Hüquq Müdafiəçisi, "Tolışi sədo” qəzetinin Baş redaktoru, fizika-riyaziyyat elmləri doktoru, professor Hilal Məmmədov 21 iyun 2012-ci il tarixdə evinin yaxınlığında özlərini hüquq-mühafizə orqanlarının işçiləri kimi təqdim edən bir qrup mülki geyimli şəxs tərəfindən saxlanılmışdır. Onu zorla şəxsi avtomobilə otuzduraraq naməlum istiqamətə aparmışlar.
Həmin gün eyni adamlar Hilal Məmmədovun mənzilində axtarış əməliyyat keçirmiş və nəticədə guya evdə narkotik maddə aşkar edilmişdir.
Beləliklə, Hilal Məmmədova qarşı uydurma bir cinayət maddəsi elan edilərək, barəsində həbs qətimkan tədbiri seçilmişdir.
Bir müddətdən sonra isə Daxili İşlər Nazirliyi və Baş Prokurorluq tərəfindən Hilal Məmmədova qarşı sübutsuz və faktsız – "dövlətə xəyanət” və "milli-dini zəmində qarşıdurma yaratmaq” kimi daha iki qurama ittihamlar irəli sürülmüşdür.
Hilal Məmmədovu tanıyanlar, habelə onun hüquqlarının Müdafiəsinə qoşulanlara gün tək aydındır ki, o bu kimi naqis əməllərdən həmişə uzaq olmaqla yanaşı, gənc nəslin sağlam, vicdanlı, əxlaqlı, saf və mənalı həyat tərzinə sövq edən əsl ziyalı missiyası yerinə yetirib.
Hilal Məmmədov nəinki, öz vətəninin maraqlarını xarici ölkələrə sata bilər, əksinə o bütün mənalı həyatını namusla, vicdanla doğma ölkəsi olan Azərbaycan Respublikasının demokratikləşməsinə, milli-mənəvi dəyərlərinin inkişafına, eləcə də vətəndaşlarının hüquq və azadlıqlarının qorunmasına həsr etmişdir.
Hilal Məmmədov nəinki xalqlar arasında milli ayrıseçkilik zəminində hər hansı nifaq toxumu səpmiş, əksinə o özü Azərbaycanın azsaylı xalqlarından olan Talış xalqının övladı kimi, hər zaman milli-etnik və dini tolerantlığın fəal təbliğatçılarından biri olmuşdur!
H.Məmmədovun həbs olunmasının mahiyyəti və məqsədi bu günə kimi Azərbaycan ictimaiyyətindən gizlədilmişdir. O, Azərbaycanda fəal vətəndaş mövqeyi sərgilədiyinə, cəsarətli hüquq müdafiəçisi olduğuna, obyektiv və prinsipial jurnalist fəaliyyəti göstərdiyinə və ən nəhayət, mənsub olduğu Talış xalqının milli-mənəvi-mədəni dəyərlər sisteminin təbliğinə görə avtoritar rejimin qəzəbinə tuş gəlmişdir. Məhz, elə bu səbəbdən də, o heç bir hüquqi bazaya söykənməyən saxta və qərəzli ittihamlarla şərlənərək, həbs olunmuşdur.
Hilal Məmmədovun həbsindən bir ilə yaxın vaxt keçir. İstintaq prosseslərinin çoxdan başa çatmasına baxmayaraq, məhkəmə prossesi heç cür yekunlaşa bilmir! Niyə? Yəqin ona görə ki, indiyə kimi məhkəmə irəli sürülən uydurma və absurd ittihamları sübut etmək üçün əsaslı və inandırıcı dəlillər tapa bilməmişdir. "Sifarişçi” isə, Hilal Məmmədova uzun müddətli zindan həyatı tələb edir! Əmr var və bu əmr, nəyin bahasına olursa-olsun icra olunmalıdır, vəssalam(!?).
