Teatrallaşmış tamaşadan pərdələr
D-r Hilal Məmmədovun məhkəməsi davam edir. Şəxsən mən məhkəmənin sürətinə heyranam. O boyda cəsusluq cinayətini cəmi iki məhkəmədə, özüdə şahidin "mənə deyiblər” ifadəsi ilə "sübuta yetirən” hakimlər-prokuror kvarteti mənə bizim məhkəmə sisteminin necə də raket sürəti ilə işlədiyini sübut etdi. Zatən "puluvu ver, şəklivi çəkdir” devizi ilə işləyənlərdən bundan artığını gözləmək də sadəlövhlük olardı.
I pərdə
İlk olaraq şahid haqqında. Şahid Elman Quliyev iddia edir ki, bəs sən demə Hilal Məmmədov İrandan, özü də xüsusi xidmət orqanları tərəfindən maliyyə alırmış. Maliyyə azlıq edəndə isə İran xüsusi xidmət orqanları Hilal Məmmədova yüksək əyarlı narkotik vasitələr göndərirmişlər. Vəkilin "nəyə görə İran xüsusi xidmət orqanları Hilala pul verirdilər?” sualına şahid tarixi cavab verib: Onlar Hilala pulu ona görə verirdilər ki, o, həmən pul ilə talışları Milli Məclisə, Milli Təhlükəsizlik Nazirliyinə, Prokurorluğa, Daxili İşlər Nazirliyinə yerləşdirib, onların vasitəsi ilə Talış dövləti qursun!
Halaldır Elman Quliyevə. Şəxsən mən Azərbaycanda vəzifə sahibi olmaq üçün rüşvət faktorunun olduğunu, Milli Məclisdə yerlərin "satıldığını” bilirdim, ancaq bunu sübut edə bilmirdim, heç «Elşad Abdullayev Prodakşın» da bunu sübut edə bilmədi, ancaq Elman bunu sübut etdi! Şəxsən mən böyük səlahiyyət sahibi olsa idim həm MM-də, həm MTN-də, həm DİN-də, həm də Prokurorluqda "oturan” talışların Hilalla bağlılıqlarını araşdırardım, teatrallaşmış səhnəni bitirmək üçün onlardan bir-ikisini də Hilala qoşardım ki, teatr inandırıcı görünsün, yoxsa bu heç ləzzət eləmir: Hilal İran xüsusi xidmət orqanlarının pulu ilə vəzifəyə o qədər adam yerləşdirsin, heç kəsin də adı hallanmasın. Şəxsən mən Elman Quliyevdən bir müsahibə götürə bilsəydim, həmən adamların adlarını ondan öyrənərdim, yəqin ki, Hilal Məmmədovun cəsus olduğunu, İran xüsusi xidmət orqanlarının maliyyə dəstəyi ilə adı çəkilən strukturlara adam yerləşdirdiyini Elmana "deyən” mərhum Novruzəli Məmmədov, həmən adamların adlarını da deməmiş olmaz. Bunda işim yox, yəqin bu teatrda həmən adamlar "mister X” rolundadırlar, yəni virtualda Hilal onları ora "yerləşdirib”, ancaq realda onlar yoxdurlar! Bax budur bizim məhkəmə, "Qafqaz əsiri” filmində deyildiyi kimi, "dünyanın ən humanist məhkəməsi”!
II pərdə
Dediyim kimi məhkəmə raket sürəti ilə gedir. Hilal Məmmədovun "milli-irqi ayrıseçkilik salma”sını sübut etmək üçün ekspert kimi linqivistika elminin nə olduğunu bilməyən İlhamə Quliyeva məhkəməyə çağırılıb. Bu həmən İlhamə Quliyevadır ki, Əvəz Zeynallının məhkəməsində də "ekspert” kimi ifadə vermişdi və Əvəzin həmən "linqvist-ekspertdən” "Mən çay qırağında, ağacın kölgəsində oturmuşdum” cümləsini təhlil etmə xahişinə "ekspert-xanım” "edə bilmərəm, çünki mən Azərbaycan dilini yaxşı bilmirəm” demişdi. Həmən xanım Hilal Məmmədovun məhkəməsində daha da irəli gedibmiş, sən demə İlhamə Quliyeva "məhəbbət nağılları” sahəsində ixtisaslaşıbmış. Mən niyə istintaqın məhz İlhamə xanımı məhkəməyə ekspert kimi dəvətini anlayıram, onlar özlüyündə talış separatizminin istintaqa lazım olan bir nağıl olduğunu çox gözəl bilirlər, lakin onlara Hilal Məmmədovun talış xalqına məhəbbətinin qədərini ölçmək lazım idi və buna görə də "məhəbbət nağılçısını” ekspert kimi dəvət ediblər, bu qədər sadə! Həmən "ekspert” də Hilal Məmmədovun tələbələrinə "rüşvət verməyin, yoxsa böyüyəndə rüşvətxor olacaqsız” cümləsində o qədər əndrabadi şeylər "tapıb” ki, gəl görəsən! Vallah mən bu xanımdan artıq qorxmağa başlamışam, birdən bu xanım sabah ekspert kimi dövlət başçısının "rüşvətlə mübarizə konsepsiyasını” təhlil etsə, görəsən daha əndrabadi nələr tapacaq?
III pərdə
Hilal Məmmədovun məhkəməsi yekunlaşmaq üzrədir, uzağı narkotika ilə bağlı da bir-iki iclas olacaq və ona hökm oxunacaq. Ancaq bu hökmü oxuyanlar, onu sifariş verənlər, həmən sifarişi yerinə yetirmək üçün əndrabadi şeylər fikirləşənlər, bəlkə oturub bir az düşünəsiz: Sabah, bu dünyada olmasa belə, ancaq mən əminəm ki, o hökmü sizə bu dünyada oxuyacaqlar, o dünyada sizə də hökm oxunacaq. Sizin oxuduğunuz hökmdən fərqli olaraq o hökm ƏDALƏTLİ olacaq!
