Главная » 2012»Сентябрь»7 » Hilal Məmmədovun vicdan məhbusu elan edilməsi gözlənilir
21:45
Hilal Məmmədovun vicdan məhbusu elan edilməsi gözlənilir
Sentyabrın 7-də Helsinki Vətəndaş Assambleyasının Azərbaycan nümayəndəliyinin ofisində həbsdə olan hüquq müdafiəçisi və "Talışı Sədo" qəzetinin baş redaktoru Hilal Məmmədovun Hüquqlarını Müdafiə Komitəsinin növbəti iclası keçirilib. Gozetçi.az portalının məlumatına görə, iclasda çıxış edən komitə üzvü Cahangir Suvarov H.Məmmədovun azadığa çıxması üçün yardım göstərilməsi məqsədi ilə Qafqaz Müsəlmanları İdarəsinin (QMİ) sədri Şeyxülislam Hacı Allahşükür Paşazadə ilə görüş üçün ona müraciət etməsindən və müraciətin nəticəsindən söz açıb. O, bildirdi ki, sentyabrın 7-də QMİ-də olub: "Orada mənə bildirdilər ki, avqustun 15-də Hilal Məmmədovla bağlı Şeyxülislam Hacı Allahşükür Paşazadəyə etdiyim müraciət şeyx tərəfindən Baş Prokurorluğa göndərilib. Həmçinin bildirdilər ki, şeyx özü də Baş Prokurorluğa müraciət edib. Dedilər ki, Hilal Məmmədovun məsələsi müsbətə doğru həll olunacaq. Müraciətlərin baş prokurorun 1-ci müavini Rüstəm Usubova təqdim edildiyi söylədilər".
Komitənin həmsədri Rafiq Cəlilov dedi ki, Rusiya Müftülər Şurasının sədri də H.Məmmədovla bağlı Şeyxülislam Hacı Allahşükür Paşazadəyə müraciət edib və həmin müraciət də Baş Prokurorluğa göndərilib. R.Cəlilovun sözlərindən məlum oldu ki, H.Məmmədovla bağlı Şeyxülislam Hacı Allahşükür Paşazadəyə edilən digər bir neçə müraciət də şeyx tərəfindən Baş Prokurorluğa göndərilib. İnsan Hüquqları Klubunun rəhbəri Rəsul Cəfərov qeyd etdi ki, H.Məmmədovun işi ilə bağlı məlumat hazırlayaraq "Avroviziya” musiqi yarışması ərəfəsində və ondan sonra Azərbaycanda insan haqlarının vəziyyəti ilə maraqlanan beynəlxalq təşkilatlara və mətbuata göndərib.
Komitənin digər həmsədri, Helsinki Vətəndaş Assambleyasının Azərbaycan nümayəndəliyinin rəhbəri Arzu Abdullayeva söylədi ki, H.Məmmədovu istintaq təcridxanasında müayinə etmək üçün həkim kimi Adil Qeybulla ilə danışılıb və razılıq əldə edilib. Bu işin hüquqi tərəfi ilə komitənin hüquqşünaslar qrupunun məşğul olacağını deyən A. Abdullayeva bildirdi ki, H.Məmmədovun barəsində seçilən həbs-qətimkan tədbiri haqda çıxarılan məhkəmə qərarından Avropa Məhkəməsinə müraciət hazırlanır.
A.Abdullayeva H.Məmmədovun işi ilə bağlı beynəlxalq təşkilatlarla iş getdiyini və yaxın günlərdə H.Məmmədova vicdan məhbusu adı verilməsi məsələsinə baxılacağını söylədi: "Hesab edirəm ki, biz Hilal Məmmədovla bağlı qətnamə də qəbul edə bilərik. Bu işdə bizə 435 beynəlxalq təşkilat da dəstək olacaq. Qeyd olunan həmin təşkilatlar Avropa Şurası Parlament Assambleyasının Azərbaycan üzrə məruzəçilərinin elektratı ilə danışıb, onlar vasitəsi ilə məruzəçilərə təsir edə bilərlər".
Komitə üzvləri müzakirələr zamanı H.Məmmədovun azadlığa buraxılması ilə bağlı ictimaiyyət nümayəndələri tərəfindən prezidentə müraciət edilməsini də müzakirə etdi və belə bir müraciətin edilməsi haqda qərar qəbul edildi. Bundan əlavə komitə üzləri H.Məmmədovun günahsız həbs edilməsinə etiraz olaraq aksiyalar keçirməyi də müzakirə etdi və etiraz aksiyası keçirmək üçün Bakı Şəhər İcra Hakimiyyətinə müraciət etmək qərarına gəlindi. A.Abdullayeva bildirdi ki, Hüquq Müdafiə Təşkilatlarının Monitorinq Qrupu adından Novella Cəfəroğlu, Səidə Qocamanlı H.Məmmədovun məhkəmələrinin açıq keçirilməsi üçün Ali Məhkəməyə müraciət edib. Həmçinin Hüquq Müdafiə Təşkilatlarının Monitorinq Qrupu H.Məmmədovun zaminə götürülməsi üçün istintaqa da müraciət edib.
Hilal Məmmədovun Hüquqlarını Müdafiə Komitəsinin üzvləri də onun məhkəmələrinin açıq keçirilməsi üçün Ali Məhkəməyə müraciət edəcəklər. R.Cəlilov qeyd etdi ki, istintaq H.Məmmədovla bağlı Lənkəranda 41 adamı dindirib.
Sonda isə H. Məmmədovun komitə üzvlərinə ünvanladığı məktub oxundu. H.Məmmədov məktubunda onu müdafiə edən hər kəsə təşəkkürünü yazıb.
Qeyd edək ki, sentyabrın 10-da saat 11:00-da Bakı Apellyasiya Məhkəməsində H.Məmmədovun ev dustaqlığı ilə bağlı Nəsimi Rayon Məhkəməsinin çıxardığı qərarından verilən şikayətə baxılacaq.
Komitə üzvləri həmin məhkəməyə hər kəsi gəlməyə çağırdı.