Təbii ki, Azərbaycan ictimaiyyəti Hilal Məmmədovla bağlı Məhkəmədən ədalətli QƏRAR gözləyir! Belə olan halda, qərəzli sifarişçi və bu sifarişi yerinə yetirənlər nə etməlidirlər? Əlbəttə, ilk növbədə Hilal müəllim barədə formalaşmış müsbət ictimai rəyə təsir etmək! Necə təsir etmək? Bu məqamda onların yadlarına qərinə öncə özlərinin qoşub-qurduqları köhnə bir ssenari düşür! Belə ki, 1993-cü ildə "Lənkəran hadisələrində” də ictimai-siyasi aktiv mövqe sərgiləyərək, yalnız ölkəmizin ərazi bütövlüyü daxilində hər hansı milli-etnik problemlərin həlli yollarını dəstəkləyən Hilal Məmmədova yönəli növbəti bir saxtakarlıq əməli baş verir; güya "həmin dövrü əks etdirən”, (əslində isə montaj olunaraq, o vaxtkı hadisələri tamamilə təhrif edən) video-görüntüləri sosial şəbəkələrdə yaymaqla, Hilal müəllimin ölkəmizdə, eləcə də beynəlxalq arenada formalaşmış müsbət imicinə növbəti zərbəni vurmaq istəyirlər. Mahiyyət etibarı ilə saxta, məzmunca isə kobud montaj olunmuş videonu seyr edən istənilən tamaşaçı başa düşür ki, Hilal Məmmədov Azərbaycanın dövlətçilik maraqlarına zərrə qədər də ziyan vurmamış, əksinə, ölkəmizin ərazi bütövlüyünü və müstəqilliyini dəstəkləmişdir!
Maraqlısı odur ki, dövlət rıçaqlarından sui-istifadə edərək, şəxsi-qərəzlik zəminində Hilal Məmmədova qarşı aparılan total saxtakarlıq hücumlarına, özünü müstəqil və muxalif mətbu orqan adlandıran bəzi KİV-lər də dəstək vermişlər.
Biz, Hilal Məmmədovun hüquqlarının Müdafiə Komitəsi olaraq, bütün bu şəxsi-qərəzliklərə, saxtakarlıqlara son qoyulmasını tələb edirik! H.Məmmədovun məhkəmə prossesləri, nəinki Azərbaycan, eləcə də Dünya ictimaiyyətinin diqqət mərkəzindədir. Ümid edirik ki, istər bu işin "sifarişçiləri”, istər Məhkəmə - Hakim İnstitutu, istərsə də aparıcı media nümayəndələri Hilal Məmmədovla bağlı şəxsi, korporativ maraqları kənara qoyub, Dövlətçiliyimizin və Qanunlarımızın Aliliyinə hörmətlə yanaşacaqlar! Ortada bir günahsız və ləyaqətli insanın taleyi və özünü demokratik ölkə sayan Azərbaycanın imici var!
Biz qətiyyətlə Hilal Məmmədovla bağlı Hakimlərin ƏDALƏTLİ QƏRAR çıxartmalarını tələb edirik!
Hilal Məmmədovun hüquqlarının Müdafiə Komitəsinin üzvləri:
Rafiq Cəlilov (həmsədr),
Eldəniz Quliyev (Azərbaycan Ziyalılar Birliyinin sədri),
Mehdibəy Səfərov (Azəri-Talış Birliyinin sədri),
İdrak Abbasov (jurnalist),
Ulduz Haşımov (Müdafiə Komitəsinin üzvü),
Vahabov Mirfəyaz (Müdafiə Komitəsinin üzvü),
Səttar Cavadov (Müdafiə Komitəsinin üzvü),
Kamal Əmrah (professor, Müdafiə Komitəsinin üzvü),
Elnur Məlikov (hüquq müdafiəçisi),
Cahangir Suvarov (proffessor, Müdafiə Komitəsinin üzvü),
Arzuman Məcidli (Müdafiə Komitəsinin üzvü),
Əli Nasir (şair, Müdafiə Komitəsinin üzvü),
Bakı şəhəri 15 may 2013-cü il
