Milli Şurada şəstlə əyləşdiyini bilməyən varmı? Saxta deputat kreslosunda 5 il maaş alıb qürrələndin, indi də 75 yaşında saxta pensiya almaq mücadiləsindəsən.
Deyiblər eşitmişik, yaşayaraq görmüşük ki, insan yaşa dolduqca Allah ədalətini yanında görür, kamilləşir, müdrikləşir, axirət həyatında əzaba düçar olmamaq üçün günahlarını yumağa can atır. Görünür sən bunlardan uzaqsan. Günahlarına yenilərini əlavə etmək düşüncəsi ilə çabalayırsan. Hindistanda geniş yayılmış VEDA dini var. Bu dinə görə bu dünyada günahkar insanların ruhları axirətə getmədən hansısa heyvanların bədənlərinə kecib daha bir həyat yaşayırlar ki, təmizlənsinlər. Bu yolda sənə uğur arzulamıram.
Daha bir məsələni diqqətinə çəkmək istəyirəm. Sənin, Lənkəranda xoşuna gəlməyən bütün kimsələrə qoyduğun bur ad var: ƏLƏKRƏMÇİLƏR. Bu sözü deməklə sanki, “düşməninə” öldürücü zərbə vurmuş olursan. Mən Səni də, Əkrəmi də yaxşı tanıyıram. Onunla çox yaxın münasibətlərdə də olmuşam. Baxmayaraq ki, mənə etdiyi pislikləri sadalasam gözlərin bir az da bərələr. İndi ona qarşı xoş münasibətim yoxdur, əksinə son addımlarını milli xəyanət sayıram. Lakin, o insanda bir qürur, sabit və dəyişməz mövqe görmüşəm. Kiməsə şəxsi mənafe naminə böhtan atmasını, bir sözlə tülüngülüyünü görməmişəm. Sənin haqqında bu sözləri deməyə dilim gəlməz. Yəqin ki, o “müdrik” siyahınıza məni də əlavə edəcəksən. Özün bilərsən. Mən hələ tam dərinliklərə getməmişəm...
Hüseynqulu Məmmədli
Lənkəran. 25.04.14.
